Dzindzimo 91
91
Nungungulu wuthavelo wathu
1Muthu wule a thavelago ga Pfhumu Nungungulu
a guromo vbatshani ngudzu,
a hefemulago mutsani ga mune nya Tshivba Yatshavbo,
2a na rungudza Pfhumu Nungungulu, khuye: Uwe Nungungulu wangu,
u wuthavelo wangu, u likhokhola langu,
U Nungungulu wangu nya gu gutumbe.
3Kholu uye a na gu vbulugisa gu modwa khu lizinga
li dembidwego mbeli gwago,
ni mitungu nya dzimhango dzi vbedzago vathu.
4A na gu fenengedza a gu vhikela,
u na mana gu sayisega vbavbatshi nya dzimbapi dzaye;
gutumbega gwaye gitshangu gyago.
5U nga khali hwanga khu gu thisa nya wutshigu,
mwendro khu gighalala gi nga khwandrwa vbakari nya mihani,
6ambari khu tungu wu phalalegago gidemani,
mwendro madwali ma songago vbamihanitunu.
7Ambari gu thega bambe gwago, likhumi mazana (1.000);
mwendro gu thega likhumi magumi mazana (10.000) nyamudye gwago,
gambe uwe khu na thegedwa khu libango lolo.
8U na khedza basi khu maho yago,
u wona tsayiso wa va nya guvivba.
9Kholu khu lisine, Pfhumu Nungungulu wuthavelo wangu.
U dzi hathede wulanga ga oyu a Khusegidego ngudzu.
10Li mwalo libango li na gu gudugelelago,
ni madwali kha ma na bela ndrangani gwago.
11 # Wona gambe: Mat 4:6; Luk 4:10. Kholu Uye a na rumela dzingilozi dzaye,
dzi gu sayisa ni evbini u na belago khavbo.
12 # Wona gambe: Mat 4:6; Luk 4:11. Idzo dzi na gu phara khu mandza,
gasi ngondro wago wu si kungwi khu giwindri.
13 # Wona gambe: Luk 10:19. U na gimbila khu vbatshani nya nghala ni mamba,
u gandredzela singhalana ni dzinyoga.
14Kholu Pfhumu Nungungulu wari, khuye: “Kha nga olu a nyi golago,
Nyi na mu tshudzisa nyi mu sayisa khu lihaladzo,
kholu a ngu liti lina langu.
15A gu nyi rana, eni nyi na mu phindrula,
gusanisekani gwaye nyi na bani nyiri naye,
nyi na mu vbanyisa nyi mu ninga wuzundzo.
16Nyi na mu engedzela matshigu nya guvbanye,
nyi mu yeyedza guvbanyisa gwangu.”
Currently Selected:
Dzindzimo 91: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
