KOLOTE 4
4
1Ndi, kit nogobamuni wae. Kinayeloman wonogwe iinok, ”An kunduk nogoba mbogut paga wonage kagi,” mbako logonet, it kinayeloman kinake eekwi ndak-ndak kiniki obeelom paga eeppiigo logonip o.
It eeko logorak lengganinabeegerak wone
2Ko'lu-kii'me nogo lumok yega'lek tamban mban eeko logonet, Ala keyage wako logonip o. 3-4Tamban eeko logonet, an Keritut awone kote kumaarak nogo yorage nagagirak paga keele maarogo mambaneegwaarak yime logonet, nagabiti mbaka'lek paganogo yorage logorak Ala nen tu koonogo panege, ndi, yorage neegak, aakumi nen, ”Yi abet aret yo'nirage kogo,” mba'nuk waganggwi, eeppinanege logowak nduk, Timotiyut nimbirak ninake tamban eeko logonip o.
5It aakumi abet mbaka'lek mendek kinom eerit nogo logonet, ”Ala abet mbaruwak nduk, wone yoroorak nanonggwan aga o,” yinuk, kiniki mondok kwippunuk, eerit nogo logonip o. 6Yi aakumi ndi aakumi inoone yokkira wogwe iinok, onggo yorogo logonet, mbiingga ombat abe kaawak nduk, mayu eeko mengga kwak, kit togop aret kinoone ale lek inabuwa mbako logonet, yanggorogon yorogo logonip o.
Irip paga keyage wappiyareegerak wone
7At ninoreeluk Tikikut ninom niniki kunik me, ninowe endagembogut ayeloman logonet, liirogon eeke menggerak nogo nen, an yime eeke minggirak nogo, abok aret yokkira woraagin o. 8Kineenu eeppinagawak nduk kinowagam nappi woraminggirak wage logominggirik, nit abok nineebe nonggop wonogwe nogo yokkirage, ndi, kiniki eyak wappinagage, eeri woraagin o. 9At kiya wage logonet, kinawot Onetimut kunduk ninom niniki kunik me ninowe Keritut wone mondok liirogon mugurok nage menggerak nogo, imbirak nappiya woraagin me, wogo logomenggaarik, nit yime niigak eeppinanugwi nogo, abok aret yokkira wogwe iyaamunggup o.
10-11At ninoreeluk Aritarukut keele maarak nimbirak yime wonage nogo nen keyage wakkinake o. Ndi, aap ambi endage aa'nduk toonak Yetut, ndi, peebi toonak Yutut nogo kunduk, aap Mbaranabat amboko Marukut kunduk, imbirak nen keyage wakkinako o. At Marukut eereegerak yokkiragagirak nogo kagak kiya wage kenok, keyage warogo eebe waganggo logonip o. It aap mbere ti, inagabolo mbanak mendek aret kwe, Ala abu'me piyoorak wone ninom ndak-ndak eerit nogo logonet, niniki mondok alik negen eyak wappanegaarak me, yokkiragi o.
12Ndi, at kinoreeluk Epaparat inom keyage wappinagage o. At Yetut Keritut ayeloman aret me, kit abet mbareegutak nogo mondok nu'lek porogo logonet, kiniki kole ogwe, ndi, ”Ala nen nit eeriyak ninombareegerak nogo yi aret o,” yinuk, abet mbako logonet, eerit nogwe, eekwi kiyaakit nduk, abuwa warak nggo-nggo logonet kinake tamban eeke menggerak. 13It aakumi o Laworikiya mendek inom, o Kiyerapolit mendek inom, kinom eeppinagarak iniki kinoba mondok aberak wonage kage minggirak me nduk, yokkiragi o. 14Ndi, at Lukat niniki kunik Ndoter nogo inom, aap Ndemat nogo inom, imbirak nen keyage wakkinaka o.
15Ndi, ninoreewi Ala apuri o Laworikiya mendek inom, kwe Nimba inom, Ala apuri at ame kuwak eeko menggaarak nogo inom, ”Pawulut oreewi inom nen keyage wakkinako agaarik o,” yinuk, yoret o. 16Liiru mbanak yi, kit kinaa'nduk pekkogo logomonggotik, it Ala apuri o Laworikiya kuwak eeko menggaarak nogo, pekkaawak nduk, nappiya wa'nu o. Ndi, an liiru mbanogo Ala apuri Laworikiya nappiya wage logonet, ”Kit aa'nduk pekkogo logomonggotik, Ala apuri o Kolote wonogwe nogo, pekkaawak nduk nappiyaanu o,” yinuk yoragarak me, nappinagi wogwe iinok, ti inom aret pekkogo logonu o. 17Ndi, aap Arikiput nogo, yogo logonet, ”Ninowe endagembogut nen unde eeppagareegerak nogo, ndak-ndak eeke logonok nduk, liippege logot,” yo'nu o.
18Ai, noreewi o. An keele maarak yime wonage nogo, noba abeko logonip o, obak. Ndi, ninogoba Ala kinabuwa mbake logonet, kinarum aret logogin o. An kinogoba Pawulut nen, ”Kit napuri abok aret keyage wakkinaki o,” yinuk, liiru irip pagaluk ti mban neenggi paga mbanggiragi o. Napuri wa.
Currently Selected:
KOLOTE 4: WNO
Highlight
Copy
Compare
Share
Want to have your highlights saved across all your devices? Sign up or sign in
