Marcos 4

Murukuq runaman Jesús iwalatsinqan

Mateo 13.1-9; Lucas 8.4-8

1Tsaypitanam yapay qocha kuchunchö Jesús yachatsiyta qallaykurqan. Tsayman atskaq runakuna qorikäyaptinmi qocha kuchunchö kaykaq büquiman yarkurkur jamakurqan.#Luc. 5.1-3. 2Tsaypitanam imamanpis iwalatsiypa atska yachatsikuykunata yachatsir nirqan: 3<<Shumaq wiyayämay. Juk runash trïgu muruq aywanä. 4Muruta mashtaptinshi näniman wakin chänä. Tsayshi pishqukuna shamur upshaskiyänä. 5Wakin murunash shaqaman chänä. Tsaychö allpa mana kaptinshi ras jeqamurpis 6matsükuyta mana puëdir achaywan tsakiskinä. 7Wakin murush kashakuna rurinman chänä. Jeqamurpis kashakuna ñitiptinshi wayuyninpis kanätsu. 8Peru wakin murunash alli allpaman chänä. Tsaychö alli wiñamurshi alli espïgayuq kayänä. Wakin espïgash kimsa chunka (30) trïguta wayunä, wakin espïgash joqta chunka (60) trïguta wayunä y wakinnash pachak (100) trïguta wayunä>>.

9Tsaynö yachaskatsirmi Jesús nirqan: <<Rinriyuq kaqkunaqa ninqäkunata wiyakuyätsun>>.

Iwalatsiypa imanir yachatsinqanta Jesús tantiyatsinqan

Mateo 13.10-17; Lucas 8.9-10

10Tsaypita runakuna aywakuyaptinnam Jesús quëdarqan chunka ishkay discïpulunkunawan y tsaychö kaykaq wakin runakunawan. Paykunam tsay yachatsinqanta tantiyatsinanpä Jesústa mañakuyarqan.

11Jesúsnam nirqan: <<Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Peru wakinkunatam sïqa imamanpis iwalatsiypa willä. 12Tsaymi rikarpis cuentata qokuyantsu y wiyaykarpis tantiyayantsu. Tantiyarqa jutsankunata dëjarmi perdonashqa kayanqa>>.#Isa. 6.9-10.

Murukuqman iwalatsinqanta Jesús tantiyatsinqan

Mateo 13.18-23; Lucas 8.11-15

13Tsaymi Jesús nirqan: <<Tsay yachatsinqäta ¿manaku tantiyayanki? Tsaykunallatapis mana tantiyaykarqa ¿imanörä wakinkunata tantiyayankiman?

14<<Murukuq runaqa Tayta Diospa willakuyninta willakuqmi kaykan. 15Wakin runakunaqa chukru näninömi kayan. Tsaymi Tayta Diospa willakuyninta wiyaptinpis Satanás shamur wiyayanqallantapis qonqaskatsin.

16<<Wakin runakunaqa shaqa chakranömi kayan. Paykunaqa Diospa willakuyninta wiyar kushishqam chaskiyan. 17Kushishqa chaskirpis Tayta Diosman shumaq mana criyikurmi matsükuyta mana puëdiq trïgunö kayan. Tsaymi Diospa palabranta chaskiyanqanpita runakuna chikiyaptin o ñakaykuna shamuptin criyikuyninta jaqiskiyan.

18<<Wakin runakunaqa kasha chakranömi kayan. Paykunaqa Diospa willakuyninta wiyarpis 19kay vïdachö imaykapä llakikur y rïcu kayllapä yarpachakurmi Diospa willakuyninta qonqaskir mana wayuq trïgunö kayan.

20<<Peru wakin runakunam sïqa alli allpanö kayan. Paykunaqa Tayta Diospa willakuyninta cäsurmi Tayta Dios munanqannö kawayan. Tsaymi alli allpachö juk murullapita kimsa chunka (30) trïgu o joqta chunka (60) trïgu o pachak (100) trïgu wayunqannö kayan>>.

