IBERANI 5
5
1At aap Ala unde inowe nggwok nogo ti, aakumi nen Ala alut eeko logonet, yi mendek ndi mendek ake pi wagaatak nogo, Ala wogoge, ndi, maluk eekaatak nogo, inaanggo wonok wogwe iinok, inake warogo kani kumbege, eeke logowak nduk, Ala nen aakumi inenggela'me nen ambi leenogo mippegak eeke menggerak. 2At togon aap nggween paga mendek maluk eeke menggerak aret me, aakumi Ala wone liippega'lek logonet maluk eekwi iinok, inabuwa mbake logonet, yanggorogon inake eeke menggerak. 3Aakumi inake eeke logonet, at togon aap nggween paga mendek maluk eeke menggerak aret me, aanggo inom warogo Ala ake pege menggerak. 4Ndi, it iniki mba'nuk, ”An Ala unde inowe nggwok logokit o,” yinuk, miiko logolik. Ata, Ala nen aap Karun leenogo mippereegerak nogo kokwak, leenogo mippiige menggerak.
5Togop nogo ndak-ndak at Keritut nogo nen, ”An Ala unde inowe nggwok logokit o,” yinuk, tiyappatulik o. Ata, Ala nen at yoge logonet,
”Yogondak an nen aret ndakkakirak me, kat an naput aret o,” yinuk, yoge 6ndi, aap ambi nen Ala wone mbanak mbiningge logonet,
”Aap Meliketerek eeke nagagerak nogo kokwak, kat an kogoba
Ala neebe unde logonet, mondok-mondok nake eeke logomunggun o,”
yinuk, mbiningge, eereegwaarak ti paga Ala nen aret leenogo mippereegerak kogo o.
7Maan at Yetut aakumi kwak nggween paga yime nege logonet, kambuurak agabiti nen leenggu maake logonet, oone nggwok paga tamban eeke, ”Nagap ndaru o,” yinuk, Ala nggino yoge, eereegerak nogo, ogoba nen yoge kenok aruk konok mban eeke nagagerak me, aput nen tamban eereegerak nogo Ala aruk koneneegerak kwe, 8”Naput aret kwe, andi-pandi oba pemenggaarak paga an yoge nogo, E o, yinuk, yanggonak eeke logorak mamunggolaawak o,” yinuk, teppereegerak. 9Teppege mbareegi, nit ee'ninake menggerak nogo, at abu li'luk eerogo mamunggolage nagagirik, nit at oone wappunuk, eerit nogwe nogo, abok aret nineenik mondok-mondok logowak nduk, ninagap ndake logorak alom at aret agagerak me, 10Ala nen, ”Aap Meliketerek eeke nagagerak nogo kokwak Ala unde inowe nggwok kat aret o,” yinuk, mippereegerak.
Ala wone mbo pugwi iyo, liippuurak wone
11Wone yi mendek yokkiroorak ambik wonage kwe, ambinom koneniyak kineebi negen eekkinake kagarak me, liirogon mbininogo yokkiroorak meek ee'naki o, noreewi. 12Kit o maan togon Ala wone konenggo nogogutak me, muk mamuniragak mendek logorak kwe, omaawi mendek noorak, ”Nineebi o,” mba'nuk yilak amburu negen mban nunggwi me, alom wone aa'nduk konenggo nogogutak nogo mendek mban ambinom mamunggiroorak nduk eekwi kiigi o. 13It yilak amburu nunggwi nogo ti, elege-aabologwe pogom maluk eeriyak obeelom eeriyak eraambe yelok kaga'lek aret menggaarak kwe, 14omaawi mendek nunggwi iinok ti perak, aap kole iniki warak pogom, Ala wone mondok liippunuk eekwi me, maluk eeriyak obeelom eeriyak eraambe yelok aret kogo menggaarak.
Currently Selected:
IBERANI 5: WNO
Highlight
Copy
Compare
Share
Want to have your highlights saved across all your devices? Sign up or sign in
