KOLOTE 3
3
1Keritut eenik agago mippege logonet, kinom kineenik agago mippinagareegerak me, Keritut Ala eenggi abe'nggan paga kwi'ndak minggim mbogut paga eko menggaarak wone nogo mban kiniki panggombunuk, logonip o. 2-3Kit kanggo mbareegup, Ala nen kineenik agago mippinagage nagagirik, Keritut kinom iniki me kumaappinagago wonogwe me, kiniki nggween paga mendek mban panggombunuk logogup o. Ata, kiniki agi mendek paga mban panggombunuk logonip o. 4At nineenik ee'ninake menggerak Keritut nogo, wage eyom nogo paga kit kinom ndak-ndak tiyanak wonogwe kiyaagun o.
Ninobaabut maan mendek mbo punuk, ngget mendek eeppinaniyak wone
5-6Togop me, noreewi o. Kit Ala wone taganogo punuk, kumi ugun wurinabit nogwe, kiniki kumi paga mban luunik nugwi, kiniki nengge nogo mugurok nogwe, maluk eeriyak mban kinikilom mbakwi, Ala obaane'me yi mendek ndi mendek koloorak uugwe mba'nuk, tiyappugwi, eerit nogwe kiinok, Ala anini kinoba pinagarak me, ti eeriyak eekkinake nogo abok aret mondok warogo wuppogo logonip o. 7Kit aa'nduk maluk mban eerit nogo logonet, ti mendek abok aret eerit nogo nogogutak nogo mbo pereegutak kwe, 8yogondak, nanini-kanini yogwe, neebi-keebi yogwe, maluk eeppiyoorak koonggwi, miyuk-meya eerogo piigwe, wone yuurak lek mendek kagak yorogwe, eekwi nogo ti, nonggop nduk eeko ogotik? Ti mendek inom abok aret mbo pinip o. 9-10Nit niniki ngget ogobakkigika Ala nogo nen, at eeke menggerak kineenu arubagip nduk, at iniki pogom kit kiniki ngget ogobakkigirogo pinagage kagak, kit kinobaabut maan mendek paga maluk eeko nogogutak nogo, nggonenogo mbo punuk, kinobaabut ngget mendek eekkologogutak me, kit-kit aret pulit pugunggwi ti mage o. 11Nit niniki ngget ogobakkigirogo pinanemenggerak nogo paga eerit nogo logonet, ”Yi Yakuri mendek, yi Yunani mendek, yi inagabolo mbanak, yi inagabolo mbanak lek, yi aap ineenggo'lek mendek, yi aakumi nengga mendek, yi aap endage warak, yi aap endage lek o,” yinuk, togop agan nogo logorak lek o. Ata, at yi o ndi o abok aret endak warak menggerak Keritut nogo, nit abok ninowe aret me, at mban tiyappogo logowok o.
12Togop me, at Ala nen kinabuwa mbake logonet, at apuri maluk eeka'lek alik mbeenak logobagip nduk, miikkinake nagagirik, leenogo pinagareegerak me, kinobaabut ngget mendek eekkologo logonet, aakumi inabuwa mbakwi, kiniki yanggonak paga obeelom eeppiigwi, kiniki tebenak logonet nugwi, kinoone omaawi lek yanggorogon yorogwe, inoone kinoba pinagagwi iinok liippunuk yorogwe, 13yeenggwa-yeenggwa eekwi, eeko logonet, at ambi nen at ambi omaluk mari eerogo pegak eeko logonip o. Kit kinore ambi nen maluk eeppinagage kenok, kinowe endagembogut nen kit kinomaluk mondok lek eerogo pereegerak nogo ndak-ndak, kit togop aret at maluk eeppinagage nogo, mari eerogo mbo pogo logonip o. 14Yokkiragarak ti abok aret eerit nogo logonet, kit kiniki ambit lambunik ale'nggen nggwok logorak alom nogo ti, niniki-kiniki kunik aganakwi nogo aret me, ti inom aret eeko logonip o. 15Keritut kinom kunik kineebe ambit a'nuk kiniki mondok ale'nggen logobagip nduk, Ala nen kinayonggo pinagareegerak me, nit op eekwi niinok, Keritut nen niniki ugun tayenak logowak nduk, ale'nggen eeppinanege menggerak nogo, kit ndak-ndak, yi mendek ndi mendek eeriyak kiniki koonggwi kiigak, op eeriyak kenok ale'nggen eekkinake, ndi, maluk eeriyak negen kenok, kiniki aaninggin eekkinake, eeke logogin o. At togop eekkinake menggerak me, Ala mondok, ”Wa,” yogo logonip. 16Keritut ari nagagerak wone abok aret kiniki me mondok yagabit eerogo waganggo logonip o. Waganggo logomonggotik, kiniki warak a'nuk, Ala wone mamunirogwe, kiniki eyak wat-wat yogwe, ndi, Ala keyage wake logonet, ”Nogoba wa,” yinuk, Ndawut nen ndawi pereegerak inom, ki wone ndawi inom, ugun wee'lek ndawi inom, abok aret warit nogo logonip o. 17Keritut kinabuwa nen kinake eeke menggerak me, kinogoba Ala, ”Wa,” yinuk, keyage wako logonet, kinoone yogo monggotak inom, eerit nogo monggotak inom, abok aret ninowe endage tiyak yuwak nduk mban eerit nogo logonip o.
Kiniki ngget mendek eekkinake kenok, it kinom monggotak nogo kinom eeko logorak wone
18Kit kumi yi wae. Kit Ala apuri aret me, kinogonggelomini inabu'me logonet, inoone konenggo logonip o.
19Ndi, kit aap yi wae. Kinakuwi inabuwa mbako logonet, kinoone yanggorogon yorogo logonip o.
20Kit wologwe-komologwe yi wae. Kit kinowe endagembogut inikilom kinombaruwak nduk, kinagalomini-kinogobamini inoone liirogon konembunuk, eeko logonip o.
21Ndi, kit kinaagalogwe-kinapurilogwe wonogwe iinok, iniki wakkologo logonet, inogogumbuk ogwe iyo, kinoone panggok togon inaruk wakak yuurak mage o.
22Kit aakumi inayeloman monggotak kenok, kinogobamini inikilom kinombaruwak nduk, inigen wonogwe iinok mban eeriyak ti mage o. Ata, kinowe endagembogut ayuk wuko logonet, it yokkirogo menggaarak nogo abok aret, ”E o,” yinuk, kiniki abe paga inake eerit nogo logonip. 23Yi mendek ndi mendek abok aret eerit nogo logonet, ”Yi aakumi inake eekwi lek o. Yi ninowe endagembogut ake aret eeko ogoorik o,” mba'nuk, kiniki aganggen kerok togon inake eerit nogo logonip. 24-25At Ala nen aap ambi iya, ambi meek, mbakeelik nit eekwi onggo ndak-ndak wo'niraagin nineenu me, kit nen, ”Nit ninowe endagembogut ambit Keritut ake aret o,” yinuk, kinogobamini inake eekwi kenok, it maluk eekwi onggo wogorage logonet, at apuri obeelom eekwi iinok inake pipuk eerogo piyareegerak nogo, ”Nit kunduk ninom ndak-ndak wo'niraagin,” mbako logonip o.
Currently Selected:
KOLOTE 3: WNO
Highlight
Copy
Compare
Share
Want to have your highlights saved across all your devices? Sign up or sign in
