IBERANI 7
7
Keritut Meliketerek imbirak eereegwaarak wone
1Aap Meliketerek nogo ti aakumi o Talem mendek inowe endagembogut inarum logonet, Ala agi tiyanak lombok menggerak nogo, inom unde wonagagerak. Ala unde logonet, ake eeke kagak, ne ambi paga Abarakam wim namburit nage logonet, aap inendagembogut ineebe ambik inooppunuk ame wage me, aap Meliketerek nogo ka wungge nagagirik, ale'nggen Abarakam oba pege mbareegi, 2Abarakam nen aap inoorit nage logonet, inamendek kugun waganeegerak nogo, ”Kinamendek 10 kokwak wonage kenok ambi yendenogo an nake panu o,” yinuk, Ala nen yereegerak nogo ndak-ndak, abeenok mogonogo Ala ake aap Meliketerek nogo wogoreegerak. Aap Meliketerek endage toonak nogo ti, anebenu mbere wonage. Ambi ti, ”Obeelom Mban Eeke Menggerak Endagembogut o,” yinuk, yogwe, ndi, ambi, at o Talem obeelom unde wonagagerak me, ”Aakumi Iniki Ugun Inale'nggen Mbakwi Inogoba Endagembogut o,” yinuk, yogwe, eeko nogogwaarak. 3At aap Meliketerek nogo ti, ombomini inom, agalo-ogoba inom, nda'nagagerak inom, kambeegerak inom, mbininogo liiru mbanak lek ti paga, at Ala aput negen Ala unde mondok-mondok itok menggerak kogo o.
4At Abarakam nogo, nit apit ninombo aap nggwok aret wonagagerak kwe, wim namburit nage logonet, kugun waganeegerak abeenok obeelom kenok, aa'nduk mendek negen mogonogo Ala ake aap Meliketerek wogoreegerak ti paga, at Meliketerek nogo ti, aap mondok nggwok aret kogo o. 5Ala nen wone, ”Yogop ee'nu, ndogop ee'nu,” yinuk, aakumi Iterali mendek yorage logonet, ”Kinamendik-kinamendek 10 kokwak wonage kenok, ambi yendenogo an nake panugwi kiinok, it Leewi mendek an nake eekwi nogo nen mban waganggo logowak o,” yinuk, yoragagerak nogo ti, it Abarakam ombowologwe nen Ala ake pugwi iinok, it mendek nogo Leewi ombowologwe nen Ala ake pugwi iinok, it mendek nogo Leewi ombowologwe aret waganggo logowak nduk, yoragagerak kwe, 6aap Meliketerek perak, Leewi mendek lek kwe, Abarakam nen Ala ake pugu mogonogo wogoge mbareegi, ”Ala nen wone yoreegerak nogo porogo menggerak nogoba aap nggwok yi aret me, nagabiti o,” yinuk, yuurak kwe kagak, wagangge nagagirik, ale'nggen oba pereegerak. 7It aap inoweewi inendage warak nogo nen, inawuri inendage lek tebenak mendek inale'nggen inoba piigo menggaarak nogo lek a? Togop eeko menggaarak me, 8it aap Leewi ombowologwe Ala ake pugu waganggo menggaarak nogo ti, it aap ambi kangge kagak, obaane'me ambi mippegak eeko menggaarak mendek nen, Ala ake pugu waganggo menggaarak kwe, at ambi eereegerak nogo ti perak, ndiyom paga kambeegerak liiru mbanak lek me, mondok-mondok eenik logonet, wagangge menggerak kogo ogoorik o. 9-10Ndi, Leewi ti Abarakam ombooluk aret me, aap Meliketerek nogo nen Abarakam ka wungge mbareegi, Abarakam nogo nen at Leewi nda'naga'lek inikime awo kagak Ala ake pugu wogoreegerak me, it Leewi mendek Ala ake pugu waganggo menggaarak nogo nen Ala ake pugu aap Meliketerek wogoreegwaarak yuurak op aret o.
11Ala nen it aap Leewi ombowologwe nogo, Ala unde logonet eeko logowak nduk, mippiige mbareegi, it nogo nen aakumi inake eeko logonet obeelom eeppiyaawak nduk, wone, ”Yogop ee'nu, ndogop ee'nu,” yinuk, inom yoragagerak nogo, eeko logonet kwe, it eekwi paga aakumi obeelom aganaburak op logonetak en, peebi it aap Ala unde Karun ombowologwe mendek nogo mbo piinok, aap alik Meliketerek mendek ambi mippiyoorak koonenetak lek o. 12Ndi, it Ala unde logonet eeko menggaarak nogo, lek eerogo punuk obaane'me alik ngget mendek ambi eeko logowak nduk, mippiige kenok, it eeko logorak wone ngget mendek inom yorage menggerak. 13Wone Ala nen yereegerak an yokkiragarak nogo ti, at ninowe endagembogut Yetut nen mban eeke logorak yereegerak me nduk, yokkiragi o. At anebunu alik mendek me, ndi, at anebunu mendek ambi nen aakumi inake ndomba warogo kani kunggo menggam nogome, Ala unde logonet eeko menggaarak nogo, eeka'lek aret agaarik o. 14At anebunu Yekura mendek ti, nit abok nineenu o. Ndi, Muta nen, ”Peebi aap Yekura mendek ambi Ala unde logogin,” yinuk, ti yulik kwe, 15aap anebunu alik ambi Meliketerek kokwak, Ala unde logowak nduk kin agagerak ti paga, at Ala nen inanebunu Leewi mendek nogo mbo piinok, aap anebunu alik mendek mippuurak kooneegerak kogo ogoorik o.
