Mavingu 16
16
1Muthu khuye a lugago makungo khu monyoni gwaye,
aholu phindrulo nya lisine ya guta khu ga Pfhumu Nungungulu.
2Satshavbo iso muthu a girago
mapimoni gwaye, a gu si wona na si agide,
aholu Pfhumu Nungungulu a gu khedza mipimiso yaye.
3Tumba Pfhumu Nungungulu ga mithumo yago yatshavbo,
gasi makungo yago ma na mana gudugelela.
4Satshavbo silo a giridego Pfhumu Nungungulu a si vegede
thumo waye,
ambari avo nya guvivbedwe khu myonyo,
va vegedwe litshigu nya mhango.
5 Pfhumu Nungungulu a ngu vengana ni va nya
matshandza, vathu vovo gima kha va na vbuluga.
6Muthu a gu ni wuhindzi ni gutumbega,
a na handzwa sighoho saye,
avo va ningago githawo Pfhumu Nungungulu,
va na duga ndzilani nya guvivbe.
7Muthu a tsakisago Pfhumu Nungungulu khu
mavbanyelo yaye,
Uye a na mu gira a vbanya khu gurula ambari
vbakari ga valala vaye.
8I tshukwana gu mana sidugwana khu ndzila
nya gululame,
guvbindra gu mana nya singi, khu wudambane.
9Khu monyoni gwaye muthu a ngu pimisa umo
a vbwetago guya umo,
aholu Pfhumu Nungungulu khuye a mu yeyedzago ndzila.
10Khu kanani ga mufumeli
gwa gu duga magana nya tshivba,
aholu a gu lamula a nga hosisi likana laye.
11Pimo ni gikalo nya gululame,
sa guta khu ga Pfhumu Nungungulu,
mipimo yatshavbo nya yadi, khuye a yi giridego.
12Kha dzini gukhuye vafumeli va thuma mithumo
nya guvivbe,
kholu wufumu wa gu tiyiswa khu gululama.
13Vafumeli va gu nengedziswa khu avo va dusago
magana nya yadi,
va tsakiswa khu avo va ganelago lisine.
14Likhulo la mufumeli la gu fanana ni mwango wu tivisago lufu,
aholu vale va gengedego va ngu kodza gu li rudzisa.
15Gutshulega nya khovbe ya mufumeli gu yeyedza
gupwani gomo guvbanya,
wa gu tsakedwa khuye, gu fanana ni lipfhi
li wisago ndzadzi nya guhegise.
16Gu mana guti guvbindra gu mana ndralama,
ni gu mana mapimo, guvbindra gu mana parata.
17Ndzila ya valulamidego khu gu duga guvivbani,
uye a vegedzago ndzila yaye, a gu sayisa
hefemulo waye.
18Matshandza ma gu rana libango,
ni gu dzi khusedza gwa gu thangela lufu.
19I tshukhwana gu dzi nogisa u vbanya gumogo ni vathu nya gurule,
guvbindra gu kabana silo nya guphangwe
ni va nya matshandza.
20Uye a yingisago gululekwa, a na dugelela,
ni uye a tumbago Pfhumu Nungungulu,
a na mana makategwa.
21Uye a gengedego a na ranwa muthu
nya mapimo,
ni magana nya gulombele ma ngu etisa guti.
22Uye a gu ni mapimo a na ni nambo nya womi,
aholu gipumbu gya gu mana tsayiso
khu wupumbu waye.
23Muthu nya mapimo a gu ganela khu wugengeli,
magana yaye ma gu tulela vathu va khodwa.
24Magana nya gutsakise ma ngu fanana
ni gipapu nya wulombe,
gi lombelago kanani gi bwelo khavbo gi tiyisa marambo.
25 # Wona gambe: Mav 14:12. Yomo ndzila muthu a yi wonago gukhwatshi
yi lulamide,
aholu khu guhegisa ya gu mu yisa lufuni.
26Muthu a thumago a gu gurumedzwa khu ndzala,
kholu likana ni girumbu khiso si mu rumago.
27Muthu nya madhadhavale a gu luga
mano nya guvivbe,
magana yaye khya guvbisa nga malavbelavbe nya nilo.
28Muthu nya guvivbedwe khu monyo, a gu wusa mayunga;
ni muthu nya milembo a gu hambanisa wupari.
29Muthu nya dzihanyi, a gu kutsedzela muakelane waye
a mu gimbidzisa khu ndzila nyamba yadi.
30Uye a runyago a gu alakanyela guvivba,
a gu hodza gihofu, vbedzide makungo yaye.
31Ndzudzu nya dzinvi gihugu nya wudhumo,
wu manwago khu mavbanyelo nya gululame.
32Uye a hwelago gu goroga, a ngu vbindra ndrena,
ni muthu a kodzago gutimisela a guvbindra uye
a phangago lidhoropa.
33Vathu va ngu kodza gu wudzisa khu gulola dzisolo,
aholu uye a ningago phindrulo khu Pfhumu
Nungungulu ekha.
Currently Selected:
Mavingu 16: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
