Dhewuteronome 7
7
Milayo yi gimbilelanago ni gumba tumbega
(Ekisodha 34:10-17)
1 # Wona gambe Mith 13:19. Gikhati Pfhumu Nungungulu wago a na gu vbohisago ga litigo uyago umo gasi guya li fumela, avbo a na gu bani a tutumiside mbeli gwago, a va yisa hwindzo, vathu nya mafumbu nya gutale: Vahiti, Vagerazi, Vaamori, Vakhanani, Vaferezi, Vahevhi ni Vajebhuzi, livbandre na mavili mayigo ma gu na ni vathu nya vangi ni tshivba guvbindra uwe; 2avbo Pfhumu Nungungulu wago, a na va ningelago mandzani gwago u va khozisa, u na va mbembisela muphelo. U nga giri navo pwanano, ambari gu va pwela gisiro. 3U nga dzegani ni vathu nya mayigo yoyo; u nga lowodzisi sanana sago nya sagadzyana ambari gu lowodza vanyamahegyane vawe ga sanana sago nya sikhwathana; 4kholu avo va ngata ndreyisa ndzilani gwangu sanana sago, siya khozela vambe vanungungulu. Wa gu gira isoso, mu na wugedwa khu likhulo la Pfhumu Nungungulu, mu dzegela gumbembiswa khu guvbiredza. 5#Wona gambe Dhet 12:3. Vathu vovo, mu fanede gu va gira esi: Mu na khungumula siluvelo sawe, mu pandrelela ni siwindri nya wukhozeli, mu kokelela madingo yawe ni guvbisa sithombe sawe nya guvatwe. 6#Wona gambe Eks 19:5; Dhet 4:20; 14:2; 26:18; Tit 2:14; 1 Ped 2:9. Kholu enu mu vathu va agisedwego Pfhumu Nungungulu wago. Pfhumu Nungungulu wago, a mi hathide gasi mu khala vathu vaye, vbakari nya mafumbu yatshavbo ma guromo mafuni.
7 Pfhumu Nungungulu a mi gode, khandri a di mi hatha khu gu mi wona muri vangi guvbindra mambe mafumbu ya mafuni, kholu enu mu diri vadugwana ga mafumbu yatshavbo. 8Aholu Pfhumu Nungungulu a di gira esi khu gu mi gola, ni gu vbweta gu tadzisa gisambanyo a giridego ni vababe vanu, Pfhumu Nungungulu a mi dusideni khu libogo nya tshivba, a gu mi tshudzisa nyumbani nya wugumbi, mandzani ga Faro, mufumeli wa Egipito. 9Khala nu gu dziti nya gukhuwe Pfhumu Nungungulu wago, Nungungulu nya gutumbege, a vegedzago gidzumeledzwano ni gu girela wuhindzi kala gitugulwana nya likhumi mazana (1.000), ga vale va mu golago ni gu landrisa milayo yaye; 10#Wona gambe Eks 20:5-6; 34:6-7; Mit 14:18; Dhet 5:9-10. aholu, a gu bweledzela vale va mu vengago, khu gu va tsayisa a va mbembisa; avo va mu vengago, kha hweli gu va bweledzela. 11Khu guralo, vegisa sirumo, sileletelo ni milayo, esi muhuno nyi gu rumago gu si landrisa.
Sikategiso si girwago khu guyingisa
(Levhi 26:3-13; Dhewuteronome 28:1-14)
12Khu guralo, wa gu yingisa milayo yeyi, u yi vegedza ni gu yi landrisa, Pfhumu Nungungulu wago, a na sayisa gidzumeledzwano ni wuhindzi a tumbisidego khu gusambanya ga vababe vago. 13Uye a na gu gola ni gu gu kategisa, a na gira melego wago wu andra; gambe a na kategisa sanana sago, ni mihandro ya tigoni gwago, dzimbewu dzago gumogo ni vbinyu yago; mafura yago, gumogo ni guvelegelana nya mitshambi yago nya dzimombe ni ya dzinvuta dzago, ga litigo eli, Pfhumu Nungungulu, khu gusambanya ga vababe vago a tumbisidego gu gu ninga. 14U na bani u kategide ngudzu guvbindra mayigo yatshavbo; kha gu na manega vbakari gwago mwama mwendro nyamayi nya gifule, ambari vbakari nya sifuyo sago. 15Pfhumu Nungungulu a na dusa gwago mabango yatshavbo; khu na nga bayiswa khu madwali ni mitungu nya guthise nya nga yile ya tigoni ga Vagipiti, u yitidego gwadi; gambe a na tsayisa khiyo vatshavbo vale va gu zondrago. 16#Wona gambe Dhet 11:13-17. U na mbembisa vathu vatshavbo avo Pfhumu Nungungulu wago, a na gu ningago; maho yago kha ma na va pwela wusiwana, gambe khu na khozela vanungungulu vawe, kholu isoso si nga tshukha si khala milaphwi gwago.
17Wa gu ganela khu monyoni gwago, khuwe: Vathu nya mayigo yaya vangi ngudzu gu nyi vbindra; nyi na dzi kodza kharini gu va pala, nyi va tutumisa? 18U nga va thavi. Dundruga esi Pfhumu Nungungulu wago, a giridego ga Faro gumogo ni Vagipiti vatshavbo: 19Siwonegiso nya sikhongolo u si wonidego khu maho yago, ni siyeyedzo, siliwugiso, mandza nya tshivba ni libogo li khusedzidwego, esi Pfhumu Nungungulu wago, a gu dusidego khiso. A na gira kharato Pfhumu Nungungulu wago, ga vathu vatshavbo, avo u va thavago. 20Gu diga nya isoso, Pfhumu Nungungulu wago, a na rumela vbakari gwawe dzimifi, kala va mbemba vatshavbo, ni vale va nga bani va tshade, va nga gu sihalelago. 21U nga khali hwanga mbeli gwawe, kholu Pfhumu Nungungulu wago, a gu Nungungulu nya khongolo ni guthavisega, womo vbakari gwago. 22Pfhumu Nungungulu wago, a na ndreyisa hwindzo vbadugwana vbadugwana, mayigo yaya, mbeli gwago; khu na va mbembisa vatshavbo va vbela khu gumogo, kholu sirengo sa khabini si nga velegelana si gu wugela. 23Aholu Pfhumu Nungungulu wago, a na va ningela mandzani gwago, a na wusa pfilupfilu nya yikhongolo vbakari gwawe, kala va gumbembiswa. 24A na ningela gambe mandzani gwago vafumeli vawe, gasi uwe u fuvise malina yawe mafuni; mwalo ni moyo a na tiyago gu ema mbeli gwago, kala u va mbembisa. 25U na vbisa khu nilo sifananiso nya guvatwe nya vanungungulu vawe; parata gumogo ni ndralama yi guromo gwawe, u nga yi dogoreli, gambe u nga yi dzegi, gasi u si thegeli naphwini; kholu si nyenyezide ga Pfhumu Nungungulu wago. 26“Khu guralo, u nga bedzi gilo nya gunyenyeze nyumbani gwago, gasi u si vadwi kha nga igyo; satshavbo u fanede gu si nyenya, kholu si vadwe.”
Currently Selected:
Dhewuteronome 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
