O KELUARAN 9
9
O aiwani ogigini ihonenge
1Ma Jou wïtemo o Musaika, ”Noiki nïhimanga ma koano, deʼ na hetongo unangika ma Jou o Ibrani manyawa manga Jou Madutu, wotemo: ’Nä higumal̄a Ahi umati yoiki hupaya önanga yakunu ihihuba ihi horomati ngohino. 2Nako ngona noluku nähigumal̄a önanga, 3ngohi aha tödotagao o panyake obobaku homodo-modongo ani aiwani ogiginika o kuda, o keledai, o onta, o hapi, o duba deʼ ani kabingi. 4Ngohi aha tohiteroua o Israel manyawa manga aiwani ogigini de o Mesir manyawa manga aiwani ogigini. O Israel manyawa manga aiwani ogigini kamoiö ma aha koihonengua. 5Ngohi ma Jou, tohi tatapu yarehe mawange la tadiai o hali gënanga.’ ”
6Yarehino mawange ma Jou wadiai hokä waheto-hetongoka. Mata-mata o Mesir manyawa manga aiwani ogigini ihonenge, mä o Israel manyawa manga aiwani ogigini kamoiö ma koiwa naga ihonenge. 7Ma koano waleha okia idadadioka, daha ihi ade-ade unangika o Israel manyawa manga aiwani ogigini kamoiö ma koiwa ihonenge. Mä ma koano watogowini ai haëke de woluku wahigumal̄a o Israel manyawa gënanga yoiki.
O panyake o boroho
8Ma Jou wätemo o Musa deʼ o Harunika, ”Nia l̄ë o kafo o haharongo mangïoka o bokoto muruono naga. Ma koano ai himangoka, o Musa kokiani wohi barihi o kafo gënanga o gitawail̄e. 9Done o kafo gënanga aha yodogerewoto o Mesir matonaka yamode-modekika. O nyawaika deʼ o aiwanika o kafo gënanga aha yapuda o boro-boroho de idilongo imadadi o nabo de magomukoka.” 10#Him. 16:2 Daha o Musa deʼ o Harun yol̄ë o kafo, deʼ iwï himanga ma koano. O Musa wohibarihi o kafo gënanga o gitawail̄e. O nyawaika deʼ o aiwaniika ipuda o boro-boroho de idilongo ima dadi o nabo de ma gomukoka. 11Yomai-maihi yakunua iwï himanga o Musa karana manga röehe yamode-modekika iomanga de o boroho hokä o Mesir manyawa mahomoali. 12Mä ma Jou wadiai ma koano ai haëke itogowini, deʼ hokä waheto-hetongoka ma Jou, ma koano woluku wahaduli o Musa deʼ o Harun manga demo.
O awana o es
13Ma Jou wïtemo o Musaika, ”Noiki nïhimanga ma koano yarehe duru o ngoru-ngorumino, deʼ nohiädono unangika ma Jou, o Ibrani manyawa manga Jou Madutu: ’Namal̄a Ahi umati hupaya önanga yakunu yoiki ihi huba ihi horomati Ngohino. 14Ma moi nënanga Ngohi aha tinï dotagao o bodito duga-duga ka o popegawe deʼ o kawahaikaua dika, mä ngonaikaö, hupaya ngona nohi öriki o duniaka mata-mataika koiwa naga imaketero dede Ngohi. 15Hokanako Ngohi tomau tinï hukumu ngona deʼ ani kawaha de o panyake, marai ngini nibinahaka mata-mata kamamoi. 16#Rm. 9:17 Mä ngini Tinï mal̄aika niwango, hupaya Ngohi yakunu tohidumutu Ahi kuaha ngonaika, hiädono Ahi romanga ihi öriki yödogilianga o dunia yamode-modekika. 17Ngaro hoko gënanga ma ngona kaikurutil̄eohi ani hininga deʼ noluku nahigumal̄a Ahi umati yoiki. 18Yarehino o ngoru-ngorumino, maöraha kaimatero, Ngohi aha tinï dotagao o awana es homodo-modongo, komaiwahi idadi o Mesir mabereraka hokä kahuruonino hiadono öraha nënanga. 19Nahipareta hupaya mata-mata o aiwani ogigini deʼ hagala tongona madutu naga maporetoka yao o ngï irïrïdika. Mata-mata o nyawa deʼ o aiwani ogigini naga maporetoka deʼ yakunua imagogono aha yohonenge yabänga o awana o es.’ ” 20Yamuruono naga o popegawe manga hidogoronaka yömodongo ma Jou Ai demo. Onanga yä ao manga gogilaongo deʼ manga aiwani ogigini önanga yowohama o tau magoronaika hupaya ima gogono. 21Mä mahomoa yölegaikaua o hohininga gënanga deʼ yämal̄aika manga gogilaongo deʼ toönanga manga aiwani ogigini o tonaka i lua-luasoka.
