Kls 3
3
1Hikolahu-ke leswi n'wipfuxiwiki kun'we na Kriste swoswi, djulisisani mintxhumu leyi minga ya le tilweni, lomu Kriste atrhamiki kone axitrhan'wini xa lidrumu xineneni xa Xikwembu Nkulukumba. 2Yanakanyani swa le tilweni, swinge swa laha misaveni. 3Hikusa n'wine n'wifile na Kriste a vutomi byenu byifihliwi kun'we na yene ku Xikwembu Nkulukumba. 4Loko Kriste inga vutomi byenu, ativonekisa, kutani na n'wine n'witavonekisiwa kun'we na yene a kuphatimeni kwake.
Vutomi lebyimpswha na Kriste
5Hileswo-ke, dlayani ku n'wine hinkwaku ku navela ka laha misaveni: a vumbuye, ni vuwoswi, ni vunfani, ni kunavela ka kubiha, ni kufelela loku kunga lixaka dra kugandrela swifaniso. 6A mintxhumu leyo mipfuxa mahlundru ya Xikwembu Nkulukumba henhla ka lavo vangayingisetikiki. 7Ke, kuvi hi ndlela leyo n'wine n'wifambiki ha yone khale, na n'waha hanya hi mintxhumu leyo; 8kambe swoswi humani ku swone, ka kulebya, ni kuhlundruka, ni tihanyi, ni kulumbeta, ni swifingeto leswi humaka anon'wini wenu. 9N'wingahembelaneni van'we ku van'wana, hikusa n'wine n'wihlivili a mhunu lweyi wa khale ni swiyentxo swake. 10#Lavisa Gn 1:26. Swoswi n'wine n'wiyambalile mhunu mumpswha, lweyi apfuxetiwaka kutiveni, hi xifaniso xa lweyi amuvumbiki; 11laha kungaliki na mu-Yuda nambi mugeriki, nambi ku lava vakusoka nambi ku lava vangasokiwangakiki, nambi vali va va-Barbara, kumbe mu-Cita, nambi xa kuva xikarawa, kambe kuntrhunxeka ha Kriste kuhinkwaswu ku hinkwavu.
12Leswi angavahlawuliwa va Xikwembu Nkulukumba, vaxwengi ni varandriwa hi leswo-ke vanani ni lilondro ni vunene, kutitrongohata ni kunabyala, ni kulehisa ka mbilu. 13Na n'wipfunana van'we ku van'wana, loko mun'we ali ni mhaka ya kusola kakukari ku mun'wana, drivalelanani van'we ku van'wana swanga hileswi Kriste an'widrivaleliki, na n'wine yentxisani xiswoswo. 14A henhla ka hinkwaswu, vanani ni lirandru, xinga xitrimbo xa kuhetiseka. 15A kufume timbilwini tenu a kurula ka Kriste, loku Xikwembu Nkulukumba an'wivitaneliki kone akuva n'wiyentxa miri min'we ntsena, vanani lava vatlangelaka.
16A ritu dra Kriste adrihanyi hi kuyandra ku n'wine, akutiveni hi hinkwaku, n'widondrisana ni kukwhavelana van'we ku van'wana hi kuyimbelela hi Mapsalma, ni tinsimu ta moya, n'wiyimbelelela Xikwembu Nkulukumba, n'witlangela hi mbilu hinkwayu. 17Hinkwaswu leswi n'wiswiyentxaka kumbe n'wiswihlayaka, aswiyentxiwe hi vito dra Hosi Yesu, ha yene, n'witlangela Xikwembu Nkulukumba Tatana.
Tinfanelo ta mintlhanganu
18Vavasati, yingesetani vanuna venu swanga hi leswi swifanelaka ku lweyi apfumelaka ku Hosi. 19Vavanuna, randrani vasati venu n'winga vahlundrukeleni.
20Vana, yingisetani vapswali venu ku hinkwaswu hikusa leswo swi trhavisa Hosi. 21N'wine vapswali, n'winga hlundrukiseni vana venu akuva vone vangatihela mbilu.
22N'wine swikarawa, yingesetani amintxhun'wini hinkwayu, a vinyi venu va laha misaveni, n'wingavatireli hi loko va n'wilavisile, swanga hi loko n'witrhavisa vhanu, kambe swiyentxani hi mbilu ya kunabyala na n'witxhava Xikwembu Nkulukumba. 23Hinkwaswu leswi n'wiswiyentxaka, swiyentxani hi mbilu hinkwayu, swanga hi loko n'witirela Hosi, na kunge vhanu. 24Drimukani leswaku n'witayamukela hakelo dra pfindla ku Hosi, hikusa n'witirela Kriste, lweyi anga Hosi. 25Kambe lweyi ayentxaka swakubiha ata yamukela hakelo dra swakubiha, hikusa akuhlawuliwi ni mun'we.
Currently Selected:
Kls 3: NTX2007
Highlight
Copy
Compare
Share
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.
