Dhewuteronome 8
8
Milayo yitago khu ga Nungungulu
1Dzi garadzeni khu gu landrisa sirumo satshavbo nyi mi ningago muhuno, gasi mu kodza gu vbanya ni gu andra, mu bele ni gu dzega litigo lile Pfhumu Nungungulu a tumbisidego khu gusambanya ga vababe vanu.
2U na alakanya ndzila yatshavbo eyi Pfhumu Nungungulu wago, a gu gimbidzisidego khiyo giwulani gipimo nya magumana myaga, gasi gu gu vbwasamisa ni gu gu linga, ni guti igyo gi guromo monyoni gwago, gukhuye u na vegedza mwendro khu na vegedza milayo yaye. 3#Wona gambe Mat 4:4; Luk 4:4. Uye a di gu poyila a gu diga upwa ndzala, a gu hodzisa manaha, uwe u nga bani u si mati, ambari vababe vago va di si mati, gasi u kodze gu pima gukhuwe muthu kha vbanyi basi khu guhodza, aholu khu satshavbo iso si dugago khu kanani ga Pfhumu Nungungulu, isoso si ngu vbanyisa muthu. 4Guambala gwago gima kha ga kuwuluga milini gwago, ambari gusimba ngondro wago ndrani nya liendro leli nya magumana myaga. 5Khu guralo, khala nu gu dziti nya gukhuwe, kha nga muthu a lulekago gyanana gyaye, kharato nuye Pfhumu Nungungulu wago, a na gu luleka gasi gu gu laya.
6Vegedza milayo ya Pfhumu Nungungulu wago, u kodze gu mu ninga githawo u gimbila khu dzindzila dzaye. 7Kholu Pfhumu Nungungulu wago, a ngu gu bedza ga litigo nya ladi, litigo nya mitsongo nya mati, nya milambo ni sifefe nya guete, si dugago khu mikovani ni sigomoni; 8litigo li fumago tirigu ni mala; litigo nya miuvha, nya migonva, madimwa ni marova; litigo nya miolivha, nya mafura nya mangi ni wulombe; 9Litigo u na gu ya hodzago guhodza u khura nyamba keneledwa khu gilo; litigo li gu ni siwindri nya dzisimbi; musigomoni gwaye u na kemba u mana sugu.
10Avbo u na manago satshavbo, u hodza u khura, u na bonga Pfhumu Nungungulu wago, kholu a gu ningidego litigo nya ladi. 11Dzi wonele, u nga divali Pfhumu Nungungulu wago, khu gumba landrisa milayo, sirumo ni sileletelo saye, esi nyi gu ningago muhuno; 12gu nga giregi gu, hwane nya gu nu hodzide u khura, nu vbahide dzinyumba nya dzadi u vbanya umo; 13hwane nya gu bani mitshambi yago nya dzimombe ni dzinvuta na mi andride, gumogo ni parata ni ndralama na si andride khu gutala, ni simbe mu na gu bani na muri naso, 14monyo wago wu dzi khusedza khu matshandza, u divaledwa khu Pfhumu Nungungulu wago, a gu dusidego khu Tigoni ga Egipito, nyumbani nya wugumbi. 15Khuye a nga gu phara khu libogo a gu gimbidzisa mugiwulani gile nya gikhongolo nya guthise, nya dzinyoga nya gutale khu wuhungu, nya dzihume ni gihala, nyambana mati; a gu dusede mati khu mugiwindrini; 16#Wona gambe Eks 16:35. Khuye a nga gu ninga manaha mugiwulani u hodza ayo ma nga bani ma si tidwi khu vababe vanu; gasi gu gu tsayisa ni gu gu linga, gasi u kodze gu mu girela iso nya sadi. 17Khu guralo, u nga ganeli khu monyoni gwago, khuwe: Dzithomba dzedzi dzatshavbo nyi dzi mane khu tshivba yangu ni thumo nya mandza yangu. 18Phela khu gu alakanya Pfhumu Nungungulu wago, kholu khuye a gu ningago tshivba gasi u dzi girela dzithomba; gasi gu tiyisa gidzumeledzwano gyaye, egi a tumbisidego khu gusambanya ga vababe vago, kha nga u si wonago muhuno.
19Wa gu divaledwa khu Pfhumu Nungungulu wago, u landrisela vambe vanungungulu, u va thumela ni gu va khozela, nyi ngu sambanya mahoni gwago muhuno kheni, khu lisine mu na mbemba. 20U na mbemba gu fanana ni mayigo ma mbembisidwego mbeli gwanu khu Pfhumu Nungungulu; kholu kha wa vbweta gu yingisa lito la Pfhumu Nungungulu wanu.
Currently Selected:
Dhewuteronome 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
