IBERANI 6
6
1Togop me, nit abet mbaruwak nduk, Keritut eeke nagagerak wone aa'nduk mamunik nogo mendek mban mugurok nogo logorak lek o. Ata, nit niniki kole ee'ninaburak wone nogo mendek inom wappunuk, mugurok nogo logowok o. ”Nit obeelom eekkolaawok,” mba'nuk, eeko logonet kwe, kagak kanggo nogogurak wone nogo, mbo punuk, Ala abet mbakwi wone inom, 2niyome waganggwi wone inom, inanobak nineenggi tebembiinok, tamban eekwi wone inom, aakumi kanggaatak ineenik agago mippiyoorak wone inom, o age yobok paga ninowak looniyak wone inom, wone ti mendek abok aret ti, ogowa pugu pogom wonage op aret kwe, uum pega'lek ogowa mban pit nogwe ti mage o. 3Ata, nit niniki kole ee'ninaburak wone nogo wappunuk, mugurok nogo logowok o. Mugurok nogwe niinok, Ala nen yeenggwanirage logogin o.
4It aakumi inomaluk mbo punuk, Ala wone konenggwi iigak, inikime eya aganake, mbogut paga nen onggo lek we wo'nirage nogo ombat wakkogwe, Aberiniki inikime waganggwi, 5Ala wone ninikime obeelom eeppinanege nogo muk liippugwi, ndi, o age yobok paga Ala nen nineebe mondok alik negen eeppinaniyak wone nogo ineenu ogwe, eeko nagatik, 6mbo punuk, nomoninuk alik eerit nogwe iinok ti, Keritut eyo karo-karo paga ambinom nabenogo punuk, nggwok paga enggali wakwi me, peebi inomaluk mbo punuk, Ala oba nabennari noorak abu meek aret kaagun o.
7O mayu wangge logonet, nggween yawenogo pegetak me, aakumi awi yakkolagaatak nogo nen anggen obeelom mbanggologwe Ala nen iige nagaatik, ”Nggween yi obeelom aret o,” yinuk, ale'nggen mbake menggerak kwe, 8wola inom, alok inom, mban lagangge kenok perak, Ala nen, ”Nggween yi abu maluk me, pulunogo punuk, kani kumbikit o,” yinuk, mbake menggerak.
9Noreewi o. Kit nit niniki kunik me, wone ti eeriyak yokkirogoorak kwe, Ala nen togop eekkinaburak nit mbaka'lek ogoorik o. Kit muk kinagap ndareegerak me, Ala nen obeelom mban eekkinake logogin mbako ogoorik o. 10Kit kinogoba Ala eyabu eerit nogo logonet, at endage tiyappuwak nduk, ”Ao,” mba'nuk, Ala apuri yeenggwaarogo nogogutak inom, yogondak awo yeenggwaarogwe inom, at mari eerogo pigin lek o. At a'me nggelok eeke menggerak me, onggo ndak-ndak aret wokkiraagin o. 11O age yobok paga eeriyak niniki luunik wonogwe nogo, ”Abet aret wo'niraagin o,” yinuk, wone ti paga kiniki panggonak logonet, kiniki mondok aganggen kerok togon kinalitak lombok mugurok nogo logorak, ”Ao,” lombok kinombako logonet, yokkirogo ogoorik o. 12Ala wone mugurok noorak kineebi eekkinake ti mage o. Ata, Ala nen, it aakumi, ”Togop eekkinabigin o,” yinuk, wone yoragagerak nogo, abet mba'nuk, iniki inaanaganggenggwi lek mondok kwi'ndak wonogo mbareegwa, ndak-ndak eeppiyareegerak nogo pogom, kit togop ndak-ndak aret logonip o.
Ala nen yegetak wone lek ageelik mondok a'me nggelok eeke menggerak wone
13-14At Ala nen Abarakam wone abok yoge logonet, ”Niniki ale'nggen koba pagage logonet, kapuri apit wokkirigin o, yinuk, an kogoba Ala nen abet aret yokkigi o,” yinuk, at endage tiyanak kokwak, ambi wonage lek me, at endage aret kunogo yoreegerak. 15Yoge mbareegi, Abarakam nen, ”Abet aret eeppanigin o,” yinuk, iniki mondok kwippunuk, tokkage nagagerak me, yoreegerak nogo ndak-ndak a'me aret nggelok yereegerak. 16Aap ambi at oone mondok abet mbaruwak nduk, aap ayuk warak ambi endage kunogo yorage menggerak ti paga it wone onggo-onggo yogwe nogo, lek aret age menggerak. 17Nogo ndak-ndak at Ala nen, ”Togop eekkabigin o,” yinuk, iniki koombunuk, wone abok yoreegerak nogo, ”Peebi Abarakam ombowologwe nogo nen alik eeriyak iniki koombunuk, yo'nirage nombakwi iyo,” wone eeppiyoorak Abarakam yoreegerak nogo yoge logonet, at endage inom kumbatinuk yoreegerak. 18At Ala nen wone ambi iniki koombunuk Abarakam abok yoge, ndi, ti'nuk ambi, pilit mbarukwak at endage inom kunogo yoge, eereegerak nogo ti, wone yugu alom mbere, lek eerogo puurak lek mendek aret yoreegerak ti paga, at Ala nen, ”An alik eeriyak niniki koombunuk, yokkiraagin lek o,” yinuk, at Ala nen nit ninagap ndarak mendek, ”Wo'niraagin,” yo'niragagerak niniki luunik mugurok nogo monggoorak nogo nen abet mba'nuk, mugurok nogo logowak nduk, yoreegerak me, nit mondok mugurok nogo logowok aret o. 19Yiiro niyo wonok nage kero, eyo nggwok paga mbarembogo mengga kwak, nit niniki ti, niniki luunik nogo paga aret mbarenak wonogwe o. Yiiro eyo nu'lek paga mbarembogo mengga kwak, niniki luunik nogo ti, Ala awi wurik me yum oolo ogoorak kagak aken time mbarenak negen wonage me, lek arigin lek mondok nu'lek mbarenak aret logogin o. 20Ndi, at Yetut nogo ti, aap Meliketerek eeke nagagerak nogo pogom, Ala unde ninowe nggwok mondok-mondok logowak nduk, mippereegerak me, nit peebi unggwi nawak nduk, at aa'nduk ninake tu yarit unggwi nagagerak wonage o.
Currently Selected:
IBERANI 6: WNO
Highlight
Copy
Compare
Share
Want to have your highlights saved across all your devices? Sign up or sign in
