Isaya 11
11
Mufumo nya gurule nya lithungedwa la Jese
(Joba 4:9; Varoma 15:12; 1 Vatesalonika 2:8; Gutuledwa 2:16)
1 # Wona gambe: Gutu 5:5; 22:16. Khu tshinani ga Jese, gu na thunga litamo,
khu mikhambani gwaye, gu na buga pfhundre.
2Liphuvbo la Pfhumu Nungungulu,
li na mbaka vbatshani gwaye,
a gu Liphuvbo nya guti ni mapimo, Liphuvbo nya
wusingalagadzi ni tshivba,
Liphuvbo nya wugengeli ni githawo ga Pfhumu Nungungulu.
3A na nengela khu guthava Pfhumu Nungungulu;
kha na lamula gukhedza khu khovbe nya muthu,
mwendro gu kona gukhedza khu gu pwa ndzeve;
4 # Wona gambe: 2 Tes 2:8. aholu, a na lamula sisiwana khu nayo, a pila mahungu
ya va nya gu dzi nogisa va tigoni khu gululama;
a na veta litigo khu lipitso nya magana yaye,
khu furugedzo wa kanani gwaye, a na songa va nya guvivba.
5 # Wona gambe: Efes 6:14. Gululama gu na bani guri gutiya gwaye,
gutumbega gu na bani guri libhandri la giwununi gwaye.
6Lisolwa li na vbanya dangamwedo ni nvuta,
ni likhamba, li na lala dangamwedo ni phongo;
gimombyana, ni ginghalana, ni ginvutana,
si na gimbila gumogo,
si na ghudwa khu gyanana nya gidugwana.
7Mombe nya ngadzi yi na hava mwasi gumogo ni gikankanka,
sanana sawe, si na lala dangamwedo;
nghala yi na hodza mwasi gu fanana ni mombe.
8Gyanana gya beleni, gi na haganela phalani nya nvuwumati,
ni gyanana gi ngari gu lumudwago, gi na bedza mandza phalani
nya mamba.
9 # Wona gambe: Hebh 2:14; Isa 65:25. Malangani yatshavbo ya gigomoni gwangu nya gukatege,
kha gu na manega guvivba mwendro gusongana,
kholu litigo latshavbo li na tala khu guti gwa Pfhumu Nungungulu,
kha nga mati ma tadzago yiphwa.#11:9 Dzindrimana dzedzi gukhugela 1 kala 9 nya gipimo 11 dza gu ganela khu mahungu nya gurule ga Mudzegisi (Mesiya) gutshanganisago vathu ni sirengo khu kotani nya Liphuvbo la Liphuvbo la Pfhumu li na fumago mafuni khu libogo la lithungedwa la Jese. Jese khu babe wa Dhavhidhe. Nyapandre nya nyumba ya Dhavhidhe. Khavbo gwaye gu na duga lithungedwa nya liphya a gu Jesu Kristo Muvbanyisi nya litigo. Wona Luk 1:32-33; 24:21-24; Mith 1:6-8.
10 # Wona gambe: Rom 15:12. Ga litshigu lolo, va nya mayigo va na tutumela ga khamba wa Jese
wu vegidwego kha nga ngavbya nya mayigo yatshavbo;
ni wulanga a khalago avbo wu na zundzega.
Wudhumo wuphya wa Israyeli
11Ga litshigu lolo, Pfhumu a na simama gu khusedza mandza yaye, gasi gu dzegisa vathu vaye, vale va tshadego tigoni ga Asiriya, Egipito, Patrosi, Etiyopiya, Elamo, Sinari, Hamati gumogo ni sidwa sa phwani.
12A na khusedza ngavbya vbakari nya mayigo,
a tombanisa avo va nga vbagedwago va Israyeli,
a wuyisela avo va nga phalalegago va Judha, gukhugela
dzikhonani dzatshavbo dza dzina nya litigo.
13Khu guralo, a na vbedza lidiwo la Efrayimi,
valala va Judha, va na mbembiswa;
Efrayimi kha na girela gambe lidiwo Judha,
ambari Judha nuye, kha na tshanisa Efrayimi.
14Mayigo ya mavili ma na wugela Vafilisitiya va Muhwadambo;
ma na hongola gumogo ma ya phanga vathu va Khugadambo;
ma na dwanisa Vaedhomi ni Vamowabhi,
sanana sa Amoni si na khala sithumi sawe.
15 # Wona gambe: Gutu 16:12. Pfhumu Nungungulu a na bangisa nondrwa nya yiphwa ya Egipito,
a na khusedza mandza yaye a dwanisa tsongo wa Ewufrate,
khu furugedzo waye nya tshivba, wu na kabaniswa khu livbandre na sivili sitsongwana
si na tsemakanywago khu migondro.
16 # Wona gambe: Eks 14:21-22. Gu na manega ndzila nya yikhongolo ya vathu vaye va tshadego,
vale va vbulugidego ga Asiriya, kha nga idzo gu giregidego khidzo
ga va na Israyeli gudugani gwawe khu tigoni ga Egipito.
Currently Selected:
Isaya 11: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
