Dzindzimo 38
38
Nombelo wa muthu a tshanisekago
Ndzimo ya Dhavhidhe. Gasi Nungungulu a mu alakanya
1 Pfhumu Nungungulu! U nga nyi tsayisi khu likhulo lago
ambari gu nyi kawuka nu tade khu likhulo.
2Sighalala sago si nyi hekhide,
mandza yago ma ngu nyi sokhovedza.
3Gi mwalo givbango nya gyadi milini gwangu,
khu kotani nya likhulo lago,
wu mwalo womi maramboni gwangu,
khu kotani nya sighoho sangu.
4Kholu mithumo yangu nya guvivbe yi tade, yi langaladza hungo wangu;
yi ngu nyi gikha kha nga rwalo nya gulemele.
5Silondra sangu nya makhoro si fufutide si duga wusila,
khu kotani nya wuphuguphugu wangu.
6Nyi nogide ngudzu nyi gamega guvbindra pimo,
litshigu latshavbo nyi gimbila na nyi gu lila.
7Giwunu gyangu gya gu vbisa ngudzu
gu mwalo givbango nya gyadi milini gwangu;
8nyi rerekide nyi thega vbavbatshi
nyi ngu keta khu kotani nya gusaniseke nya monyo wangu.
9Pfhumu, gusuva gwangu gomo mbeli gwago,
khu hangwi khu gudilela gwangu.
10Monyo wangu wa gu ghavata ngudzu,
tshivba yangu yi ngu vbela;
wu tshimegide wenengedzo nya maho yangu.
11Dzipari ni vangana vangu va nyi digide ni sigaradzo sangu,
ni valongo vangu va gu ema khu hwindzo.
12Va ngu nyi riyela milaphwi avo va zamago gu nyi songa;
avo zamago gu nyi tshongisa,
va gu ganela guvivba,
va luga gikungo nya gukanganyise litshigu latshavbo.
13Aholu eni nya gu fanana ni givbwiri nyi sipwi,
kha nga gidudu gi si tuligo likana.
14Nyi womo kha nga muthu nya mbapwa,
oyu a gumba ninga phindrulo khu kanani gwaye.
15Khu guralo, Pfhumu Nungungulu eni nya gu tumba uwe;
khuwe u na gu ningago phindrulo, uwe
Pfhumu Nungungulu wangu.
16Kholu eni nyi di gukheni: “Va nga ghiyi kheni
ngondro wangu wa gu kwiriga.”
17Khidzo kamwe, nyi womo vbafuvbi nya guthege;
sigaradzo gikhati gyatshavbo somo mbeli gwangu.
18Nyi ngu dawulela guvivba gwangu;
nyi ngu tshaniseka khu kotani nya gighoho gyangu.
19Aholu valala vangu va ngu vbanya va na ni tshivba,
vangi va nyi zondrago nyambana nandru.
20Avo va bweledzago wuwadi khu wuvivbi,
va gu khala valala vangu, kholu eni nya gu landrisa wuwadi.
21U nga nyi digi Pfhumu,
Nungungulu wangu, u nga khali hwindzo ni eni.
22Vbiredza u ta nyi phasa
Pfhumu, muvbanyisi wangu.
Currently Selected:
Dzindzimo 38: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
