O IMAMAT 25
25
O taongo ma tumidoka
(Ul. 15:1-11)
1 #
Kel. 23:10-11
O Sinai mal̄okuoka ma Jou wï temo-temo o Musaika deʼ wï huloko ünanga 2wohiädono o datoro-o datoro nënanga o Israel manyawaika. Nako ngini ni wohama o bereraika aha ma Jou winihi döaka nginika, ngini kokiani niwi horomati ma Jou deʼ madodagi nënanga. O taongo matumidoka ihi geto-getongo ngini yakunua nia karajanga nia tonaka mangale nidatomo. 3O taongo butanga madekana kokiani ngini niö datomo nia dumule, nia angguru mautu madumuleoka niö boporo deʼ nia toomu nia tonaka mahasili. 4Mä o taongo matumidoka ihi geto-getongo niö dingaka mangale ma jou. Hoʼ o taongo gënanga magurutu kokiani nia mal̄aika deʼ yakunua nia karajanga. Uha niö datamo nia dumule deʼ uha nia angguru mautu o dumuleoka niö boporo. 5Ma boboloi o gandum iwö wango-wango ena mahirete ekola o angguru nia angguru mautu ipö poporua, yakunua ngini nia toomu deʼ nia gogono, hababu o taongo gënanga ganga o dodogumu ma taongo mangale o tonaka. 6Ngarokä hoko gënanga, o tonaka gënanga aha ka ihi döaka mahasili mangale imadadi o inomo mangale ngini, nia go gilaongo, nia hewa manyawa, deʼ o nyawa maporetino yo gogogere dede ngini. 7Hagala nia giginiö deʼ hagala o aiwani i huhuhuku nia bereraka. Hagala ihi hasi-hasili o tonaka gënanga yakunu nia ol̄omo.
O higilio mataongo
8Nia etongo o taongo tumudi nihigali matumidi, mangöe o taongo moruata deʼ hiwo. 9Deʼ o wange mangimoioka o mede matumidoka, enagënanga o baradoha ma apongo mawange, nia huloko o nyawa yowuwu o trompet la mailingi kiaika honanga o berera yamode-modekika. 10Ngini kokiani nihi tingaka o taongo moritoa gënanga, deʼ nihi ngahu o bebasi yongodumu o berera manyawaika. O taongo gënanga magoronaka hagala nia arata nia huku-hukunoka kokiani nihigilio madutu yohira-hiraika ekola aingohaka deʼ ai donongika. O nagona yahukunuka hoka o gilaongo kokiani yahigilio manga riadodotoika. 11Uha nio datomo o dumule. O gandum iwango-wngo ëna mahirete ekola o angguru mahohoko nia angguru madumuleoka ipö poporua yakunua ngini nia toomu deʼ nia gogono. 12O taongo gënanga marupa o taongo itebi-tebini mangale ngini. Ngini yakunu nia ol̄omo duga-duga o kia naga i wango-wango ena mahirete nia dumuleoka.
13O taongo gënanga magoronaka mata-mata o tonaka ihuku-hukunoka kokiani ihigilio madutu yo hira-hiraika. 14Hoʼ nako ngini nihukunu o tonaka nia dodiawoika o Israel manyawa, ekola nia ija o tonaka unangoka, uha nimakubukunu gënanga deʼ nia hininga irikotua. 15O tonaka maija gënanga kokiani nihi tatapu imamoteke mangöe mataongo madekanino o tonaka gënanga yakunu ihi hasili hiädono o Higilio mataongo moioli. 16Nako magegetongo mataongo iwöe, o tonaka ma ija gënanga ihali. Mä nako mataongo magegetongo mahuhutulu, ma ija kokiani imura, karana ihukunu ganga yaetongo ma hasili. 17Uha nia tipu nia dodiawo o Israel manyawa, mä kokiani ngini niwï modongo ma Jou nia Jou Madutu.
O taongo ma tumidi maloleha
18Nihi ngounu mata-mata ma Jou Ai tita deʼ Aipareta, hupaya ngini niwango nirïdi nia bereraka gënanga. 19O berera gënanga matonaka aha ihi döaka mahasili hiädono ngini deʼ nia inomo ini wedo-wedono deʼ nigogere dokengoka deʼ mahalamati.
