O KELUARAN 22
22
O datoro mangale o rugi madagali
1”O naguna watohiki o hapi o dutu moi ekola o duba daha watoaka ekola wahukunu, kokiani o hapi o dutu moi watagali o hapi o dutu motoa, deʼ o duba o dutu moi watagali o duba o dutu iata. 2-4Unanga kokiani watagali o baranga watö tohi-tohiki. Nako ünanga koai kia-kiaua, ünanga mahirete aha iwi hukunu hokä o gilaongo la watagali o baranga watötohi-tohiki. Nako watötohi-tohiki gënanga marupa o hapi, o keledai ekola o duba, deʼ yamake o nyawaka gënanga kamangango, ünanga kokiani watagali o aiwani ipopaliaraö dutu moi de o aiwani ipopaliara o o dutu hinoto.
Nako o hutu-hutu deʼ womatengo wotohiki deʼ iwitagoko hiädono iwi sö o tau magoronaka, daha ünanga iwitoma, o nyawa yotö-toma-toma gënanga koyahowonua. Mä nako o hali gënanga imadadi o wange-wange, o nyawa yotö toma-toma gënanga yaetongo yahowono.
5O naguna wamal̄aika ai aiwani ipopaliara o momo i ol̄omo ai dumuleoka ekola ai angguru madumuleoka, daha o aiwani gënanga itatagi deʼ yaol̄omo o nyawa mahomoa manga dumule mahasili, done o aiwani madutu gënanga kokiani wofangu o rugi madagali de ai dumule mahasilino duru ma oa-oa ekola ai angguru madumule mahirete.
6O nagona yotofo o uku manga dumuleoka mahirete daha o uku gënanga ihora o nyawa mahomoa manga dumuleika deʼ youku yamata-mataka manga gandum iwango-wangoil̄e ekola o gandum magobe i liko-likoino gënanga dahao yautu-utukino, done o nyawa yotofo-tofo o uku gënanga kokiani yofangu o rugi madagali.
7O demo ma ade naga o nyawa yomodeke yagogono ihi dodogumu marupa o tiwi ekola o baranga de maroraganeoka. Mä ipaha ihidodogumu gënanga ai tauoka de yatohiki. Nako wotohi-tohiki iwi make, ünanga kokiani wofangu idogo mahinotoika. 8Mä nako wotohi-tohiki iwimakeua manyawa iwihi dododogumika gënanga kokiani yä ao o pupuji matauika, deʼ genangokadau ünanga kokiani wokoboto ünanga watohikua o baranga ihi dododogumika unangoka.
9O ributu ihi geto-getongo magoronaka mangale toönanga madutu, kayaoa mangale o hapi, o keledai, o duba, opakeanga ekola okia dika ihihihanga daha yamakeokali, o nyawa imamomangaku hokä önanga madutu kokiani ya ao o pupuji mangïika. O nyawa ma Jou Madutu wohinyö nyata-nyata hokä o nyawa yahowo-howonoka, kokiani yofangu madutuika idogo mahinotoika.
10O demo ma ade womatengo wapaliara o keledai, o hapi, o duba ekola o aiwani ipopaliara mahomoa toaidodiawo. Ma duruino o aiwani ipopaliara gënanga ihonenge, ekola yal̄abo ekola ai haturu yaora, ena hioko koiwa mahakihi. 11O hali gënanga magoronaka ünanga kokiani woiki o pupuji mangïika deʼ wokoboto de ma Jou Ai romanga, ünanga watohikua o aiwani o gigini iwi higogö goanoka unangika. Nako ünanga igoungu watohikua, madutu kokiani womahitagongo marugi gënanga, deʼ o nyawa wopopaliara ngarouha wofangu o rugi madagali. 12Nako o aiwani o gigini gënanga o nyawa mahomoa yatohiki, done o nyawa wapopaliara kokiani wofangu madutuika o rugi madagali. 13Nako o aiwani ogigini gënanga o aiwani madorou yagoli, o nyawa wapopaliara kokiani wohidumutu makobongo mahou-hou hokä manyonyata igoungu madutuika, iparalu ua wofangu o rugi madagali mangale o aiwani gënanga.
