Mavingu 10
10
II. Mavingu ya Solomoni
(Mavingu 10:1—22:16)
1Gyanana nya guti, gya gu tsakisa babe wagyo,
aholu igyo nya gipumbu gya gu swihadza
mayi waye.
2Thomba nya gu yi mane khu wudambane,
kha yi phasi gilo,
aholu, gululama gu ngu vbulugisa muthu lufuni.
3 Pfhumu Nungungulu kha digi hefemulo wa muthu nya gululame wupwa ndzala,
aholu a ngu thindregisa misuwo ya
va nya guvivbedwa khu monyo.
4Uye a gu ni mandza nya wugara
a na khala gisiwana,
aholu mandza ya wule a thumago,
ma gu mu resela gufuma.
5Uye a vbwerago vbamarongatunu,
gyanana nya gugengele,
aholu uye a lalago vbaguvbweratunu,
gyanana gi thelago dzitshoni.
6Makategwa ma gu thegela vbatshani ga va nya gululama,
aholu kanani ga muthu nya guvivbedwe khu monyo,
gwa gufundra dzihanyi.
7Mapimo ma tshidwego khu muthu nya gululame,
ma gu resa gikategiso,
aholu lina la muthu nya guvivbedwe khu monyo,
la gu vbiredza gufuva,
8Muthu a gu ni monyo nya guti,
a gu yingisa milayo,
aholu uye nya mapongowongo, a gu thegela
gumbembani.
9Uye a lulamidego a gu gimbila na tiyide,
aholu uye a gimbilago khu dzindzila nya guwegele,
a na tugudwa.
10Uye a runyago khu liso, a gu pwisa wuvi,
aholu uye a ganelago mapongowongo,
ma gu mu yisa gumbembani.
11Likana la muthu nya gululame, nambo nya womi,
aholu eli la muthu nya guvivbedwe khu monyo, la
gu siha wughevenga.
12 # Wona gambe: Jak 5:20. Livengo la gu wusa mayunga,
aholu lihaladzo la gu siha sighoho satshavbo.
13Guti, gomo kanani ga avo va gengedego,
aholu lipitso, la gu kwamula hwambo
wa vathu nya sipumbo.
14Vathu nya gugengele va gu siha guti gwawe,
aholu khu kanani ga muthu nya gipumbu, gu duga gumbembisa.
15Thomba likhokhola la va nya gughanya,
aholu wumbwa gumbembiswa nya sisiwana.
16Tshatshazelo wa muthu nya gululame wa gu mu
resela guvbanya,
aholu gughanya ga muthu nya guvivbedwe khu monyo,
wa gu mu resela tsayiso.
17Uye a dzumelago gu kawukwa,
a gu bela khu ndzila nya guvbanyise,
aholu uye a bombago gu kawukwa,
a gu ndreya ndzilani, a ghoha.
18Uye a sihago livengo
a na ni likana nya wudambane,
ni wule a lembago vakwawe, gipumbu.
19Muthu nya guganele ngudzu, kha vhiki gighoho,
aholu uye a vegedzago likana laye, muthu
nya mapimo.
20Lidimi la muthu nya gululame, parata yi hutidwego,
aholu monyo wa muthu nya guvivbedwe khu monyo,
kha wuphasi gilo.
21Magana ma dugago khu kanani ga muthu nya gululame,
ma ngu hodzisa vathu nya vangi,
aholu sipumbu sa gufa khu gumbana mapimo.
22Gikategiso gya Pfhumu Nungungulu
gya gu resa gufuma,
gambe gu dzi garadza gwathu kha gu engedzeli gilo avbo.
23Gipumbu gya gu gira silo nya guvivbe khwatshi
guhagana,
aholu muthu nya gutale khu mapimo,
a gu vbweta guti.
24Muthu nya guvivbedwe khu monyo a na
thegela ga igyo a gi thavago,
aholu muthu nya gululame,
Nungungulu a na mu ninga iso a si vbwetago.
25Va nya guvivbedwa khu monyo va guvbindra
kha nga gipupwane,
aholu muthu nya gululame, a na simama a tiya kala gupindruga.
26Kha nga ginageri gi tsavelago
magwahani,
ni wutshi wu vbandzago mahoni,
kharato nuye muthu nya wugara, ga vale va mu rumago.
27Githawo ga Pfhumu Nungungulu, gi ngu engedzela
matshigu nya guvbanye,
aholu matshigu ya sighohi, ma na vbungudwa.
28Gitumbo gya vathu va lulamidego gya gu hegisa khu litsako,
aholu gya va nya guvivbedwa khu monyo, khu gumbemba.
29Ndzila ya Pfhumu Nungungulu, likhokhola la
va nya gululama,
aholu gumbembiswa ga vale va girago guvivba.
30Muthu nya gululame gima kha na kutsungwa khu gilo,
aholu avo nya guvivbedwe khu monyo,
kha va na khala mafuni momu.
31Khu kanani ga muthu nya mapimo, gu duga wugengeli,
aholu lidimi nya gipumbu li na pidwa.
32Khu maganani ga vathu va lulamidego gu duga lisine,
aholu, khumo sighohi gu duga wudambane.
Currently Selected:
Mavingu 10: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