20Mä mudukua naga yoleha okia aha mia ol̄omo o taongo ma tumidoka maöraha manga tonaka yodatomua deʼ mahasili yal̄ëua. 21O taongo mabutanga magoronaka ma Jou aha wohi barakati o tonaka hiädono mahasili o taongo hangeino inï wedono. 22deʼ maöraha ngini niö datomo nia dumule o taongo ma tufangeoka, nia utu-utukino o taongo mabutangaka kanagahi mangale ngini ni ol̄omo. Ma boboloioli nia inomo nimagö gogonika aha kai niwedono hiädono maöraha yadono ngini nia toomu nia hasili o taongo gënanga.
O tau deʼ o tonaka ihigilio
23Nia tonaka yakunua nia hukunu ihi gila-gila, hababu o tonaka gënanga madutu koti nginiua, madutu duga-duga ma Jou Madutu. Ngini duga-duga hokä o nyawa maporetino ini higumal̄a mangale nia pake o tonaka gënanga.
24Nako nia tonaka o löa moi nia hukunu, kokiani nihi goungu madutu wohira-hira ai haku watuhuhu o tonaka gënanga. 25Nako womatengo o Israel manyawa womihikini hiädono pakisa ünanga wahukunu ai tonaka, ai riadodoto duru yadö dutu-dutu kokiani yatuhuhu o tonaka gënanga. 26Nako moiua manyawa mangale yatuhuhu mä matonaka madutu gënanga maduruino kawa hukunu deʼ ai tiwi yadono mangale watuhuhu ai tonaka, 27done ünanga kokiani wofangu ai tonaka waija-ijaika deʼ ma ija imoteke o tonaka gënanga mahasili o taongo muruono ma himangika hiädono o Higilio mataongo aha i boa-boa. Deʼ hoko gënanga ünanga yakunu wakilio tounanga ai tonaka. 28Mä nako ünanga wakunua watuhuhu ai tonaka, o nyawa wo ija-ija kahirahi wakuaha o tonaka gënanga hiädono o Higilio mataongo moioli. O taongo gënanga magoronaka o tonaka gënanga kokiani ihigilio madutu wohira-hiraika.
29Nako ima tengo ani yahukunu manga tau o gahumu moi o kota magoronaka ihi gilolitino o bebeno o mehele, done önanga deʼ manga haku yatuhuhu manga tau maöraha o taongo moi ma goronaka mulaenge i etongo mawange yahükunu deʼ i hikaino. 30Ma nako o tau gënanga o taongo moi yadono deʼ yatuhuhua ihihanga manga haku mangale yatuhuhu. O tau gënanga kahirahi madutu o nyawa wo ija-ija deʼ aidifauku. O Higilio ma Taongo magoronaka, o tau gënanga ihigilioua. 31Mangale o tau o kapo-kapongika ihi gilolitinoua o bebeno o mehele madatoro imaketero hokä o tonaka madatoro; madutu yo hira-hira manga haku yatuhuhu deʼ o tau gënanga kokiani i higilio o Higilio ma Taongo magoronaka. 32Mä o Lewi manyawa o öraha okia dika manga haku yatuhuhu toönanga manga arata hagala o kota ihi totatapuoka toönanga manga kota. 33Nako o Lewi manyawa womatengo wahukunu ai tau o kota moi ani magoronaka gënanga deʼ ünanga watuhuhua, o tau gënanga kokiani ihi gilio unangika o Higilio ma Taongo magoronaka. Hababu o Lewi manyawa manga tau hagala toönanga manga kotaka ganga kahirahi toönanga madutu o Israel manyawa manga hidogoronaka. 34Mä o momo o tonaka malua-luasoka o Lewi manga hoana manga gilolitino yakunua yahukunu. Enanga ganga kahi ädo-ädonika to Lewi manyawa.
Nia hibö bau-bau o nyawa mihikiniika
35 #
Ul. 15:7-8
Nako o nyawa nia hoana moi yogogere nia hidogoronaka yomihikini deʼ wakunua wapaliara ai wowango, ngini kokiani niwi riwo ünanga hokä maporetino ekola o dagi-dagino, hupaya ünanga yakunu wowango i gila-gila nia hidogoronaka. 36-37#Kel. 22:25; Ul. 23:19-20 Okia naga niwihibau unangika uha niö gahoko ma bunga, mä kokiani ngini niwi modongo ma Jou Madutuika, deʼ ni wi mal̄aika o nyawa gënanga wowango nia hidogoronaka. O inomo niwï buku-bukunu unangika uahaoli nia l̄ë o utumu. 38Genanga ma Jou nia Jou Madutu Aipareta winï ao-aoka o Mesir mabereraka deʼ nihupu mangale o Kanan maberera winihi döaka nginika, hupaya Unanga wo dadi nia Jou Madutu.
