Dzindzimo 37
37
Mathomo ya muthu nya gululame ni libango la muthu nya guvivbe
Ndzimo ya Dhavhidhe.
1U nga garadzegi khu kotani nya vathu nya guvivbedwe khu myonyo,
gambe u nga gireli lidiwo vale va girago guvivba.
2Kholu, va gu fanana ni mwasi, va na dandra nyamba hwela,
kha nga mwasi nya gunyuge, va na wu na.
3Uwe tumba Pfhumu Nungungulu, gira nya sadi;
u na vbaha tigoni u vbanya khu gukhadzisega.
4Vega ga Pfhumu Nungungulu gutsaka gwago,
uye a na gu ninga gugola nya monyo wago.
5Guvbanya gwago gu vege mandzani ga Pfhumu Nungungulu
tumba uye, a na gira satshavbo.
6A na wonegisa gululama gwago kha nga wenengedzo
ni dzifanelo dzago kha nga lidambo li wenengedzago vbamihanitunu.
7Tumba Pfhumu Nungungulu u vega gwaye gitumbo gyago,
u nga garadzegi khu vale va dugelelago guvbanyani gwawe,
khu kotani nya muthu a thumisago wurena.
8Diga likhulo, u nyenya khorodza,
u nga khali likhulo u nga ghoha.
9Kholu va nya likhulo va na fuviswa,
aholu oyu a tumbago Pfhumu Nungungulu
a na fumela litigo.
10Aholu khadukhadu,
kha gu na wonega gambe muthu nya guvivbe,
u na vbweta gu wona wulanga waye u si wu mani,
11 # Wona gambe: Mat 5:5. aholu va nya gurula va na fumela litigo,
va na nengela khu gurula nya gungi.
12Muthu nya guvivbe a gu wugela oyu nya gululame,
a mu khukhurusela magwaha khu likhulo,
13aholu Pfhumu a na mu hega,
kholu a ngu wona gukhuye matshigu yaye ma vbohide.
14 # Wona gambe: Dzind 11:2; 64:3-4. Va nya guvivba va gu homola matshari, va ghwimba wulaho
gasi gu songa vale va gimbilago khu ndzila nya gululame,
ni gisiwana ni khulungu.
15Khu guralo, litshari laye li na mu paya monyo,
malaho yaye ma na fanyeledzedwa.
16Sidugwana va gu naso vathu nya gululame si na ni lisima,
guvbindra thomba nya yingi nya vathu nya guvivbedwe khu monyo.
17Kholu mawogo nya vathu nya guvivbe ma na fanywa,
aholu Pfhumu Nungungulu a na sayisa avo va lulamidego.
18 Pfhumu Nungungulu a ngu mati matshigu nya vathu nya gululame;
livelego lawe li na simama kala gupindruga.
19Kha va na khala dzitshoni matshiguni nya sigaradzo,
matshiguni nya ndzala avo va na khuriswa.
20Khu guralo, va nya guvivba va na mbemba,
ni valala va Pfhumu Nungungulu,
va na wu na nga mwasi wa panini,
va na mwalalega nga wutshi.
21Muthu nya guvivbe a gu lomba kha bweledzi;
gasi muthu nya gululame a gu pwela wuhindzi a ningela.
22Avo va kategiswago khu Pfhumu Nungungulu, va na fumela litigo,
avo va vadwago khuye va na mbemba.
23 Pfhumu Nungungulu a ngu tiyisa migondro nya muthu nya wadi
a ngu nengedziswa khu ndzila yaye;
24a gu tshunganela kha thegi,
kholu Pfhumu Nungungulu a ngu mu phara khu libogo.
25Nyi diri lidzaha, olu nyi gumbide,
aholu gima nyi si gu woni muthu nya gululame na digidwe,
mwendro livelego laye na li gu lomba silo nya guhodze.
26Matshigu yatshavbo a di pwela wusiwana vathu a va ninga,
khu guralo, livelego laye li kategide.
27Hambana ni wuvivbi u gira wuwadi,
u na simama gu vbanya kala gupindruga;
28kholu Pfhumu Nungungulu a gu gola gululama,
gima kha digi avo va khodwago gwaye;
a na va vhikela gikhati gyatshavbo,
aholu livelego nya vathu nya guvivbe li na mbembiswa.
29Va nya gululama va na fumela litigo,
va na vbanya umo kala gupindruga.
30Khu kanani ga muthu nya gululame ga gu duga magana nya guti,
ni lidimi laye la gu ganela iso si lulamidego.
31Monyoni gwaye a na ni nayo wa Nungungulu waye;
migondro yaye kha yi na dhedhereka.
32Muthu nya guvivbe a gu holelela muthu nya gululame
a zama gu mu songa.
33Aholu, Pfhumu Nungungulu kha na nga mu diga mandzani gwaye,
gambe kha mu digi a konwa vbamahungutunu.
34Tumba Pfhumu Nungungulu, u landrisa ndzila yaye;
uye a na gu khusedza a gu ninga gu fumela litigo,
u na wona gumbemba gwa va nya guvivba.
35Nyi wonide muthu nya guvivbe na tade khu gu dzi gugumugisa,
a nava gu fanana ni simbo nya gunyuge wa Libhanoni.
36Aholu avbo nyi nga vbindra wu di mwalalegide,
nyi mu vbweta, aholu gima kha nya mu mana.
37Khedzisa muthu a vbeledego u wona muthu nya gululame;
kholu muthu nya gurule a na mana vatugulu.
38Aholu sindragamilayo si na fuviswa;
ni livelego la va nya guvivba li na mbembiswa.
39Aholu guvbanya gwa va nya gululama gwa guta
khu ga Pfhumu Nungungulu,
a va ningago tshivba gikhati nya sigaradzo.
40 Pfhumu Nungungulu a ngu va phasa a va vbanyisa,
a na va vbulugisa ga va nya guvivba,
a va vbanyisa kholu va thavede gwaye.
Currently Selected:
Dzindzimo 37: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
