O KELUARAN 23
23
O adili deʼ o hininga iriko-rikoto
1 #
Kel. 20:16; Im. 19:11-12; Ul. 5:20 ”Uha nihi ngahu-ngahu o abari ielu-eluku, deʼ uha nïariwo o nyawa madorou ihi döa-döaka o hakihi madiaiua. 2Uha nimahi mote-moteke de o nyawa yowöe-wöe nako önanga yodiai o howono ekola ihimotekua o hukumu deʼ ihidöaka o hakihi madiaiua. 3#Im. 19:15 Uha nia tingaka de nia fara o nyawa manga perekara nia putuhu magoronaka, ngarokä niä totailako yahowono ekola yahowonua gënanga o mihikini manyawa.
4 #
Ul. 22:1-4
Nako ngini imadaenika niamake niahaturu manga hapi ekola manga keledai ihihangika, niao nihigilio madutuika. 5Nako niahaturu manga keledai irubaiha karana magina madubuho, nioriwo ënanga niamomikil̄e o keledai gënanga; uha niamal̄aika kahoko gënanga dika.
6 #
Im. 19:15; Ul. 16:19 Niä hidiai o mihikini manyawa de ma adili nako önanga yoböa yaö manga perekara o pengadilanika. 7Nimahirehene o galaki ielu-eluku deʼ uha niädiai o hababu o nyawa yahowonua niä hukumu yohonenge, karana Ngohi tohigoungua o nyawa yododiai o dorou hokä hoko gënanga. 8Uha niatarima o uru mabobokumu matiwi, hababu o uru mabobokumu matiwi gënanga yadiai o nyawa yodadi yopiloko o diaiika deʼ yahidadi rugi hagala o nyawa yahowo-howonua.
9 #
Kel. 22:21; Im. 19:33-34; Ul. 24:17-18, 27:19 Uha nia hidiai nisabaranga o nyawa dagi-dagino; ngini ni hi öriki sarakia mamamao nidadi o nyawa dagi-dagino, hababu kahuruono nginiö ma o nyawa dagi-dagino o Mesir mabereraka.”
O taongo matumidi deʼ o wange matumidi
10 #
Im. 25:1-7
”O taongo butanga madekana ngini yakunu niö datomo nia dumule deʼ nia l̄ë okia ihi hasi-hasili. 11Mä o taongo matumidoka o tonaka gënanga kokiani ngini niamal̄aika. O taongo gënanga magoronaka ngini yakunua nia toomu okianaga ena mahirete iwöwango-wangoil̄e niadumuleoka. Niamal̄aika gënanga mangale o mihikini manyawa, de mahouohi mangale o aiwani ihuhuhuku. Niadiai hoko genangoli de nia angguru madumule deʼ nia zaitun magota mautu.
12 #
Kel. 20:9-11, 31:14-15, 34:21, 35:2; Im. 23:3; Ul. 5:13-14 O minggu moi magoronaka o wange butanga ngini yakunu ni karajanga, mä o wange matumidoka ngini kokiani nimahibatongo, hupaya niaaiwani o gigini, o gogilaongo deʼ hagala o nyawa o dagi-dagino yomomanarama mangale ngini yakunoli imahibatongo.
13Niohininga nihidodiai hagala Taheto-hetongoka nginika. Uha niahuba o gikiri mahomoa maboboloi niahetongo maromanga ma yakunua.”
O datoro mangale o wange-o wange ma amoko
(Kel. 34:18-26; Ul. 16:1-17)
14”O taongo ihigetongo ngini kokiani niadiai hange o wange ma amoko mangale nihihoromati Ngohi. 15#Kel. 12:14-20; Im. 23:6-8; Bil. 28:17-25 O Abib mamede magoronaka, maöraha ihitotatapuoka ngini kokiani nihiamoko o Roti iRagi-ragi Ua ma Rameanga de madodagi tinihipoparetaka nginika, hababu o mede gënanga magoronaka ngini niamal̄a o Mesir. O rame o wange tumidino madekana gënanga uha niaol̄omo o roti ipake-pake o ragi. Nihi geto-getongo ngini niböa nihuba deʼ nihihoromati Ngohino, ngini kokiani niao o huhuba.
16 #
Im. 23:15-21, 39-43; Bil. 28:26-31 Nihirame o Gugutuku ma Rameanga maöraha ngini nimulaenge niautuku niadumule mahasili madodihiraka.
