O IMAMAT 26
26
O nyawa ihi ngou-ngounu manga barakati
(Ul. 7:12-24, 28:1-14)
1 #
Im. 19:4; Kel. 20:4; Ul. 5:8, 16:21-22, 27:1 Ma Jou wätemo, ”Uha nidiai o gomanga ekola nihi goko o dulada ekola o liate o helewo igogarade mangale nia huba. Ngohi ma Jou nia Jou Madutu. 2Ni himulia o Sabat mawange deʼ o agama mawange ma amoko mahomoahi deʼ nia horomati o ngï yatinga-tingakoka mangale nihihuba Ngohi. Ngohi ma Jou.
3 #
Ul. 11:13-15
Nako ngini niwango nia moteke hagala Ahi datoro deʼ nihi ngounu hagala Ahi pareta, 4ma orahoka o awana Ngohi aha tohiguti, hiädono o tonaka ihi döaka o hasili deʼ hagala o gota mautu aha ihohoko. 5Nia tonaka mahasili aha deʼ maboboloi, hiädono nako ma yadonoka maöraha mangale nipagele o angguru mahohoko, ngini kani utukohi o gandum. Deʼ nako maöraha yadonoka o gandum nidatomo, ngini kani pagelohi o angguru mahohoko. Ngini aha deʼ nia inomo i kura-kurangua deʼ niwango deʼ madame nia bereraka.
6Ngohi aha tö goana nia berera koiruaeua hiädono ngini yakunu nima idu nimahi rorahai, deʼ moiua niä modongo. O aiwani madorou aha Tahohihanga nia bereraka gënanga, deʼ koiwaka o parangi nia bereraka. 7Ngini aha niakunu nia hohihanga hagala nia haturu; 8ngini inï motoa kani akunu niä hohihanga yaratuhu moi, deʼ inï ratuhu moi ngini kani akunu niä hohihanga yaribuhu ngimoi. 9Ngohi aha tinihi barakati ngini deʼ ngohaka deʼ o danongo manga ngoë Tinihi döaka nginika. Okia Tinihi jajioka nginika aha Taganapu. 10Nia tonaka mahasili aha kadeʼ maboboloi, hiädono ka inï wedono o taongo moi. Maboboloioli pakisa ngini nihi hupu nia utu-utukino ihira-hira, hupaya naga mangï mangale nia gögono nia utu-utukino mahungi. 11Ngohi aha togogere tingini nia hidogoronaka Ahi tau magoronaka, deʼ aha ko Tinï tilaua ngini. 12#2Kor. 6:16 Ngohi aha tinï tomoteke ngini; Ngohi aha todadi nia Jou Madutu deʼ ngini nidadi Ahi umati. 13Ngohi ma Jou nia Jou Madutu, Tinï ao-ao ngini o Mesir mabereraka deʼ nihupu nidadiokaua o gilaongo. O kuaha inï tö tuku-tuku ngini Tatobikoka, deʼ ngini Tinihidadi o nyawa yo bö bebebasi.”
O hukumanga mangale o nyawa ihi ngou-ngounua
(Ul. 28:15-68)
14 #
Ul. 28:15-68
Ma Jou wätemo, ”Nako ngini nihihi gihenua Ngohi deʼ nia diaiua Ahi pareta, 15nako ngini nia tilakuru o jaji Tadodiaioka dede ngini deʼ nioluku nihi ngounu Taputu-putuhoka deʼ hagala Ahi datoro, 16ngini aha Tinï hukumu. Ngohi aha tini dotagao o bodito nginiuku, o panyake deʼo röehe mahauku koi togu-togumua, hiädono nia lako idadi ipiloko deʼ ngini niwango kania bobelelaka. Ngini aha nimä datomo mä nia ol̄omua mahasili, hababu hagala nia haturu aha yoböa ini hohihanga ngini deʼ yamata-mataka okia ngini nia dato-datomo. 17Ngini aha Tini hukumu, hiädono ngini inï hohihanga nia haturu-haturu deʼ inï doha-dohata inï kuaha. Ngini aha idadi duru nihawana hiädono ngini nipiringana, ngarokä moiua ini ginïki.
18Nako nia maoka o hukumanga mata-mata gënanga ngini koni hihi ngounuwahi Ngohino, nia hukumanga aha Tö dogo o lape tumidi. 19Ngini duru niedenge, mä Ngohi aha tinihi tudukuku. Aha koi awanua, hiädono nia tonaka kamadü dudungu deʼ ma dogowini hokä o behi. 20Nia huha deʼ nia kangela mata-mata koiwa mafaidä, hababu nia tonaka aha ihi döakua mahasili deʼ nia joro nidato-datomo aha koi hohokua.
21Nako ngini kanihi gila-gilaohi nihi lawani Ngohi deʼ nioluku nihihi ngounu Ngohino, done nia hukumanga aha To dogooli o lape tumidi. 22Ngohi aha tinï dotagao o aiwani-aiwani madorou nia hidogoronaka. O aiwani-aiwani gënanga aha yä goli nia ngoha-ngohaka, deʼ yatoma nia gigini deʼ inï mata ngini, hiädono nia gegetongo idadi duru nia muhutulu, deʼo ngeko-ngekomo nia bereraka idadi kai rïdika.
