Mavingu 11
11
Tshatshazelo wa valulamidego ni tsayiso wa sighohi
1Gikalo nya wudambane manyala ga Pfhumu Nungungulu,
aholu Uye a gu nengela khu pimo nya lisine.
2Avbo gu guromo matshandza, dzomo gambe dzitshoni,
aholu ga avo va dzi nogisago,
gomo guti.
3Gutumbega ga valulamidego gu na va hetedza,
aholu manyala ya sighohi, ma gu va mbembisa.
4Dzithomba kha dzi gu phasi khu litshigu nya likhulo
la Nungungulu,
aholu gululama gu ngu guvbulugisa lufuni.
5Gululama gwa muthu a tumbegidego,
gu na lulamisela ndzila yaye,
aholu gighohi gi na thega khu sighoho saye.
6Vathu nya gululame va gu vbanyiswa
khu mithumo yawe nya gululame,
aholu vakanganyisi va na modwa khu manavelo yawe.
7A gufa muthu nya guvivbedwe khu monyo,
gya gu vbela gitumbo gyaye;
ni satshavbo a nga bani na gu si lirela,
sa gu luza.
8Muthu nya gululame a ngu duswa vbadzimhangotunu,
wulangani gwaye gu yiswa gighohi.
9Muthu nyambasi wadi,
a gu songa muakelane waye khu likana laye,
aholu avo va lulamidego va na vbanyiswa
khu wugengeli.
10Va gu andra vathu nya gululame,
lidhoropa la gu nengela,
gasi a gufa muthu nya guvivbedwe khu monyo,
gumanega mikulungwane.
11Khu makategwa ya va nya gululama,
lidhoropa la gu khusedzwa,
aholu malito ya va nya guvivbedwa khu myonyo,
ma ngu li mbembisa.
12Uye a nyenyago muthu kwawe gipumbu,
aholu uye a gengedego a gu degula saye.
13Muthu nya mapongowongo a gu tugudzisa misihalo,
aholu uye nya gutumbege, a gu siha misihalo.
14Khu gu hamugega muthangeli nya mapimo
litigo guthega,
aholu gwa gu tala madhota, li na vbanyiswa.
15Uye a dzumelago gu khala fakazi nandruni wa muthu
nyamba muti, a na dzi laya,
aholu uye a emago hwindzo naso, a na khala gurulani.
16Nyamayi nya ndruda, a gu mana wuzundzo,
aholu vama nya mithumo, va gu mana dzithomba.
17Muthu nya wadi a gu nengedzisa hefemulo waye,
aholu uye nyambasi wadi, a gu pwisa wuvi mili waye.
18Muthu nyambasi wadi, a gu hakha tshatshazelo
nya wudambane, Aholu uye a yalago gululama, a na mana
tshatshazelo nya wadi.
19Avo va tiyidego gululamani, va gu mana guvbanya,
aholu vale va gimbilago ndzilani nya guwegele,
va gu dzi vangela lufu.
20 Pfhumu Nungungulu a gu nyenya va nya myonyo
yi vivbidego,
aholu a ngu nengedziswa khavo va gimbilago
khu ndzila nya gululame.
21Muthu nya guvivbedwe khu monyo,
gima kha na vbuluga gu mana tsayiso,
aholu livelego la va nya gululama, li na vbuluga.
22Nyamayi nya wumburi nari mwalo mapimo,
a gu fanana ni lisindra nya ndralama
thonvuni nya khumba.
23Gitumbo gya va nya gululama gya gu hegisa
khu matsenya,
aholu gya va nya guvivbedwa khu monyo,
gya gu hegisa khu tshanisa.
24Muthu a ningago khu wuhindzi nya wungi,
a gu wona thomba yaye na yi gu engedzelana,
aholu uye a girago ligungo guvbindra muthu nya gululame,
a na vbeledwa khiso.
25Hefemulo wa muthu nya wuhindzi
wu na hodza wu eneledwa,
ni wule a thawuludzago libogo a ningela,
uye nuye a na ningwa.
26Vathu va gu vala wule a sihago tirigu
a bomba gu rengisela vathu,
aholu makategwa ma guta vbatshani ga wule
a yi manago, a va rengisela nyamba hwela.
27Uye a dzi garadzago khu gu vbweta wuwadi,
a na tsakedwa khu vathu,
aholu uye a tsakelago guvivba, a na
tshaniswa khugo.
28Uye a tumbago thomba yaye a na theswa khiyo,
aholu avo valulamidego va na nyuga kha nga simbo
wu thelago nyenvu.
29Uye a thelago ghudzeghudze ndrangani gwaye,
a gu dzi girela gingulu;
ni gipumbu gi na khala githumi gya va nya gugengela.
30Handro wa muthu nya gululame,
simbo wu ningago womi,
muthu a dwanelago mihefemulo,
muthu nya guti.
31Muthu nya gululame a na mana tshatshazelo
waye mafuni momo;
ahati va nya guvivbedwa khu monyo ni sighohi
va na gira kharini?
Currently Selected:
Mavingu 11: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
