Isaya 10
10
Avo va tshanisago sisiwana va na tsayiswa
1Libango ga vale va emisago milayo nyambasi yadi,
avo va lovago milayo nya gutshanise,
2gasi gu tsulupetela dzifanelo nya sisiwana,
va bela sisiwana sa tigoni gwangu,
gasi dzinoni dzi khala pfimba wawe,
va phanga avo va fedwego khu vavelegi!
3Mu na khenu ginani khu litshigu nya tsayiso,
gingulu gi ngu guta khu hwindzo?
Mu na thavela ga mani gasi guya lomba guphaswa?
Dzithomba dzanu mu na dzi vega hayi?
4 # Wona gambe: Isa 5:25; 9:12,17,21. Gi mwalo gambe gi mi tshaledego gu gira,
vbavbandze nya gu dzi pateni ni sibotshwa,
ni gu thega, mu patana ni sirumbi,
ambari khu kharato, likhulo laye kha la bosa gilo,
ni libogo laye li nga gu simama guthawuluga.
Giprofeto mayelano khu Asiriya
5Libango ga Asiriya, lipitso nya likhulo langu!
Kholu likhulo langu, la gu fanana ni ndronga mandzani gwaye!
6Nyi ngu mu ruma guya dwana ni litigo li vivbedwego khu monyo,
nyi mu leletede guya wugela vathu nyi gorogidego khavo,
nyi mu ningide nayo nya guya va phanga ni gu wandra silo sawe,
ni gu va gandredzela kha nga maraga ya mudzindzilani.
7Aholu, Vaasiriya khandriso va nga si
pimisago khu myonyoni gwawe,
avo va di alakanya gu mbembisa,
ni gu sasela mayigo nya gutale.
8Kholu uye a di wudzisa, khuye:
“Ina vafumeli vatshavbo khandri dzindruna dzangu, gani?
9Gasi kha sa girega idzosaye ga Kalino#10:9 Kalino, lidhoropa li vbahidwego phuvbo ga wuronga nya litigo la Asiriya, pfhuka nya gipimo nya 25 km vbafuvbi ni lidhoropa la Alepo.
ni Karikemisi, gani?
Hamati kha giri kha nga Aripadhe, gani?
Ni Samariya kha giri kha nga Dhamasiko, gani?
10Kha nga olu mufumo wangu wu dzegidego mifumo
yi khozelago vanungungulu nya sifananiso,
ambari ulo siemo nya sifananiso sawe nya guvatwe,
si nga bani siri sadi guvbindra
sa Jerusalema ni Samariya.
11Ina ka, kha nga nyi giridego ga Samariya ni sifananiso saye,
kha nyi na dzi kodza gu gira idzosaye ga Jerusalema ni sifananiso saye, gani?”
12Khu guralo, Pfhumu Nungungulu, avbo a na vbedzago thumo waye
gigomoni ga Siyoni ni Jerusalema,
a na tsayisa matshandza ni gu dzi khusedza ga mufumeli wa Asiriya;
13“kholu mufumeli a di ganela, khuye:
Nyi giride isoso khu tshivba nya mandza yangu,
ni wugengeli wangu, kholu nyi na ni mapimo.
Nyi dusede mivbingano nya mayigo,
bwelo khavbo nyi wandra dzithomba dzawe,
nyi theside vatshavbo va nga bani va khala sikhaloni nya wufumu,
khu wurena wangu.
14Nyi dzegide khu mandza yangu dzithomba dza va nya mayigo;
kha nga muthu a thumbago gihaga nya sinyoni;
nyi dzegide litigo rumba kha nga muthu a rolago mandra ma digidwego,
mwalo a thawuludzidego mambapi mwendro gu tula likana, ambari gu keta.”
15Ina gibhewula gi ngu kodza gu dzi zundza ga uye a kokago khigyo, gani?
Mwendro saroti yi ngu dzi wona na yiri ni tshivba guvbindra
oyu a yi thumisago, gani?
Isoso si di hadza gu gira gu lipitso li kutsunga libogo
la wule a gu ni tshivba gu li vbindra,
mwendro gighomba gi khusa wule a gi pharago!
16Khu guralo, Pfhumu Nungungulu nya Tshivba Yatshavbo,
a na rumela tungu ga vathu,
wu ta wondrisa sitetema satshavbo sa Asiriya;
vbavbatshi nya thomba yawe wu na dzura nilo,
kha nga uye a vbiswago khu nilo.
17Kholu Wenengedzo wa Israyeli wu na vbindrugedza wu khala nilo,
ni Uye a Agidego waye, a na khala kha nga lilavbelavbe,
li na vbisago li dagaredzisa miba ni sirangalabwa sa Asiriya khu litshigu limwedo basi.