Aap alik ambi Meliketerek kokwak Ala unde logorak wone
16Aap alik Meliketerek kokwak Ala unde logowak nduk, mippereegerak alom nogo ti, aakumi nen, ”Aap ti mendek ndarak kenok ambi Ala unde logorak o,” yinuk, wone lengganak nogo paga mippulik o. Ata, at mondok itok eenik menggerak ti paga Ala nen aret mippereegerak. 17At Ala nen at mippege kenok eeke logorak wone yoge logonet,
”Aap Meliketerek eeke nagagerak nogo kokwak, kat an neebe
unde logonet, mondok-mondok nake eeke logomunggun o,”
yinuk, yoreegerak liiru mbanak nogo ndak-ndak aret mippereegerak. 18-19Ti eereegerak paga Muta wone lengganogo yoreegerak nogo, mugurok nogo logonet, obeelom eekkolaawok nduk, eekwi iigak, omaawi eeppiiga'lek we aanom warogo eeko nogogwaarak me, ”Yogop ee'nu, ndogop ee'nu,” wone aa'nduk lengganak nogo, lek eerogo punuk, wone alik ngget mendek kin eeppereegerak me, ”Wone mugurok nogwe paga obeelom ee'naburak abet aret kagi,” yinuk, Ala owagam nagak eeko logonet, niniki luunik wonogo ogoorik o.
20-21It aa'nduk Ala unde logonet, eeko logowak nduk, mippiigo logonet, pilit mbakwi iyo, Ala endage kunogo mippiigo logolik kwe, at Ala nen at aput mippege logonet perak,
”Kat neebe unde logonet, mondok-mondok nake eeke logomunggun o, yinuk, an kogoba Ala nen aret yokkege me,
noone alik eerigin abu lek o,”
yinuk, pilit mbake kero, at endage inom kunogo mippereegerak ti paga at ninake eeke logowak nduk koonogo mippereegerak nogo, 22eeke logonet, aa'nduk eekwi yobok ari nagagi kwak, yobok yigin lek o. Ata, yogondak mondok lik togon aret eerigin mbako logowok.
23Ndi, ambi it aa'nduk Ala unde logonet eeko nogogwaarak nogo, mondok-mondok eeko logolik. Ata, ambi kangge kagak obaane'me ambi mippegak eeko nogogwaarak me, ineebe ambik aret wonogogwaarak kwe, 24Yetut perak, mondok itok menggerak me, ambi obaane'me mi'na'nuk eeke logogin abu lek o. At alik en mondok-mondok eeke logogin o. 25Togop me, nit aakumi niniki abet mba'nuk, Ala owagam nogwe niinok, ninake Ala yoriyak nduk mondok eenik mi'ndak menggerak me, ninagap ndarogo mondok obeelom agago pinaniyak op aret o.
26Nit Ala unde ninowe nggwok ninake eeke logonet, obeelom eerogo pinanuwak nduk mippuurak agagerak nogo ti, Keritut aret o. It aakumi maluk eekwi inenggela'me nege nagagerak kwe, at maluk ambi abu eeka'lek wonage mbareegi, mbogut ta'mban-mban aago kagak, irimbaga tiyarogon kwippi laganeegerak. Kwippi lagangge mbareegi, at maluk eeka'lek iniki mondok obeelom aret me, nit aakumi ninabuwa mbake logonet, ninake eeke wonage o. 27Ninake eeke logonet, it aap Leewi mendek Ala unde inoweewi nggwok nogo nen ko'lu-kii'me aakumi inake ndomba warogo Ala wogogo logonet, aa'nduk it maluk eekaatak nogo lek aruwak nduk, Ala wogogwi, ti'nuk, peebi aakumi ugun maluk eekaatak nogo lek aruwak nduk inake wogogwi, eeko menggaarak nogo kokwak, at togop eekeelik o. At Keritut perak, ”It maluk eekwi lek eerogo piyaakit nduk inake kambikit o,” yinuk, it inomaluk lek aruwak nduk Ala aanggo warogo wogogo nogogwa kwak, nit ninomaluk lek eerogo pinanikit nduk at ne ambit mondok nggaruk togon ninake kambeegerak. 28Muta wone lengganak ndak-ndak eeko logonet, it aap nggween paga mendek kagak Ala unde inowe nggwok logowak nduk, mippiigo menggaarak kwe, Ala nen at aput yoge logonet,
”Kat neebe unde logonet, mondok-mondok nake eeke logomunggun o, yinuk, an kogoba Ala nen aret yokkege me, noone alik eerigin abu lek o,”
yinuk, pilit mbakwi iyo, endage inom kunogo yoreegerak nogo ti, wone lengganogo Muta yoreegerak nogo aa'nduk kagak peebi yoreegerak me, at aput iniki mondok koleewak amburu mbanak Ala unde ninowe nggwok ninake eeke logowak nduk, mippereegerak.
Currently Selected:
IBERANI 7: WNO
Highlight
Copy
Compare
Share
Want to have your highlights saved across all your devices? Sign up or sign in
