Dzindzimo 90
90
LIBHUKU NYA WUNA
(Dzindzimo 90—106)
Matshigu nya muthu ma rode ngudzu
Nombelo wa Mosi muthu wa Nungungulu
1 Pfhumu Nungungulu u khade wuthavelo wathu,
gukhugela mimela ni mimelana.
2Khu gale, sigomo na si ngari mwalo,
na wu si gu vangi litigo ni mafu,
uwe u Nungungulu kala gupindruga!
3Uwe u ngu bweledza muthu a khala nguma,
u mu embela, khuwe:
“Bwelelani mafuni enu sanana nya vathu.”
4 # Wona gambe: 1 Ped 3:8. Kholu mahoni gwago likhumi nya mazana myaga,
gukhwatshi khu litshigu la vbanova li vbindridego,
yi wonega kha nga gikhati nya gupile wutshigu.
5U ngu vbiyela vathu va vbindra mafuni kha nga ndroro,
va fanana ni mwasi wu nyugago dzimindrudzile;
6vbadzimindrutunu wu nyuga wu rumbuga,
vbasilambotunu wu wu na wu banga.
7Kholu khu lisine hi ngu vbiyedwa khu likhulo lago,
guvbenya gwago gu ngu hi vbedza tshivba.
8U vegide sighoho sathu mbeli gwago,
u ngu vega guwonegelani sighoho hi giridego gusihalani.
9Matshigu yatshavbo nya guvbanye gwathu,
ma ngu pidwa khu kotani nya likhulo lago;
myaga yathu ya gu vbindra kha nga
gu dagata nya hefemulo.
10Matshigu nya guvbanye gwathu ma gu dingana
livbandre na mavili magumi (70),
avo va gu ni tshivba va gu vbohisa livbandre na mararu magumi (80),
aholu myaga yoyo yi tade khu sigaradzo ni gu tshaniseka,
ya gu vbindra khu guvbiredza, ethu hi mwalalega.
11Khu mani a yitigo tshivba nya likhulo lago?
Khu mani a si thedwigo hwanga khu guvbenya gwago?
12Hi hevbudze gusaya matshigu nya guvbanye gwathu,
gasi myonyo yathu yi mana guti.
13 Pfhumu Nungungulu, wuya eno gwathu,
Kala lini u na hi girelago likhulo?
Pwela wuhindzi sithumi sago.
14Hi khurise khu lihaladzo lago na gu ngari dzimindru,
gasi hi fela gutsaka hi embelela
hi nengela matshigu yathu yatshavbo.
15Hi ninge gutsaka nya guningane
ni myaga yeyi hi wonidego sitshaniso.
16Yeyedza wugulu nya tshivba yago ga sithumi sago
ni sanana sathu si na wone wudhumo wago!
17Wuhigo wa Pfhumu Nungungulu wathu,
wu na fenengedze vbatshani gwathu;
hi kategisele thumo nya mandza yathu;
ina, tiyisa thumo nya mandza yathu.
Currently Selected:
Dzindzimo 90: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
