O KELUARAN 11
11
O Musa wohingahu aha idadi o ngohaka o riaka yohonenge
1Ma Jou wïtemo o Musaika, ”Ngohi aha töditifa o bodito moiohi o Mesir ma koano deʼ ai kawahauku. Genanga de iböto, ünanga aha winïhi gumal̄a ngini nioiki. Igoungu ngini mata-mata aha nenangokadau de inï duhu. 2Hababu gënanga nimä teke ade-ade de o Israel manyawa; nähuloko önanga yogahoko o poromu o gurasi deʼ o haaka imakokadatekika.” 3Ma Jou wadiai o Mesir manyawa yöigo yahidoaka o Israel manyawaika. Dë o Musa wodadi o nyawa duru iwi höhoromati yopopegawe deʼ yongodumu o Mesir makawaha.
4O Musa wïtemo ma koanoika, ”Hoko nënanga ma Jou wotemo, ’Done hö idu gorona Ngohi aha tokaika-tokaino tatailako o Mesir matonaka. 5Moi-moi o ngohaka o nauru mariaka o Mesir mabereraka aha yohonenge, mulaenge ma koano aingohaka hiädono o gogilaongo o ngongoheka o gandum yotü tutuku manga ngohaka. Mata-mata o aiwani o gigini mangohaka madodihiraka ahaoli ihonenge. 6O Mesir yamode-modekika yoihene o dodora mailingi kahä kuatil̄e hokä komaiwahi idadi deʼ aha koidadi okauaoli.’ 7Mä o Israel manga hidogoronaka, kayaoa o nyawa kayaoa o aiwani o gigini aha koyäburakitua. Done ngini aha nihi öriki Ngohi ma Jou, tadiai o Mesir manyawa ima keteroua deʼ o Israel manyawa.” 8Ma baha o Musa wotemo, ”Mata-mata ahi Tuanga ani pegawe aha yoböa deʼ yohuba yatilabukuku ahi himangoka deʼ yogahoko hupaya ngohi deʼ ahi nyawa mia mal̄a o berera nënanga. Genanga de iböto ngohi aha toiki.” Daha o Musa duru de ai dohata wïmal̄a ma koano.
9Ma Jou wïtemo o Musaika, ”Ma koano aha wahaduliua ani demo, hupaya Ngohi todiai iholoi iwöe ihöhera-heranga o Mesir yamode-modekika.” 10O Musa deʼ o Harun yodiai mata-mata ihöhera-heranga ma koano aihimangoka, mä ma Jou wadiai ünanga itogowini ai haeke, hiädono ünanga woluku wahigumal̄a o Israel manyawa yamal̄a ai berera.
Currently Selected:
O KELUARAN 11: TLB
Highlight
Share
Compare
Copy
Want to have your highlights saved across all your devices? Sign up or sign in
