O KELUARAN 10
10
O kahoho i ruae
1Ma Jou wïtemo o Musaika, ”Noiki nïhimanga ma koano. Ngohi tadiaioka ünanga deʼ o popegawe itogowini manga haëke, hupaya Ngohi takunu todiai ihöhera-heranga toönanga manga hidogoronaka, 2deʼ hupaya ngona yakunu nohijarita ani ngohaka de ani danongika sarakia Ngohi täule-ule o Mesir manyawa de ihöhera-heranga gënanga. Done ngini mata-mata aha nihi öriki Ngohi ma Jou.”
3Daha o Musa deʼ o Harun yoiki iwï himanga ma koano deʼ i wïtemo unangika, ”Ma Jou o Ibrani manyawa manga Jou Madutu, wotemo, ’Hiadono muruonoka ngona noluku nohihimoteke Ngohino? Nämal̄aika Ahi umati yoiki, hupaya önanga yakunu ihihuba ihi horomati Ngohino. 4Nako ngona kanolukohi, done yarehe aha tö dotagao o kahoho ani bereraino. 5O tonaka mal̄okuika yamode-modekika, aha mata-mata yatamunu de o kahono duru kahä ngöe gënanga. Mata-mata idato-datomuku mahou, inoli o gota-o gota mautu yabobinahaua o awana o es, aha o kahoho gënanga yahou. 6Ani kadato, o popegawe manga tau deʼ o kawaha manga tauoka i omanga de o kahoho. O bodito nënanga aha iholoi hömodongo ngaro de yamao-maoka ani ete deʼ ani tohora.’ ” De ipaha o Musa womakilioro de woiki.
7O popegawe iwï temo ma koanoika, ”Hiadono muruonoka o nyawa gënanga kokiani wonadiai o huha? Nia mal̄aikala mata-mata o Israel manyawa gënanga yoiki la iwi huba iwi horomati ma Jouika, toönanga manga Jou madutu. Namake tongone nanga berera nënanga iwederoka!”
8Done o Musa deʼ o Harun ma koano wä ahokoli iwï himanga ma koano. Ma koano wätemo onangika, ”Ngini yakunu nioiki la niwipuji nia Jou Madutuika. Mä o nagona dika nia hidogoronaka aha yoiki?”
9O Musa wohaluhu, ”Ngomi mata-mata, kayaoa o gikiri magö kayaoa o bobereki. Ngomi aha mia ao mata-mata mia ngohaka, mata-mata mia hapi, o duba, deʼ mia kabingi, hababu ngomi kokiani midiai o rame de o ngol̄omo ma ago-agomo mangale miwi horomati ma Jou.”
10Ma koano wato, ”Idadiua ngohi tini higumal̄a ngini nia ao o ngongoheka deʼ nia ngoha-ngohaka! Ngini nigaho-gahoko gënanga kaima tero dika de nio nganono ngohi togahoko ma Jou winihi barakati ngini. Itararonoka ngohino ngini nia dungutu itorou. 11Kowali! O nau-nauru dika yakunu yoiki la yohuba iwi horomati ma Jouika, nako ngini i goungu nio igo nihuba nihoromati dika!” De o demo-demo gënanga o Musa deʼ o Harun o kadatoka de yäduhu.
12Daha ma Jou wïtemo o Musaika, ”Natumutuku o Mesir matonaka mal̄okuku. O kahoho-kahoho aha iböa deʼ yaol̄omo hagala idö dato-datomo mahou-houohi o awana o es ipahaino.” 13O Musa wagoraka ai diki-diki deʼ ma Jou wadiai o wange mahiwara ma hidal̄oko ital̄oko o bereraka gënanga o wange moi deʼ o hutu moi yahaiwatiki. Itigi-tigi o ngorumino o hidal̄oko gënanga yao o kahoho-kahoho 14#Him. 9:2-3 hokä biahaua mangöe, hiadono yaomanga yamode-modekika o berera. Komaiwahi o nyawa yamake o kahoho hoko gënanga mangöe de gënanga de iböto mä ohali hoko gënanga komaiwaka i dadi. 15O tonaka mal̄okuku yamode-modekika hoihi tamunuku o kahoho hiädono itaromo holega-lega. Enanga yaol̄omo okia dika yabobinahaua o awana o es gënanga yöngohama o hohoko ha ol̄o-ol̄omo o gota mautuoka. O Mesir matonaka yamode-modekika koiwa naga moi ani o hoka-hoka mahou o gota-o gota mautuoka ekola idö dato-datomo.
16Ma koano de majapati wä ahoko o Musa deʼ o Harun daha wätemo, ”Ngohi tobaradohaka ma Jou nia Jou Madutuika deʼ nginika. 17Nihi apongo ahi baradoha mangale nanga mamoi, deʼ nimä niata ma Jou nia Jou Madutuika, hupaya anga wal̄ë ngohioka o hukumanga ina hohonenge nënanga.” 18O Musa wïmal̄a ma koano deʼ womä niata ma Jouika. 19Done ma Jou waidulu o hidal̄oko mameta imadadi o wange madumunu mahidal̄oko duru kaha kuata. O kahoho-kahoho gënanga o hidal̄oko yawuwu deʼ yao o Gelagah ma Ngötika. Kamoiö de koiwa naga igogogere o Mesir matonaka yamode-modekika. 20Mä ma Jou wadiai ma koano watogowini ai haëke, deʼ ünanga wähigumal̄aua o Israel manyawa yoiki.
Duru ma hohohutu yatamunu o Mesir
21Ma Jou wïtemo o Musaika, ”Nagorakil̄e ani giama, done duru mahohohutu aha yatamunu o Mesir matonaka.” 22#Mzm. 105:28; Him. 16:10 O Musa wagorakil̄e ai giama, deʼ o wange hangeino madekana duru mahohohutu yatamunuku o Mesir matonaka yamode-modekika. 23O Mesir manyawa yakunua yamake okianaga deʼ madekanino gënanga moiua o nyawa kiaika naga yoiki. Mä o Israel manyawa manga tau-tauika kahirahi itararono.
24Daha ma koano wä ahoko o Musa deʼ wätemo, ”Ngini yakunu nioiki nihuba nihoromati nia Jouika. O ngongoheka deʼ ongoha-ngohaka yakunu yänïki. Mä o hapi, o duba, deʼ o kabingi yakunua niao.”
25O Musa wohaluhu, ”Nako hoko gënanga ahi Tuanga kokiani no mihi döaka o aiwani o gigini hupaya o huba deʼ mangale o huhuba i haro-harongo ma Jouika, tongomi mia Jou Madutu. 26Mata-mata tongomi mia aiwani o giginii kokiani ngomi miao; kao dutu moiö ma aha yakunua ngomi mia mal̄aika. O aiwani o giginoka gënanga ngomi mia iriki kiaka aha mihi huba ma Jouika tongomi mia Jou Madutu. Dokengoka dahao ngomi aha mihi öriki o aiwani o gigini kiaka aha ngomi mihihuba.”
27Ma Jou wihidadi ma koano ai haëke itogowini hiädono ünanga woluku wähigumal̄a o Israel manyawa yoiki. 28Ma koano wïtemo o Musaika, ”Noikoka ahi himangoka! Uha hiädono ngona tonimakeoli! Nako hiädono tamakeoli ani biono, ngona aha nohonenge!”
29”Hokä ani demo ahi Tuanga,” o Musa wato, ”Ahi Tuanga marai aha nohi makeokaua ngohi.”
Currently Selected:
O KELUARAN 10: TLB
Highlight
Share
Compare
Copy
Want to have your highlights saved across all your devices? Sign up or sign in
