KOLOTE 2
2
1It Laworikiya mendek inom, it ando an neebe ineenggo'lek inom, kinom abok aret obeelom mban eeko logobagip nduk, aaninggin tit kagak kwe, kinake nggwiirit-nggwaarit eeke minggirak nogo, kineenu arubagip nduk, yokkiragi o. 2Kit abok kiniki ambit a'nuk, niniki-kiniki kunik eekkologo logonet, Ala wone kote kumaarak wonagagerak nogo ti, Keritut aret me, at eebe liirogon kineenu ogo logomonggotik, aap eenggi warak kenok, ko'lu mbi noorak abu eenu me, iniki tayenak minggi kwak, kit togon peebi eekkinaburak abu kineenu me, kinagabiti nen kiniki yungguppegak eeka'lek kiniki ale'nggen logobagip nduk, kinake eeke minggirak. 3Ala iniki warak nen mondok liippinaninuk, eeppinaniyak koonninake menggerak kumaarak wonage nogo, nineenu aruwak nduk, tu paake menggerak kunci nogo ti, Keritut eebe aret o.
4It aakumi inoone amburu ndik-ndik agan wogo logonet, nomonggiren tu alik paga nogwe iyo, wone yi yokkirage agarik o. 5An neebe kit ninom time wonage lek kwe, niniki perak, kinom aret logonet, kit kiniki Keritut oba panggombunuk, abet mbareegutak nogo nu'lek porogo logonet, mondok ndegen-ndegen eerit nogwe kiinok, an niniki mondok ale'nggen mbake agarik o.
Keritut ninom kunik logonet, niniki ale'nggen nggwok logorak wone
6Kit aa'nduk nen Keritut Yetut ti, ”Nit ninowe aret o,” yinuk, waganeegutak me, yogondak at kinom kunik logonet, yokkirage nogo konembunuk, mondok ndak-ndak aret eerit nogo logonip o. 7Eyo omanggen nggween me yarak nu'lek logonet, mondok muli kwit agan lagangge minggi kwak, kit togop aret Keritut paga kinomanggen yarak logonet, kiniki kole ogwe, ndi, abet mbareegutak nogo nu'lek porogo logobagip nduk mamunggirogogwaarak nogo, ndak-ndak porogo wonogwe, eekkologo logonet, kiniki mondok aganggen kekererak lagi wage logonet, Ala wa yogo logonip o.
8It aakumi ambi eeppiyoorak lek kagak we inambokan laganuwak nduk, iniki koonogo yorogo menggaarak nogo ti, Keritut wone lek o. Ti, it inombomini inom, it kugi inayuk wuko menggaarak nogo inom, inoone mamunik aret agan nugwi me, it inabu'me logonet inoone mban konenggo logobagip nduk, kit kinambokan laganggwi iyo, tum wakkologo logonip o. 9At Ala eebe itok li'luk aago menggerak nogo abok aret, Keritut oba lenggenak logonet, aap pogom aret nda'nage nagagirik, nege nagagerak. 10Ndi, kit Keritut kinom kunik wonogwe me, at Ala eebe li'luk aago menggerak nogo, kit kunduk kinoba li'luk agago pinagareegerak wonogwe me, alik ambi inom eeppinagarak mondok lek aret o. Ndi, it melaikat mendek inom, yi kugi ndi kugi inom, abok aret Keritut abu'me logonet, at oone mban aret konenggo menggaarak.
11Ndi, at kinom kunik logonet, kinagabolo mbanogo pinagareegerak negen aret ogotik o. Ti eereegerak nogo ti, it aakumi nen eekkinabulik o. Ata, aakumi inagabolo mbanogo piigo mengga kwak, kit maluk eeriyak mban eekkinake menggerak alom nogo, peebi maluk eeriyak eekkinake kero, at Keritut nen muk omaawi lek eerogo tebembereegerak me nduk, yokkiragi o. 12Keritut kinom kunik logonet, kambunuk ndoome mambiigo menggam nen kinom kineenik agago mippinagareegerak abet mba'nuk, yiime wanggo nogogutik, lagi wogogutak nogo o. Ndi, kit kambunuk ndoome mambiigo menggam negen wonogwe me, Ala nen Keritut kambunuk nogo menggam nen at omaawi paga eenik agago mippereegerak nogo, abet mbareegutak ti paga at kinom aret kineenik agago mippinagareegerak mbako logonip. 13-14Kit aa'nduk wone, ”Yogop ee'nu, ndogop ee'nu,” yugu nogo kineenggo'lek aakumi endekem kinagabolo mbanak lek mendek wonogo logonet, yi maluk ndi maluk eerit nogo nogogutak paga kambak negen aret wonogogutak kwe, Ala wone taganogo punuk, maluk eerit nogwe kiigak, Ala nen, ”Maluk onggo ndogop eeppiyaakit o,” mba'nuk eenggi lingginogo liiru mbaneegerak aaninggin kinoba wonagagerak nogo, ”Mondok mbo pikit o,” yinuk, liiru mbanak nogo Keritut inom eyo karo-karo paga nabenogo punuk, kinomaluk tigitogon lek eerogo pege nagagirik, Keritut kinom kineenik agago mippinagareegerak. 15Ti eereegerak nogo ti, it wim nambuppunuk wogo logonet, ”Nit nineegin tiyak yigi o,” yinuk, wiiraawak nduk, aakumi ineebe kugun wogoren wogo mengga kwak, at Keritut nen, ”An neegin tiyak yegerak neyaawak o,” yinuk, at Tile inom, at awuri yi kugi ndi kugi inom, abok aret inomaawi lek eerogo piinok, inenggali aruwak nduk, ineebe nggwok paga o oolo yime wogoren nege nagagerak.