23Nako mata-mata o hukumanga gënanga ngini koni hihi gihenowahi Ngohi, mä kagila-gilaohi nihi lawani Ngohi, 24done Ngohi aha tinï gohara ngini deʼ Tinï hukumu ngini madubuho ihi gali matumidi iholoi deʼ ipaha-pahaka. 25Ngohi aha tapüda o parangi nia hidogoronaka mangale Tinï hukumu ngini karana ngini nia tilakuroka Ahi jaji dedengini. deʼ nako ngini nima toomu nia kotaka mangale nilingiri o hohohongo, Ngohi aha tini dotagao o panyake yakunua itogumu, hiädono pakisa ngini nimahi döaka nia haturuika. 26Ngini aha nia inomo imata-mataka, hiädono o ngoheka ya ngimoi yoparalu duga-duga moi dika mangale yoharongo o roti naga onangoka. O inomo gënanga aha ihi kodoku, deʼ nia ol̄omo deʼ iböto, ngini kania maohi inï hahini.
27Nako mata-mata o hukumanga gënanga nia maoka ngini kagila-gilaohi nihi lawani Ngohi deʼ ni oluku nihi hingounu Ngohino, 28done deʼ Ahi dohata aha Ngohi tinï gohara ngini deʼ Tinï hukumu ngini madubuho ihi gali matumidi iholoi deʼ i paha-pahaka. 29Ngini aha inï habirokata, hiädono nimä ol̄omo nia ngoha-ngohaka mahirete. 30Ngohi aha tawedere nia puji-puji mangï hagala o doporono mal̄okuoka, Taruba nia huhuba-huhuba mangï o dupa niö duhu-duhuku, deʼ hagala nia maiyeti Tohikaweli nia gomangika irö ruba-rubaika gënanga. Ta ëmono 31nia kota-kota Ta tagali idadi i wede-wederuku, nia puji-puji mangï Ta wedere deʼ nia huhuba-huhuba ko Tatarimaua. 32Nia berera aha Tabinaha mata-mataika, hiädono nia haturau-haturu yogö gogere yatodokana yamake mangedere gënanga duru yömodongo. 33Ngohi aha tapuda o parangi nia bereraka deʼ Tinihi kokitingakoka ngini o berera mahomoaika. Nia dumule aha moiua ya paliara, deʼ nia kota imal̄aika idadi i wede-wederuku. 34-35O öraha gënanga magogiria inï umoika nia haturu-haturu manga bereraka, nia tönaka nihi gumal̄a ua ima togumu maöraha ngini niö gogerika, aha moiua yapaliara deʼ yamake o öraha imahi batongo.
36Hagala nia nyawa naga yä umo-umoika o berera mahomoaka, aha Tädiai duru yohawana, hiädono mailingi o gota mahoka o hidal̄oko yawuwu mä önanga kayo piringana. Ngini aha nipiringana hokä inï ginïki o parangi magoronaka, deʼ niruba ngaroka moiua nia haturu nia datekoka. 37Ngini aha nipiringana deʼ nima kokepeleke moi deʼ moika, ngarokä moiua ini ginïki. Deʼ ngini niakunua nia lawani nia haturu-haturu. 38Ini umoika o berera mahomoaka ngini aha nihonenge nia haturu-haturu manga berera inï binaha. 39Nia huhutulukahi niwango nia haturu manga bereraka ini pelelaka karana nia baradoha mahirete deʼ nia ete deʼ nia tohora manga baradoha.
40Mä nia difauku aha ima ngaku toönanga manga baradoha deʼ toönanga manga ete deʼ manga tohora manga baradoha ihi lawa-lawanoka Ngohi deʼ Ahi pareta yamotekua 41hiadono Ngohi tomaoko talawani önanga deʼ Tä duhu önanga deʼ Tä umo manga haturu-haturu manga bereraika. Ma baha, nako nia difauku ima ikeoka Ngohino deʼ yamaoka o hukumanga karana manga baradoha deʼ toönanga manga lolawani, 42#Kej. 17:7-8, 26:3-4, 28:13-14 Ngohi aha toma hininga Ahi jaji deʼ o Yakub, o Ishak deʼ o Abraham. Ngohi aha ta hungi Ahi jaji mangale Ta hi döaka o tönaka gënanga Ahi umatika. 43Mä o tonaka gënanga kokiani ihira yamal̄aka maberera madutu, hupaya yakunu igou-goungu o tonaka gënanga imahi batongo. Deʼ Ahi umati kokiani yamao mata-mata o hukumanga Ta gogelengaka onanguku karana yoluku ihi ngounu Ahi datoro deʼ Ahi pareta-pareta. 44Mä önanga kamanga haturu manga bererakahi ma, aha Ngohi kota mal̄aua önanga ekola Tä binaha mata-mataka. Hababu nako önanga Tä binaha, mamangarati Ngohi tatoaka Ahi jaji dede önanga, ena hioko Ngohi nënanga ma Jou manga Jou Madutu. 45Ngohi aha tahungi Ahi jaji tadodiaioka deʼ toönanga manga ete deʼ manga tohora, maöraha Ngohi tohidumutu Ahi kuaha hagala o hoana deʼ o bereraika deʼ tä ao Ahi umati o Mesirino deʼ yohupu, hupaya Ngohi ma Jou idadi toönanga manga Jou Madutu.”
46Genanga doka o tita-tita deʼ o pareta-pareta ma Jou wohi döa-döaka o Sinai mal̄okuoka o Musaika mangale o Israel ma nyawa.
Currently Selected:
O IMAMAT 26: TLB
Highlight
Share
Compare
Copy
Want to have your highlights saved across all your devices? Sign up or sign in