O gilaongo yä ija-ijaino manga bebasi
39 #
Kel. 21:2-6; Ul. 15:12-18 Nako o nyawa nimako höana moi yogogere nia hidogoronaka yomihikini hiädono ünanga wahukunu ai diri hokä o gilaongo nginika, o nyawa gënanga yakunua ngini niwi huloko wadiai o gilaongo makarajanga. 40Unanga kokiani wogogere nginioka hokä o hewa manyawa womatengo deʼ wo karajanga mangale ngini hiädono o Higilio ma Taongo. 41O öraha gënanga ünanga deʼ ai ngoha-ngohaka yakunu ya mal̄a nia tau deʼ imakilioro manga riododotika deʼ manga ete deʼ manga tohora manga tonakika. 42O Israel manyawa ganga ma Jou Ai gogilaongo ge Unanga doka wa ao önanga o Mesir mabereraka deʼ yohupu deʼ karana gënanga önanga yakunua yähukunu hokä o gilaongo. 43Hoʼ o Israel manyawa yahuku-hukunu manga diri nginiika yakunua nia dodorohu. Kokiani ngini niwï modongo nia Jou Madutuika. 44Nako ngini niparalu o gilaongo, ngini yakunu nimä ija o hoana manyawa yogogogere ini kokilolitino. 45Yakunoli ngini nimä ija o nyawa maporetino manga ngoha-ngohaka yogogere yotatapu nia hidogoronaka. O nyawa ma poretino manga ngoha-ngohaka ima kokil̄au nia bereraka yakunu tingini madutu, 46deʼ yakunoli nia hipuhaka nia ngoha-ngohakika mangale yodadi toönanga manga gilaongo manga ngango magurutu. Mä nia dodiawo o Israel manyawa yakunua ngini nia dodorohu.
47Nako womatengo o nyawa maporetino wogö gogogere nia hidogoronaka wodadi wokaya, deʼ naga nia dodiawo o Israel manyawa womihikini hiädono ünanga wahukunu ai diri hokä o gilaongo o nyawa maporetinoika gënanga ekola ai riadodotika, 48o Israel manyawa kahirahi deʼ ai haku mangale iwi tuhuhu. Womatengo ai riadodoto o nauru, 49ekola ai pepe, ekola ai riadodoto o ete moi ekola o nyawa mahomoa ai riadodoto ma dutu-dutuino, yakunu wï tuhuhu. Ekola nako ünanga mahirete womä gakunu, ünanga yakunu wa tuhuhu ai diri mahirete. 50O gilaongo gënanga kokiani ima ade-ade ima tatoro deʼ o nyawa wi ija-ijaoka. Onanga kokiani ya etongo mangoë mataongo ka dema dero wahukunu ai diri hokä o gilaongo hiädono o Higilio ma Taongo moioli, daha ihi tantu ai duduhuhu ma ija. Ma ija gënanga kokiani ihi tatapu imoteke o gaji magegetongo yahi döa-döaka o hewa manyawaika. 51-52O gilaongo gënanga kokiani wohigilio ai diri ma ija ma amoko ya etongo womatengo o hewa manyawa ai gaji madekanino mataongo womanaramöwahi, 53ma tero hokä ünanga wokarajängoka hokä o hewa manyawa i wihi gaji deʼ mataongo. Ai tuanga yakunua widodorohu. 54Nako ünanga wakunua woma tuhuhu deʼ madodagi gënanga, ünanga deʼ aingoha-ngohaka kokiani yahi bebasi o Higilio ma Taongo moioli magoronaka. 55O Israel manyawa womatengo yakunua wodadi o gilaongo ai ngango magurutu karana o Israel manyawa gënanga ma Jou Ai gogilaongo. Ma Jou wa ao oka önanga o Mesir mabereraka deʼyohupu. Unanga ma Jou toönanga manga Jou Madutu.
Currently Selected:
O IMAMAT 25: TLB
Highlight
Share
Compare
Copy
Want to have your highlights saved across all your devices? Sign up or sign in
