2 Timotius 1
1
Hau weregei wene
1-2 #
Per. 16:1
Timotius nomlogo nede hwedik a’ge o. Allah en e,
“His Kristus Yesus emin hwedik oruakma henelalugaphenebiso,” oluk, obok mo’gulnentesi a’ge ai, an Paulus en mo’gulentil denaga lemagoluk, ede epesi ano pam Kristus Yesus en yo’go noboluk peraknobou wagama, yema welat wene yu pelal wokho he’bek perakpou wegi ai o. Nenaik Allah emin, nonue ’gain Onuk Logo a’ge Kristus Yesus emin, e’birek enebabut op ano en, op a’ge wokhogulat, edeaphobogulat, hede ha’bugaphobogulat, togu lemak o.
Timotius ede Allah pam he’berik welemagoluk, esa’go wusogo mo’gulesi wene
3An ne’balak Allah eragam welat, onu’gwarek enede mesigat opsogo welat, at ebaget togulat, erliktogulat, togu legesa ’gela’ge, an asogoat tagalat e, hat hebam modok eberagat, hat hebaget hup erlige se’ban oso modogat welat, Allah hau werise legi o. 4Hat nge tigen ano en, ne’birek sarlok tultik, hede op agoam, opsogo nogola nagai haigoluk,
“Ne’birek sarlok tolu e,” oluk, hebam eberak welegi o. 5#Per. 16:1Welat, hede Allah pam demat he’berik welegen oluk nede eberagat welegi o. Naduk he’bia Lois emin, hia Eunike emin, enede Allah ebam he’berik welegesa ’gela’ge, hat hede asogoat welegen oluk pobi hebise legiat o.
6Asogo hede he’berik welegen ai en e, an en ne’gik ha’gul sebelhasuam, at Allah ebabut op en,
“Hat disogo taga lomup o,” oluk hebabut wokhesi a’ge ai, odouk hererim hasu ’gela’ge, hogola aganhan erinogoluk hede ’gagalogo mo’gulhegis o. 7Allah en nenebabut woknentasu ai re, nonogorloksogo welemagoluk woknentasu puk. We, nenannisogo welat, aphwami logon nenedesogo welat, nenede sebelak welat, togu lemagoluk woknentasu ai o.
8Ai en e, nonue ’gain Onuk Logo a’ge obok aphwami logon mo’gulonto re, he’gerli erlaksogo ’baksogoat mo’gulentasulat, ye, an at ebagerat ne’gik herle wusogo nebegesema welegi yu paget, he’gerli erlak halongsogo welat, taga lomup o. Asogo eselat, aphwami mu a’ge en op wene ai paget, di obotut yu obotut taknonobogukhweat, an Allah anni pam welegi ’gela’geat, hepe mosogo wolomup o. 9At Allah en nenebe delnenebiselat, at u’gwarek eiyagai emagoluk yo’go nenebasulat, tegei ai re, nis en mesik tige pam yo’go nenebesi puk. At e, Allah ebabut op en, naduk di a’ge yu a’ge owan walho erlak welat, pobuk Kristus Yesus tua ano pam en obapnenebiogoluk, u’gwarek ede opoluk yo’go nebesi ai o. 10Asogo epesi a’ge hisogo oruakma, pobuk Kristus Yesus delnenebiso a’ge ebe selakma aga ai pam enagat aga ai o. At iak op wene ai pam, waragai edip ai mabenap pasulat, warom erlakma en nenelaluk modok wolomul a’ge ai, selakma pasulat, tegei o. 11#1Tim. 2:7Asogo tegeitik, an op wene aiat ’beli’giselat, mo’gulentasulat, til nese lemagoluk yo’go noboluk peraknobou wagama neselegi ai o. 12Asogo peraknobou wagama neselegi ai en, aphwami en di obotut yu obotut taknobogukhweat de, nede ebe naluk a’ge pam e, he’berik welegi, oluk ne’gerli om erlakma en, nede ’buksogo welegi o. At en e,
“An en a’ge yu tenniarok wolomup o. Tenniarok oruakma re, hwerli an nebeat weik o,” oluk, nebam poluk yo’go nebesi a’ge ai, u’gwarek anni pam elirat tenniarok welema o, oluk nogola en pobirak pasu legi o. 13Wene an en mo’gulhegismu wegen a’ge ano, an nebabut wik-wok, nis Kristus Yesus emin hwedik welat, nenede at ebam he’berik pogulat, aphwami logon nenedeabonobogulat, togu lege ’gela’ge tagalat, hogola en e,
“Obapnenebiso a’ge wene ebe yuat o,” oluk, ningsogo tenak poluk mo’gulentasu lomup o. 14At Allah en e,
“Wene op a’ge ai aphwami logon en wiagap pou wano oluk, opsogo tenniarok wolomup o,” oluk, nenebam pesi a’ge ai, at Arogun nonogola pesimu oruak a’ge ai anni pam opsogo tenak wolomup o.
15Is aphwami o propinsi Asia da ya a’ge ebano enebe ’berlegat an uknoboluk ’bogulogo lebagalat, at Figelus emin, Hermogenes emin, eminat ’bogoligisa ai, hat halugat welegen o. 16Asogo a’geat de, at Onesiforus eiyagai enemin nak e, nin hwedik nan hwedik, nede opsogo nede sebelu wagai ai, nonue ’gain Onuk logo a’ge en edesogo tenentarok welemak o. An ne’gik herle werak oruakma ne’bek wom e’gerli erlaksogoat, 17o kota Roma wagarik e, perleneat hin woknebise lagarik, nebe horonobou waga ai o. 18Nonue ’gain Onuk Logo a’ge ebabut op en hegitsogo tua ai erlige, at Onesiforus ai ebe ede emak o. At pageat e, o Efesus welat, an loksogo letniasu laga ano, hat dokhumsogo halugat o.
Currently Selected:
2 Timotius 1: Wul
Highlight
Copy
Compare
Share
Want to have your highlights saved across all your devices? Sign up or sign in