Nihirame o Tau o Hoka-hoka ma Rameanga o taongo mabahaka maöraha ngini niatoomu niaangguru madumule mahasili deʼ niagota ihohoko madumule mahasili.
17O taongo ihi getongo maöraha niadiai o rame gënanga, mata-mata o nau-nauru kokiani yoboa ihihuba ihihoromati Ngohino ma Jou nia Jou Madutu.
18Uha nihihuba o roti dema ragi-ragioka maöraha ngini nihihuba niaaiwani o gigini Ngohino. O aiwani o gigini mahaki ihihuba-huba Ngohino o rame-rame gënanga magoronaka yakunua imal̄aika hiädono yarehino mangorumino.
19 #
Ul. 26:2; Kel. 34:26; Ul. 14:21 O taongo ihigetongo ngini kokiani niao ma Jou nia Jou Madutu Ai Tauika o gandum madodihiraka ngini niautuku.
O duba mangohaka ma akeme ekola o kabingi mangohaka yakunua ihi hakai de ma ayo mahuhu mateongo.”
O jaji deʼ o pareta
20”Ngohi aha tahuloko Ahi malaekat inihihira ngini hupaya ini goana ngini deʼ iniao ngini mangï Tasosadiaika. 21Niatailako nihidodiai deʼ nihingounu ënanga. Uha nimalawani enangika karana ënanga Ahi huhuloko, deʼ ënanga aha inihiapongua niatö totilakuru. 22Nako ngini nihingounu enangika deʼ niadiai hagala Tohipopareta, Ngohi aha toparangi tälawani nia haturu mata-mata. 23Ahi malaekat aha inihihira ngini deʼ iniao ngini o Amori, o Het, o Feris, o Kanaan, o Hewi, deʼ o Yebus manyawa manga bereraika deʼ önanga aha Täbinaha. 24Uha niahuba manga gogoana madulada deʼ uha niaturu madodagi önanga yohuba deʼ yohoromati. Niawedere toönanga manga gogoana madulada gënanga deʼ niatobiki o liate-liate o helewo önanga yapöpake-pake mangale yohuba de yohoromati. 25Nako ngini nihihuba Ngohi ma Jou nia Jou Madutu, ngini aha tinihibarakati deʼ o inomo, deʼ nia oke-okere, deʼ hagala o panyake aha Tohitingaka dede ngini. 26Nia bereraka aha koiwa o ngongoheka yahail̄otaka ekola yongohakua. Ngini aha Tohidöaka nia umuru ikurutu.
27O hoana de o berera ngini niangö ngika-ngika aha Tadiai ihï modongo Ngohino; önanga aha Tadiai yobingu imahi orikokaua; nia haturu mata-mata aha imaidulu deʼ yopiringana. 28Nia haturu-haturu aha Täruaeuku, deʼ o Hewi, o Kanaan deʼ o Het manyawa Täduhu Nia himangoka, hupaya ngini yakunu nitagi nia himangiha. 29Onanga aha Täduhua kamamoi o taongo moi magoronaka, hupaya o tonaka gënanga uha ipaliaraua, deʼ o aiwani madorou uha yakaika-yakaino mahininga mahuka. 30Onanga aha Täduhu o hidoku moi-hidoku moi, hiädono ani nyawa yaoaka manga ngöe mangale yö gogere o tonaka gënanga. 31Mabatingi-mabatingi niaberera aha Tohigogere o Akaba ma Jikoka hiädono o Efrat ma Ngairika, deʼ o Ngöto i Kokoronaka hiädono o tonaka ikokakahaika. Ngini Tinihidöaka niä kuaha yogogogere o berera gënanga, hiädono ngini yakunu niäduhu maöraha ngini nitagi niahimangika niaora o tonaka gënanga. 32Uha nidiai o jaji de o nyawa geonanga ekola de toönanga manga gikiri. 33Uha nihigumal̄a o nyawa geonanga yögogere niabereraka, hupaya ngini uha niahuba toönanga manga gikiri deʼ nibaradoha Ngohino. Nako ngini niahuba toönanga manga gikiri, ngini inïotaka o honenge madadagoko magoronauku.”
Currently Selected:
O KELUARAN 23: TLB
Highlight
Share
Compare
Copy
Want to have your highlights saved across all your devices? Sign up or sign in