22Daha ma Jou wïtemo o Musaika, ”Nohi döakil̄e ani giama, deʼ o awana o es aha iuti o Mesir matonaka yamode-modekika. O awana gënanga aha yäbänga o nyawa, o aiwani ogigini deʼ hagala idato-datomuku o dumuleoka.” 23O Musa wagorakil̄e ai diki-diki, deʼ ma Jou wohi guti o dotoreke deʼ o awana o es, deʼ o dotoreke de o leletongo yöduguti o duniauku. Ma Jou wohiguti 24#Him. 8:7, 16:21 o awana o es homodo-modongo ihi ginïki de o dotoreke de o leletongo ima kokepeleke. Genanga o awana o es duru ho modo-modongo i dadadi o Mesir mabereraka. 25O berera yamode-modekika o awana o es gënanga yabinaha hagala moi-moi o dumuleoka, idogoika o nyawa deʼ o aiwani ogigini Mata-mata idato-datomuku o dumuleoka ibodito deʼ o gota-gota mautu iruba iheleuru mangutuku. 26Duga-duga o Gosyen madaera, o Israel manyawa yogö gogeroka yäbängua o awana o es.
27Daha ma koano wä ahoko o Musa deʼ o Harun, deʼ wätemo, ”Ngohi to baradohaka. Ma Jou itiai, ngohi deʼ ahi kawaha midiaioka o howono. 28Nimä niata ma Jouika; ngomi yaoaka mihangihara karana o dotoreke deʼ o awana o es nënanga. Ngohi aha tahigumal̄a onanga yoiki. Ngini ngarouha nigogeroli nenangokadau.”
29O Musa wïtemo ma koanoika, ”Ngohi toma hiadonikaka o kota maporetoka de majapati, ngohi aha tagöraka ahi giama la tomä niata ma Jouika. O dotoreke aha imatogumu deʼ o awana o es aha irïdi, hupaya ahi Tuanga nohi öriki o dunia nënanga madutu toma Jou. 30Mä ngohi tohi öriki ahi tuanga deʼ o popegawe koniwï modonguahi ma Jou Madutuika.”
31O rukiti idato-datomuku deʼ o buapo ibinaha, karana o rukiti magogiria i gobe-gobe. 32Mä o gandum deʼ o kahitela iboditoua karana ma orahowahi.
33Daha o Musa wïmal̄a ma koano de woiki o kota maporetika; dokengoka ünanga wagöraka ai giama la womä niata ma Jouika. O öraha genangö o dotoreke imatogumu, o awana o es deʼ o awana. 34Maöraha ma koano wamake okia idadadi, ünanga wobaradohaokali. Ünanga deʼ o popegawe kahirahi itogowini manga haëke. 35Hokä ma Jou waheto-hetongoka o Musaika, ma koano woluku wahigumal̄a o Israel manyawa yoiki.
Currently Selected:
O KELUARAN 9: TLB
Highlight
Share
Compare
Copy
Want to have your highlights saved across all your devices? Sign up or sign in
