Dhewuteronome 6
6
Mahegiso nya nayo khu guyingisa
1Esi khu sirumo ni milayo ni sileletelo esi Pfhumu Nungungulu wago, a nyi rumidego gu mi hevbudza, gasi muya si landrisa ga litigo mu na li dzegago gasi li khala thomba yanu. 2Khu guralo, u fanede gu thava Pfhumu Nungungulu wago, u vegedza milayo yaye yatshavbo ni sirumo nyi gu leletelago, uwe gumogo ni sanana sago ni situgulwana sago, matshigu yatshavbo nya guvbanye gwago; gasi matshigu yago ma engedzedwa. 3Yingisa, olu, uwe Israyeli, dzi vegisele gu si landrisa, gasi sigiro sago si gu dugele gwadi, u velegelana ngudzu tigoni gu gogago mahwe ni wulombe, kha nga a gu embedego Pfhumu Nungungulu wa vababe vago.
4 # Wona gambe Mark 12:29. Upwa, Israyeli! Pfhumu Nungungulu wathu, khuye basi a gu Pfhumu. 5#Wona gambe: Mat 22:37; Mark 12:30; Luk 10:27. U na haladza Pfhumu Nungungulu wago, khu monyo wago watshavbo, ni hefemulo wago watshavbo, ni tshivba yago yatshavbo. 6Milayo yeyi nyi gu ningago muhuno, u na yi vegisa monyoni gwago; 7u na yi hevbudza ga sanana sago, u na ganela khiyo nu khade ndrangani gwago, na wu gu gimbila ndzilani, gikhati u lalago, ni gikhati u wugago. 8Gambe u na yi hunga bogoni gwago gasi gu khala gialakanyiso vbakari nya maho yago. 9#Wona gambe Dhet 11:18-20. U na yi lova mihasimotunu nya nyumba yago ni vbamalimbatunu gwago.
U nga divali Nungungulu Mudzegisi
10 # Wona gambe Gen 12:7; 26:3; 28:13. Avbo Pfhumu Nungungulu wago, a na gu vbohisago ga litigo a tumbisidego khu gusambanya ga vababe vago, Abrahama, Isaki ni Jakobe, gukhuye a na gu ninga madhoropa nya yadi nya makhongolo, ayo uwe u ngamba ma vbaha khu mandza yago; 11ni dzinyumba dzi tadego khu satshavbo iso nya sadi, si ngamba hengeledzedwa khuwe, ni milambo nya mati yi ngamba podwa khuwe; ni marembwe nya miuvha ni miolivha ma ngamba yadwa khuwe; avbo u na gu hodzago u khura, 12dzi wonele gu tshukha u divala Pfhumu Nungungulu, a gu dusidego khu tigoni ga Egipito, nyumbani nya wugumbi. 13#Wona gambe: Mat 4:10; Luk 4:8. U na ninga githawo Pfhumu Nungungulu wago, u mu thumela, u sambanya khu lina laye. 14U nga landreleli vambe vanungungulu avo va guromo vbakari nya mayigo ma gu randredego; 15kholu Pfhumu Nungungulu wago, a guromo vbakari gwanu, Nungungulu nya wufu, gasi likhulo laye li si khondri li gu fuvisa mafuni. 16U nga lingi Pfhumu Nungungulu wago, kha nga idzo u nga mu lingago khidzo Masaha.#6:16 Masaha: Wulanga nya guganedze ni gulinga; wona gambe ga libhuku la Ekisodha gipimo 17:7. Wona gambe: Eks 17:1-7; Mat 4:7; Luk 4:12. 17Dzi garadze khu gu vegisa milayo ya Pfhumu Nungungulu wago, sihevbudzo saye ni sileletelo saye a gu rumidego. 18U na thuma ugo nya gwadi gu lulamidego mahoni ga Pfhumu Nungungulu, gasi si gu dugele gwadi, u bela u fumela litigo nya ladi eli Pfhumu Nungungulu, khu gusambanya a tumbisidego gu ninga ga vababe vago, 19khu gu tutumisa valala vago vatshavbo mbeli gwago, kha nga idzo Pfhumu Nungungulu a ganedego khidzo.
20Khu matshigu ma nga gutago, gyanana gyago gya gu gu wudzisa, khigyo: Sa gu tshamusela ginani wufakazi, sileletelo ni milayo, esi Pfhumu Nungungulu wathu, a hi leletedego? 21Khavbo avbo, u na embela gyanana gyago, khuwe: Hi diri dzikhumbi dza Faro, tigoni ga Egipito; aholu Pfhumu Nungungulu, a di hi dusa khiyoyo khu libogo laye nya tshivba. 22Pfhumu Nungungulu, giride mahoni gwathu sisamadziso ni siliwugiso nya sikhongolo, nya guthise ga vathu va Egipito, a gu wugela Faro ni ndranga yaye yatshavbo, na hi gu si wona khu maho yathu; 23a hi dusa khiyoyo, gasi gu hi dzega aya hi ninga litigo a nga tumbisago vababe vathu khu gusambanya. 24Pfhumu Nungungulu a hi rumide gukhuye hi landrisa sileletelo satshavbo sesi ni gu ninga githawo Pfhumu Nungungulu wathu, gasi hi mana gukhadzisega gikhati gyatshavbo, ni gu Uye Nungungulu a hi ninga womi, kha nga a girago kala na muhuno. 25Hi na bani na hi lulamide ha gu thela kota khu gu landrisa milayo yatshavbo yeyi mbeli ga Pfhumu Nungungulu wathu, kha nga idzo a hi rumidego khidzo.
Currently Selected:
Dhewuteronome 6: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