14Nako womatengo wobau o aiwani o gigini daha o aiwani o gigini gënanga yal̄abo ekola ihonenge maöraha madutu koiwiwa i dodadadi mangïoka gënanga, woböbau-bau kokiani wofangu o rugi madagali. 15Mä nako gënanga imadadi maöraha madutu naga genangokadau, woböbau-bau iparaluua wofangu o rugi madagali. Nako o aiwani o gigini gënanga ihi hewa-hewa, mahewa ihi tamunu ma rugi.”
O atoranga mangale o adati maoa deʼ o pupuji
16 #
Ul. 22:28-29
”O naguna womibaja momatengo o ngohaka o ngoheka maboro momaneowahi la imahidu, kokiani wofangu ami huba deʼ womi moloka. 17Mä nako ami ama wihigumal̄aua o nauru gënanga wokawingi de ngoi ora, o nauru gënanga kokiani wofangu ami amaika gënanga de o tiwi ma amoko momatengo o ngohaka maboro ami huba.
18 #
Ul. 18:10-11
Moi-moi o ngongoheka yomai-maihi de yogogumatere kokiani yätoma.
19 #
Im. 18:23, 20:15-16; Ul. 27:21 O nyawa yamomol̄oka o aiwani kokiani yätoma.
20 #
Ul. 17:2-7
O nagona ihihuba o huhuba o gikiri mahomoaika sowaliua Ngohino, ma Jou, kokiani yähukumu yahohonenge.”
21 #
Kel. 23:9; Im. 19:33-34; Ul. 24:17-18, 27:19 ”Uha niä tuku ekola niahidiai iadilua o dagi-dagino manyawaika; nio hohininga kahuruonino nginiö ma o dagi-dagino manyawa o Mesir mabereraka. 22Uha nia hidiai o bobobao ekola o ngohaka o gohihi niahininga mahuka nisabaranga. 23Nako ngini niä dadi dorou önanga, Ngohi, ma Jou aha tahi gihe-gihene önanga nako önanga imahiböaka yogahoko o roriwo Ngohino. 24Ngohi aha tongamo deʼ tinïtoma ngini o parangi magoronaka, hiädono nia heka-hekata yodadi o bobao, deʼ nia ngoha-ngohaka yodadi o ngohaka o gohihi.
25 #
Im. 25:35-38; Ul. 15:7-11, 23:19-20 Nako ngini nia hibau o tiwi womatengo o mihikini manyawaika Ahi umati manga hidogoronaka, uha nidiai hokä o nagimi yogaho-gahoko, yogahoko mabunga. 26#Ul. 24:10-13 Nako ngini nial̄ë o nyawa mahomoa manga juba hokä ai nagimi madodanu, o wange itumunowahi o juba gënanga kokiani ngini nihigilio, 27hababu o gal̄oko gënanga ganga tounanga genangö moi mangale wohihauku ai röehe. Nako nihigilioua unangika okiahi kokiani wapake womahi gal̄oko maöraha womä idu? Nako ünanga womahiböaka wogahoko o roriwo Ngohino, done Ngohi aha tohigihene karana Ngohi de Ahi hayanga de Ahi dora.
28 #
Kis. 23:5
Uha niwihikoboto ma Jou Madutu deʼ uha niä lolai nia hoana de nia berera matutuda.
29Maöraha ihitö tantuoka, nihihuba Ngohino o hidoku moi niagandum mahasili, nia angguru mateongo deʼ nia zaitun maminya.
Nihi döaka Ngohino nia ngoha-ngohaka o nauru mariaka, 30nia hapiö deʼ nia duba manauru madomoro. Nia mal̄aika o aiwani-aiwani gënanga igogogere ma ayoka o wange tumidi madekana, daha nihi döaka Ngohino o wange tufangeoka.
31 #
Im. 17:15
Ngini Ahi umati, hababu gënanga o aiwani okia dika yagoli-golioka o aiwani madorou o honganoka, yakunua ngini nia ol̄omo ma akeme; gënanga nihi döaka hagala o kahoika.”
Currently Selected:
O KELUARAN 22: TLB
Highlight
Share
Compare
Copy
Want to have your highlights saved across all your devices? Sign up or sign in