18A na mbembisa gambe wumburi nya likhabi laye ni wa thembweni gwaye,
wu vbela hefemulo ni givili;
gu na gira kha nga mudwali afago khu guvbela tshivba.
19Gu na tshala basi misimbo yidugwana khabini gwaye,
avbo nya gu, ambari gyanana nya gidugwana gi na kodza
gu lova tengo waye.
Mitshaledwa ya Israyeli
20Khu litshigu lolo, mitshaledwa ya Israyeli,#10:20 Mitshaledwa ya Israyeli, Mahungu nya gupwani mitshaledwa ma ngu wuyeledwa ngudzu umo nya libhuku la muprofeti Isaia. Wona 1:9; 6;13; 16;14; 17:3; 21:17; 28:5 Mitshaledwa ya Israyeli gu thudwa vale va simamago guvbanya guagani Jehovha, va landrisago khu gutumbega gidzumeledzwano ni sileletelo sa oyu a Agidego wa Israyeli.
ni avo va vbulugidego va nyumbani ga Jakobe,
gima kha va na namarela gambe ga wule a va bayisidego,
aholu, va na namarela ga Pfhumu Nungungulu,
nya Guage wa Israyeli.
21Vale va tshadego nya lihundzu la Jakobe
va na vbindrugedza vata ga Nungungulu nya tshivba.
22Kholu, ambari vathu vago, uwe Israyeli,
va tadego gu fanana ni fungu wa phwani,
gu na wuya basi mitshaledwa yidugwana yi na vbindrugedzago mavbanyelo;
kholu gumbembiswa gwawe gu tiyisidwe,
gu tade khu gululama.
23 # Wona gambe: Rom 9:27. Kholu Mune, Pfhumu Nungungulu nya Tshivba Yatshavbo,
khuye a tiyisidego gumbembiswa gwa tigoni momu gwatshavbo.
Gutshudwa ga Vaasiriya
(Ekisodha 7:19)
24Kholu Mune, Pfhumu Nungungulu nya Tshivba Yatshavbo a ngu ganela kharati, khuye:
“Enu vathu vangu, mu vbahidego gigomoni ga Siyoni,
mu nga thedwi hwanga khu Vaasiriya,
ambari va gu mi veta khu lipitso, ni gu khusedza ndronga yawe
kha nga idzo va mi giridego Vagipiti.
25Kholu ndrani nya gikhati gidugwana yi na wuga khorodza ni likhulo langu,
gasi nyi va pfhungumula.”
26Kholu, Pfhumu Nungungulu nya Tshivba Yatshavbo
a na khusedza gisephu gyaye vbatshani gwawe,
a va veta kha nga edzi a vetidego khidzo Vamedhiyani vbagiwindritunu ga Horebhi;
a na khusa ndronga yaye a veta yiphwa,
kha nga edzi a giredego Vagipiti.
27Khu litshigu lolo, wu na duswa rwalo wu lemelago magatani gwago,
ni kanga wu lemelago thamoni gwago,
kanga wu na fanyeledzedwago khu kotani nya olu nyi gu
todzidego khu mafura.
28Valala va vbohide dhoropani ga Ayati,
va tsemakanya khu tigoni ga Migoroni;
vaya rula sombo sawe dhoropani ga Makimasi.
29Va ngu vbindra ndzila ya releloni nya gigomo,
vaya ghova Gebha,
lidhoropa la Rama li ngu ndrendremela khu hwanga,
ni Gibheya, lidhoropa la Sawule, li ngu duga li tutuma.
30Laledza khu tshivba ni tshivba uwe nyamahegyane wa Galimi,
dzi wonele uwe Layisi! Oh, Gisiwana wewe, Anatoti!
31Madimena a ngu phalalega;
vavbanyi va Gebhini va ngu thava gasi gu dzi vbanyisa.
32Khu litshigu lolo kamwe, Asiriya a na vboha Nobhi;
a yeyedza gibhakela ga nyamahegyane wa gigomoni ga Siyoni,
ni ga gigomwana gya Jerusalema.
33Aholu, wona nya gukhuwe Pfhumu Nungungulu
nya Tshivba Yatshavbo,
a na pila matamo khu gigaha,
misimbo ya sigomoni yi na siguledwa,
matamo nya gulaphe, ma na vbadzuledwa.
34 # Wona gambe: Isa 14:24-27; Nah 1:1-3,19; Sof 2:13-15. A na hagata khu libhewula likhabi nya gukhume,
Libhanoni a na thegela mandzani ga moyo nya tshivba.
Currently Selected:
Isaya 10: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
