Popular Bible Verses from O KELUARAN 10

Share

Ma Jou wïtemo o Musaika, ”Noiki nïhimanga ma koano. Ngohi tadiaioka ünanga deʼ o popegawe itogowini manga haëke, hupaya Ngohi takunu todiai ihöhera-heranga toönanga manga hidogoronaka, deʼ hupaya ngona yakunu nohijarita ani ngohaka de ani danongika sarakia Ngohi täule-ule o Mesir manyawa de ihöhera-heranga gënanga. Done ngini mata-mata aha nihi öriki Ngohi ma Jou.”

Ma Jou wïtemo o Musaika, ”Nagorakil̄e ani giama, done duru mahohohutu aha yatamunu o Mesir matonaka.” O Musa wagorakil̄e ai giama, deʼ o wange hangeino madekana duru mahohohutu yatamunuku o Mesir matonaka yamode-modekika. O Mesir manyawa yakunua yamake okianaga deʼ madekanino gënanga moiua o nyawa kiaika naga yoiki. Mä o Israel manyawa manga tau-tauika kahirahi itararono.

O Musa wagoraka ai diki-diki deʼ ma Jou wadiai o wange mahiwara ma hidal̄oko ital̄oko o bereraka gënanga o wange moi deʼ o hutu moi yahaiwatiki. Itigi-tigi o ngorumino o hidal̄oko gënanga yao o kahoho-kahoho hokä biahaua mangöe, hiadono yaomanga yamode-modekika o berera. Komaiwahi o nyawa yamake o kahoho hoko gënanga mangöe de gënanga de iböto mä ohali hoko gënanga komaiwaka i dadi.