O KELUARAN 24
24
O jaji yakekete
1De ipaha ma Jou wïtemo o Musaika, ”Nodoa hupaya nohïhimanga Ngohi, ngona nimakinïki de o Harun, o Nadab deʼ o Abihu, deʼ yamoritumidi o hoana matutuda, magurutikahi deʼ nia tilabukuku nihihuba Ngohi. 2Duga-duga ngona mahirete yakunu naino nomahitigi Ngohino. Mahomoa yakunua yaino imahi tigi-tigino, deʼ yomoholoi o kawaha yakunua yadoa o l̄oku nënanga.”
3Daha o Musa woiki deʼ wohingahu o nyawaika gënanga mata-mata ma Jou Aipareta deʼ Ai datoro. Onanga mata-mata yohaluhu i imakutuonil̄e, ”Ngomi mimau miadiai mata-mata wahö heto-hetongo ma Jou.” 4Genanga deʼ iböto o Musa watulihi mata-mata ma Jou Aipareta. Yarehino o ngoru-ngorumino, wohigoko o huhuba mangï o gahumu moi de o tugu ngimoi de hinoto ol̄oku gënanga matimioka; o tugu yogetongo idadi o dagali o Israeloka moi manga hoana. 5Daha o Musa wähuloko o gogoduru yamuruono naga, deʼ önanga ihihuba o huhuba ituhu-tuhuku mangale ma Jou inoli yatoaka o hapi o dutu muruono naga mangale o dame mahuhuba. 6O hidoku moi o hapi ma awunino gënanga wal̄e o Musa de, woguhe hagala o bokoluku. O hidoku moioli yoguhe o huhuba mangï mal̄okuku. 7De ipaha wal̄ë o jaji mabuku yöduli-dulihika ma Jou Aipareta, deʼ wabasa de ai ilingi kahäkuatil̄e mangale o nyawa geonanga. Onanga yato, ”Ngomi mimau miwihingounu ma Jou deʼ miadiai hagala Aipareta.”
8 #
Mat. 26:28; Mark. 14:24; Luk. 22:20; 1Kor. 11:25; Ibr. 9:19-20, 10:29 Daha o Musa wal̄ë o awunu naga o bokolo magoronaka gënanga deʼ wahituagi o kawahauku. Wotemo, ”O awunu nënanga yakekete o jaji waliko-likoka ma Jou dede ngini, wohihol̄e hagala Aipareta.”
9De ipaha o Musa, o Harun, o Nadab, o Abihu deʼ yamoritumidi o tutuda gënanga yadoa ol̄oku, 10deʼ önanga iwimake o Israeloka manga Jou Madutu okia nagamoi mal̄okuoka hokä o mehele o nilam mahelewo, deʼ mamibihi hokä o dihanga madodararono. 11Hagala o Israeloka manga tutuda gënanga iwimakeoka ma Jou Madutu; ngaroka hokogënanga önanga yobinahaua. Genanga de ibötoönanga yol̄omo deʼ yokere.
O Musa o Sinai mal̄okuoka
12De ipaha ma Jou wïtemo o Musaika, ”Naino Ngohino ol̄oku matubuoka. Genangoka aha Tonihidöaka ngonaika o helewo hinoto Täduli-dulihika Ahi tita gënanga Tohidöaka mangale o dodotoko o Israel manyawaika gënanga.” 13Daha o Musa deʼ o Yosua ai roriwo imahidiaioka deʼ o Musa wadoa o l̄oku ma Jou Ai ngï gënanga. 14O Musa wohibehehongoka o Israeloka manga tutudaika, ”Ni tamä o tau-tauoka nënanga hiädono ngomi mimakilioro. O Harun deʼ o Hur naga dede ngini nenangoka. O nagona naga manga hali, yakunu nia himanga önanga mangale nihitiai.”
15O Musa wadoa o Sinai mal̄oku, daha ünanga iwitamunu o lobi o doomu moi. 16-17Ma Jou Ai himanga macahaya iuti ol̄okuku gënanga deʼ o Israel manyawa yamake hokä o uku itoka-tokara ol̄oku matubuoka. O wange butangaino madekana o lobi yatamunuku o l̄oku gënanga, deʼ o wange matumidoka ma Jou wïahoko o Musa o lobino gënanga. 18#Ul. 9:9 Daha o Musa igila-gila wodoa hiädono ünanga wowohama o lobi gënanga magoronaika. O wange moruata de o hutu moruata o Musa wogogere genangoka.
Currently Selected:
O KELUARAN 24: TLB
Highlight
Share
Compare
Copy
Want to have your highlights saved across all your devices? Sign up or sign in
