Mavingu 15
15
1Phindrulo nya gu dzi nogise, yi ngu vbodzisa
likhulo,
aholu magana nya gupaye, ma gu wusa likhulo.
2Lidimi la va nya gugengela
la gu mburisa guti,
gasi magana ya va nya guvivbedwa khu monyo,
ma gu gamba wupumbu.
3Maho ya Pfhumu Nungungulu momo malangani
yatshavbo,
a khedza va nya guvivbedwa khu monyo ni va nya gululama.
4Malito nya gutsakise, simbo nya womi,
aholu ayo nya gukhunguvanyse, ma gu vbedza
tshivba hefemulo.
5Gipumbu kha gi khathali khu sihevbudzo sa babe waye,
gasi uye a dzumelago gu kawukwa,
muthu nya mapimo.
6Ndrangani gwa muthu nya gululame,
yomo thomba nya yingi,
aholu tshatshazelo wa va nya guvivbedwa khu myonyo
khu sikhunguvanyiso.
7Khu maganani nya vathu nya gugengele, gu duga guti,
gasi myonyo nya sipumbu kha yi giri kharato.
8Phaso wa vathu nya guvivbedwe khu monyo,
manyala ga Pfhumu Nungungulu,
aholu nombelo wa vathu nya gululame,
khuwo wu mu tsakisago.
9Ndzila ya muthu nya guvivbedwe khu monyo,
manyala ga Pfhumu Nungungulu,
kholu uye a gu gola uye a gimbilago khu ndzila
nya gululame.
10A ngu tsayisa khu tshivba uye a ndreyago
ndzilani nya gululame,
ni uye a bombago gu kawukwa, a nafa.
11 Pfhumu Nungungulu a ngu wona ambari ni iso si guromo vbavbatshi phalani nya guete nya lithowo,
a nga padwa khu ginani gu wona iso si guromo
myonyoni nya vathu!
12Muhembululi kha goli wule a mu kawukago,
ambari gu hidzimela gunene ga vathu nya gugengele.
13Monyo wu tengidego, wa gu mburisa khovbe,
gasi wa gu bani wu vbisega, hefemulo wa gu vbela tshivba.
14Monyo wa muthu nya mapimo, wa guvbweta guti,
aholu khu kanani ga muthu nya gipumbu, gu duga
mapongowongo.
15Uye a guromo gutshanisekani, matshigu yatshavbo
a gu ma wona na ma vivbide,
aholu monyo wu tengidego, matshigu yatshavbo
khya buzo.
16I tshukwana gu mana sidugwana nu gu ninga githawo
Pfhumu Nungungulu,
guvbindra gu mana thomba nya yingi, nuri ni sigaradzo.
17I tshukwana gu hodza mathapha avbo li gu
romo lihaladzo,
guvbindra gu hodza nyama nya mombe nya gunone
vbakari nya mayunga.
18Muthu nya gihafane a gu wusa mayunga,
gasi uye nya gutimisele a gu avbula mayunga.
19Ndzila nya ngara ya gu fanana ni libhiyo nya miba,
gasi ndzila nya muthu nya gululame yi agide.
20Gyanana nya mapimo gya gu tsakisa nyehe waye,
gasi igyo nyambana mapimo, gya gu thela dzitshoni
mayi waye.
21Mapongowongo ma gu tsakisa sipumbu,
gasi muthu nya mapimo a gu khedza umo a hongolago.
22Avbo wu gu mwalo wusingalagadzi, makungo ma gu
bwelela hwane,
aholu avbo gu guromo madhota nya mangi,
makungo ma gu duga gwadi.
23Muthu a gu tsaka khu gu ninga phindrulo
nya yadi,
mahungu ma gu ganedwa khidzo gu vbwetegago
khidzo, ma gu tshamba ngudzu.
24Ndzila nya womi ya gu hetedza muthu nya gugengele,
gasi a si releli phalani nya vafi.
25 Pfhumu Nungungulu a ngu pfhungumula
nyumba ya va nya matshandza;
aholu a vhikela thomba ya noni.
26Makungo ya vathu nya guvivbedwe khu myonyo,
ma nyenyezide mbeli ga Pfhumu Nungungulu,
aholu Uye a gu tsakiswa khu magana nya vathu va agidego.
27Muthu nya makolo a gu thela libango ndrangani
gwaye,
gasi uye a gumba dzumela gu rengeledwa, a na vbanya.
28Muthu nya gululame a gu phela khu gu pimisa,
khavbo a ningago phindrulo,
aholu, khu kanani ga va nya guvivbedwa khu myonyo,
gu duga mapongowongo nya gutale.
29 Pfhumu Nungungulu kha hidzimeli vbafuvbi ga
va nya guvivbedwa khu monyo,
aholu a na yingisa milombelo ya va nya gululama.
30Iso si tsakedwago khu maho, sa gu tsakisa monyo,
ni mahungu nya yadi, ma gu tiyisa marambo.
31Uye a dzumelago sileletelo nya guvbanyise,
a na vbanya gumogo ni vathu nya gugengele.
32Uye a si dzumeligo gu kawukwa, a gu dzi nyenya
uye mune wurumba;
aholu uye a dzumelago gu laywa, a gu mana wugengeli.
33Guthava Pfhumu Nungungulu gihevbudzo
nya guti,
gu dzi nogisa gu gomo wuzundzo.
Currently Selected:
Mavingu 15: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