Willakuyninta aktsiman Jesús iwalatsinqan

Lucas 8.16-18

21Tsaypitanam Jesús nirqan: <<Pipis aktsita tsariskatsir ¿cajón rurinman o catri jawanman pakanmantsurä? ¿Manaku llapanta atsikyänanpä alayriman churan?#Mat. 5.15; Luc. 11.33. 22Tsaynömi yachatsinqäkuna kanan pakaraykaqnö karpis musyakanqa. Kanan mana tantiyakarpis waraykunaqa tantiyakanqam. 23Rinriyuq kaqkunaqa ninqäkunata wiyakuyätsun>>.

24Mastam Jesús nirqan: <<Ninqäkunata shumaq cäsuyämay. Cäsuyanqaykimanmi masta yachakuyänaykipä Tayta Dios yanapayäshunki. [Shumaq wiyakuyaptikiqa] mastarämi tantiyatsiyäshunki. 25Yachatsinqäta cäsukuqkunaqa masmi tantiyayanqa. Peru mana cäsukuqkunam sïqa ichik tantiyayanqallantapis qonqaskiyanqa>>.#Mat. 13.12; 25.29; Luc. 19.26.

Trïgu muruman Jesús iwalatsinqan

26Tsaypitanam Jesús nirqan: <<Tayta Diospa mandakuyninqa juk runa trïguta murukunqannömi kaykan. 27Muruykur punuptin rikchaptinpis y paqaspa junaqpapis murunqan wiñanmi. Imanö wiñanqanta tsay runa mana tantiyaptinpis 28tsay trïgu puntata qewanöllam jeqamun. Wiñarkurnam espigar poqun. 29Poquskiptinnam cosechar ösiwan segan>>.#Joel 3.13.

Ñäbus muruman Jesús iwalatsinqan

Mateo 13.31-32; Lucas 13.18-19

30Mastam Jesús nirqan: <<Tayta Diospa mandakuyninta ¿imamanrä iwalatsïman? ¿Ima iwalatsikuywanrä tantiyatsïman? 31Tayta Diospa mandakuyninqa ñäbus muruta juk runa chakranman murunqannömi. Llapan murupitapis mas ichikllam kaykan. 32Peru ichiklla kaykarpis wiñamurqa wakin qewakunapitapis mas jatunmi. Tsaymi rämankunachö pishqukunapis qeshunkuna rurayan>>.#4.32 Tsaynö nirmi Jesús nirqan: Ichiklla murullapita ñäbus jeqamur wiñanqannömi Tayta Diospa willakuynin maytsaymanpis chanqa.

Imapä iwalatsiypa Jesús yachatsinqan

Mateo 13.34-35

33Tsaynöpam runakuna tantiyayanqanmannö Tayta Diospa willakuyninta imamanpis iwalatsiypa Jesús yachatsirqan. 34Imamanpis mana iwalatsiypaqa manam imaypis yachatsirqantsu. Peru discïpulunkunatam sïqa kikillankuna kaykäyanqan höra llapanta tantiyatsiq.

Vientupä y yakupä Jesús poderyuq kanqan

Mateo 8.23-27; Lucas 8.22-25

35Tsay junaq patsa tsakaykaptinnam discïpulunkunata Jesús nirqan: <<Wak tsimpaman päsashun>>.

36Tsaynö nirmi tsaychö kaykaq runakunata jaqiskir büquiwan wak tsimpaman aywayarqan. Wakin runakunapis büquinkunawanmi aywayarqan. 37Qochata tsimpaykäyaptinmi pasaypa vientu qallaskirqan. Yakupis laqchikacharmi büquita jundikätsinanpäna kaykarqan. 38Jesúsnam büquipa qepa jamakunanchö jawnata jawnakurkur punuykarqan. Tsaymi discïpulunkuna pasaypa mantsakashqa Jesústa rikchatsir niyarqan: <<¡Rabí, jundikaykantsiknam! ¿Imanirtä punukunki?>>

39Tsaynö niyaptinmi Jesús shärirkur vientutawan yakuta ollqutupar nirqan: <<¡Upällay!>> Tsaymi jinan höra vientupis yakupis päraskirqan. 40Tsaypitanam discïpulunkunata nirqan: <<¿Imanirtä mantsakashqa kaykäyanki? ¿Manaku noqaman yärakayämunki?>>

41Tsaymi kikinkunapura mantsakashqa ninakuyarqan: <<Yakupis vientupis tsaynö cäsunanpäqa ¡pinatä kay runaqa!>>

Currently Selected:

Marcos 4: qxo

Highlight

Copy

Compare