16Togop me noreewi o. Kit yi mendek ndi mendek nunggwi, laago lakwi, tut ambi penengge kenok lakwi, tamban paga ambi eekwi, eekwi kiinok, it iniki ugun koombunuk, ”Ambi yi maluk kagak eekotak o,” yinuk, yokkiroorak ti abu lek o. 17Ti eekwi nogo ti, peebi abe eeppinaniyak we ogut negen eeko nogogwaarak nogo eebe muk eeppinaneegerak kagak eekwi me, tiyappugup o. Yogondak niniki ale'nggen eeppinaniyak eebe nogo ti. Keritut aret me, at mban tiyappogo logonip o. 18It aakumi nggween paga mendek mban iniki koonit nogo menggaarak nogo nen, it aap iya lek kagak iniki wogoppako logonet. ”Nabinggaanggo paga wone yo'nege menggerak me, an iya o,” yinuk, inoone omaawi paga, ”Melaikat inalut eeko logonip o,” yinuk, yokkirogwe, ndi, iniki tebenak nege mbaruwak nduk, inagabiti nggo-nggo nugwi, eerit nogwe nogo, kit liippugwi kiinok, Ala nen wokkiroorak kiniki ale'nggen mbakwi nogo, lek eerogo pakwi kiyo, inoone konenggo logogup o. 19Ninomanggen ambit paga nineenggi-niniyok yereegerak-pereegerak abok aret ninanobak inom yinik-kunik aago logonet, nineebe tawe ogo monggo kwak, nit ninanobak Keritut ninom togop aret kunik me, at Ala nen Keritut eebe kole aruwak mba'nuk, ee'ninake menggerak nogo kagak, it aakumi ti, iniki wogoppako logonet, inanobak Keritut nogo mbo punuk, inom kunik lek ugun nugwi me, inoone konenggo logogup o.
Keritut ninom kambunuk nineenik agago mippinaneegerak wone
20Kit Keritut kinom kunik logonet, kanggo mbareegup, yi kugi ndi kugi inayuk wuko logonet, inoone konenggo nogogutak nogo tebembiinok, wondet eerogo pinagareegerak kagak, nonggop nduk, it aap yi kugi ndi kugi inayuk wuko menggaarak nogo ndak-ndak eekko'net nogo ogotik? 21It aap ti'nen yogo logonet, ”Ti pekkoorak mage o. Ti noorak mage o. Ti pigoorak mage o,” yinuk, yokkirogwe nogo, nonggop nduk, ”Yi abet aret yo'nirogwe iigo o,” yinuk, inoone konenggo ogotik? 22Ti noorak mage yokkirogwe nogo ti, nit nonggo nogootik, muk lek age menggerak mendek kagak nonggop nduk yogo agaarik? It agan nugwi nogo ti, aakumi iniki koombunuk, ”Yogop ee'nu, ndogop ee'nu,” yinuk, wone mamunik aret yokkirogwe me, 23inoone omaawi paga, ”Melaikat alut eeko logonip o,” yinuk, yokkirogwe, iniki tebenak nege mbaruwak nduk, inagabiti nggo-nggo nugwi, ndi, aap yi iya inombaruwak nduk, inagabolo paga andi-pandi eerogo pakwi, eerit nugwi iinok, ”Yi iniki warak nen eekwi,” mbarumonggotak kwe, wone ti waganggwi paga kiniki nengge mugurok noorak eekkinake nogo ti, tebenogo pogo logorak eekkinabigin lek me, mugurok nogo logogup o.
Currently Selected:
KOLOTE 2: WNO
Highlight
Copy
Compare
Share
Want to have your highlights saved across all your devices? Sign up or sign in
