O IMAMAT 27
27
O datoro mangale ihö huba-huba ma Jouika
1Ma Jou wohi döaka o Musaika 2o datoro nënanga mangale o Israel ma nyawa. Nako imatengo ani iwihihuba ma Jouika mangale yatuhuhu moi ani manga jaji kabiaha-biahaua o nyawa gënanga yatuhuhu deʼ o tiwi magegetongo 3-7imoteke maragane yapake-pake ma Jou ai Tauoka: – onau-nauru manga umuru o taongo mori butanga deʼ i holoi o tiwi o haaka ngimoi deʼ motoa, o ngoheka o tiwi o haaka ngimoi – o nau-nauru o taongo monaoko deʼ ihi kail̄e hiädono o taongo mori butanga o tiwi o haaka moritoa, o ngongoheka o tiwi o haaka moruange – o nau-nauru o taongo motoa deʼ ihikail̄e hiädono o taongo monaoko o tiwi o haaka monaoko, o ngongoheka o tiwi o haaka ngimoi – o nau-nauru i kuranga deʼ o taongo o motoa o tiwi o haaka motoa, o ngongoheka o tiwi o haaka hange.
8Nako o nyawa wojajaji gënanga womihikiniholi mangale wofangu ihi totatapuoka, kokiani o nyawa wohi huba-huba ma Jouika gënanga ünanga iwiao ma imamika. Ma imam kokiani wohi tatapu maragane iholoi ihutulu ima moteke deʼ o nyawa gënanga ai dagakunu.
9-10Nako o jaji gënanga yakorona o aiwani ihohalali yakunu yatarima hokä ihö huba-huba ma Jouika, o nyawa wojajaji gënanga yakunua wohitagali deʼ o aiwani mahomoa, hababu hagalaihihö huba-huba ma Jouika idadi toma Jou. Mä nako kawatururu dika, o aiwani hinotö gënanga i dadi toma Jou. 11Mä nako o jaji gënanga yakorona o aiwani ihoharamu yakunua yatarima hokä ihihö huba-huba ma Jouika, o nyawa wojajaji kokiani wäo o aiwani gënanga ma imam ika. 12Ma imam aha wohi tantu ma ija i moteke yamö make-make o aiwani oka gënanga. Deʼ maija ihitö tantuoka ganga ko i kurangoka ua ma ija. 13Nako o nyawa gënanga wöigo watuhuhu ai aiwani, ünanga kokiani wofangu maija deʼ wödogo yaregu o ratuhu moi ma regu monaoko.
14Nako ima tengo ani ihihuba manga tau ma Jouika, ma imam wohi tantu maija imoteke yamö make-make o tauoka gënanga. Ma ija ihi totantuoka ganga koi kurangokaua maija. 15Nako o nyawa gënanga womau watuhuhu ai tau, ünanga kokiani wofangu maija deʼ wodogo yaregu o ratuhu moi maregu monaoko.
16Nako ima tengoani manga tonaka o hidoku moi ihi huba ma Jouika, kokiani maija ihi tantu i moteke mangoë magihihi mangale yodatomo o tonaka gënanga. O kilo monaoko mapine ma ija o tiwi o haaka ngimoi. 17Nako o tonaka gënanga ihi hubaka deʼ mulaenge o Higilio ma Taongo maija kokiani yafangu itö totomo. 18Nako o tonaka gënanga ihihuba ipahaika o Higilio ma Taongo, ma imam kokiani watakihiri maija kayo gelengauku i moteke mangöe mataongo kanagahi hiädono o Higilio ma Taongo moioli, deʼ ihi tantu maija iholoi imura. 19Nako o nyawa wohihö huba-huba o dumule gënanga wo igoua watuhuhu, ünanga kokiani wofangu. 20Nako ünanga wahukunu o dumule gënanga deʼ ihiraua ma Jouoka deʼ watuhuhu, ünanga koiwa ai haku watuhuhu ai dumule. 21O Higilio ma Taongo moioli magoronaka, o dumule gënanga kahi ado-adonika idadi toma Jou, deʼ yahi döaka o imam-imamika.
22Nako ima tengoani moi o dumule waija-ijaoka wohi huba ma Jouika, 23ma imam kokiani watakihiri maija imoteke mangoe ma taongo kanagahi hiädono o Higilio ma Taongo moioli. Deʼ o nyawa gënanga kokiani wofangu maija o wange gënanga dika. O tiwi gënanga idadi toma Jou. 24O Higilio ma Taongo magoronaka, o dumule gënanga kokiani ihigilio madutuika wohira-hiraika ekola ai ngohaka deʼ ai danongika.
25Mata-mata maija kokiani ihi tantu imoteke maija ya pake-pake ma Jou ai tauoka.
26Nia aiwani ingohaka madodi hiraka mangohaka ganga toma Jou, hoyakunua nihi huba mangale o huhuba o hininga mahuka. O hapi mangohaka, o duba ma ngohaka ekola o kabingi ma ngohaka madodi hiraka ma ayo ingohaka ganga toma Jou. 27Mä o aiwani ihoharamu ma ayo ingohaka madodihiraka mangohaka yakunu yatuhuhu maija imoteke yapake-pake ma Jou ai Tauoka, yodogo o ratuhu moi iregu motoa. Nako ya tuhuhua, o aiwani gënanga yahukunu o nyawa mahomoaika ma ija imoteke yapake-pake ma Jou ai Tauoka.
28 #
Bil. 18:14
Ka o nyawa moiö mayakunua yahukunu ekola yatuhuhu okia naga yatinga-tingakoka ma Jouika kayaoa gënanga o nyawa, o aiwani ekola o tonaka. Genanga toma Jou mangale kahi ado-adonika. 29Maboboloi o nyawa yä tinga-tingakoka ma Jouika mangale yabinaha yakunua yätuhuhu, önanga kokiani yä toma.
30 #
Bil. 18:21; Ul. 14:22-29 O regu ngimoi deʼ o ratuhu moino o tonaka mahasili i ngudumu, kayaoa o gandum kayaoa o gota mahohoko ha ol̄o-ol̄omo, ganga mangale ma Jou. 31Nako ima tengoani womau watuhuhu o hidoku moi ma hasilino gënanga, ünanga kokiani wofangu maija ihitö tantuoka deʼ wö dogo o regu motoa o ratuhu moioka. 32O dutu ngimoi o gigini o dutu moi toma Jou. Nako o gigini gënanga yaetongo, o dutu ngimoi magetongo o dutu mangimoioka idadi toma Jou. 33O gigini gënanga madutu yakunua wairi-iriki kiaka ya oa, itorou. Unangö yakunua wohi tagali. Nako ünanga kawohi tagali, o gigini gënanga o dutu hinoto gënanga idadi toma Jou deʼ yakunua watuhuhu.
34Genanga o pareta-pareta wohi döa-döaka ma Jou o Sinai mal̄okuoka o Musaika mangale o Israel manyawa.
Currently Selected:
O IMAMAT 27: TLB
Highlight
Share
Compare
Copy
Want to have your highlights saved across all your devices? Sign up or sign in
