2 Timotius 3
3
Aphwami enebabut o ologun pam welat togu lema a’ge paget mo’gulesi wene
1Wene yu hede eberak wolomup o. O ologun hwerli pam modok wiak ema a’ge oruak o. 2Aphwami enede hwedik e, onu’gwarek enebe enebaget emin, uang paget emin, logo pogulat, onu’gwarek en erlikhorlogulat, legi-lago denagalat, eniak hurle wiak yagontogulat, enialak enaiklak eniak hwelak erlakma en ukpogulat, hau opsogo waronobu erlakma en enebabut lagorak ebele togulat, Allah paget tu erlakma en enebitsogo welat, 3aphwami enebe enedesogo wolom erlakma en enebit welat, is logon enemin wiak takpoluk erlagap poluk wolom e, enebirat welat, onobok wiak ’balogulat, enebabut asial polongnurak ebele togulat, op a’ge tu enebit welat, 4enebe mesigat a’ge de, is logon en waronobuagoluk yo’go lagalat, enebabut al ’belak ebele togulat, onu’gwarek en logo pagathorlogulat, Allah ebe enedeap po erlakma en, aphwami onogola enagaisogo togwi ai a’geat enagai welat, 5aphwami enil pam e, Allah eiyagai a’ge ’gela’ge welat, onogola en Allah anni demat a’ge ai ukpogulat, togu lema o. Yogodak aphwami enebabut ai ’gela’ge mesik togwi a’ge holuk, enemin hwedik wolorogup o. 6-7Hwami pema di a’ge yu a’ge onogola enagai opoluk, wiak takpoluk enede e’gin welat, wene mo’gulogwi modok welagai a’geat de, dem wene dokhumsogo wo pukmu en oruakma, is ap enebabut asogo togwi a’ge en, hwami ai onowi lo’gwe enabusagat ’gogulat, eniak pam lalonobogulat e, enebe herle wusogo ’gela’ge tenagonobogwi ai o. 8#Kel. 7:11Pageat, is ap Yanes emin, Yambres emin, Musa iak sagalogo ukpoluk tigisa ’gela’ge, is ai dem wene sagalogo ukpoluk, wiak togulat, onogola en wene hegit a’ge eberu erlakma en, wiak a’ge nak eberogwi ai o. Asogo togwi ai pam, enede Allah pam he’berik a’ge ’goboksogo ukpegesa oluk, enagat ema ai o. 9Is Yanes emin, Yambres emin, wiak tigisema, is logon en,
“Enede erlak,” oluk enagat pobi tigisa ’gela’ge, is ai asogoat enede erlak togwi oluk, aphwami ’berlegat enebabut enak a’ge ’balumu re, is eniak ai lok ema erlak o.
Timotius ede hurlesogo welemagoluk,
ologun pam esa’go weregei wene
10Is ai enebabut asogo ema a’geat de, hat nak e, an en wene mo’gulentasu legi a’ge emin, nebabut taga legi a’ge emin,
“Disogo tik o,” oluk nede epasu legi a’ge emin, nede Allah ebam he’berik welegi a’ge emin, nede ha’buktak welegi a’ge emin, aphwami ’berlegat nedesogo welegi a’ge emin, nepe mosogo welegi a’ge emin, page enat pobi nebise legenat ani o. 11#Per. 13:14–14:20Aphwami en di obotut yu obotut taknobogwiam, nebam obotut wiak hasu legi ano halugat o. Aphwami o Antiokhia en, Ikonium en, Listra en, wiagapnobogukhwe oruakma, nonue ’gain Onuk Logo a’ge en agauwa mesik mo u erlakma en delnebise laga ai o. 12Nis Kristus Yesus emin hwedik welat, Allah paget opsogo togu lomogoluk nonogola opogu lege a’ge, nenebe lo’bok ’berlegat di obotut yu obotut taknonobogu lemayat o. 13Wiagapnonobogukhweat, is logon wiak togulat lalonobogwi a’ge ai, is logon en lalonobogwiam, is en o’go-o’go lalonobogulat, wiak til tilat loksogo wiagaphorlouwa ai o. 14Is en asogoat togwi a’geat de, hat nak e, nis nenebe haluk a’ge en dem wene mo’gulheigema, hat en e,
“Demat o,” oluk wegen a’ge aiat ningsogo tenak wolomup o. 15Hat hebe malik wei a’ge pam enat Allah iak pelal wogo a’ge ai haluk welegen ai, hede eberak modok wolom o. Asogo welat, hede Kristus Yesus ebam he’berik oruakma, Allah en delhobu a’ge pobi togun en, at iak pelal wogo ai pam hede elirat ’gagalu a’ge oruak o. 16Allah iak pelal wogo a’ge ai ’berlegat e, at enat enede ’gagalegeimu, pelal wokho pegesa a’ge ai pam, aphwami logon wene dem wene mo’gulontogulat, dagan togwiam enesa’go worogulat, enebabut heberlogulat, Allah ogola agai epasu a’ge hegitsogo togu lemagoluk enesa’go worogulat, togulomat o. 17Aphwami enebe lo’bok enebe Allah paget poluk welat, di a’ge yu a’ge at ebaget op togwi a’ge ai elitsogoat enede hurlesogo togu lemagoluk, Allah iak pelal wokho woknentesi ai o.
Currently Selected:
2 Timotius 3: Wul
Highlight
Copy
Compare
Share
Want to have your highlights saved across all your devices? Sign up or sign in
