EFESUS 5
5
Idup neak lem te'ang
1Udi adeba anok-anok Allah de tekasiak, sebab o udi harus temotoa teladan Allah. 2#Kel. 29:18 Idupba neak lem kasih, awei ipe Kristus Yesus kulo bi mengasihi udi ngen bi semreak dirai-Ne utuk ite sebagoi persembahan ngen kurban de semnang atei Allah.
3Udi adeba umat Allah, sebab o, plep-plep kidek de coa patut, atau serakah, coa patas ade neak tengeak-tengeak udi. Jibeak sapei tun luyen temuan alasan utuk madeak bahwo udi menea hal-hal awei o. 4Awei o kulo kecek de coa baik, de kosong atau basing bae – kerno hal-hal o coa patas – tapi sebelekne mucepba syukur. 5Tingetba dio baik baik: tun de menea plep kidek, atau coa wajar, atau serakeak, taine nyembeak patung, tun o coa dapet jijai anggota umat Allah.
6Jibeakba udi jijai seset ngen kecek-kecek de coa benea. Kerno hal-hal de awei o menea Allah murka das tun-tun durhako. 7Sebab o jibeakba udi kuat ngen tobo'o. 8Memang bel'o udi ade neak lem kelem, tapi uyo udi adeba te'ang neak lem Tuhan. Sebab o idupba sebagoi anok-anok te'ang, 9kerno kunei te'ang timboa kebaikan, keadilan ngen kebenaran, 10berusahoba kemnal jano de semnang atei Tuhan. 11Jibeakba menea plep-plep de coa beguno de nea tun-tun de idup lem kelem. Sebelekne, lokba udi muang hal-hal awei o. ( 12Sebab hal-hal de tobo'o nea seca'o bebunyin, utuk nadeak kulo bi selek.) 13Tapi kute de seneter neak lem te'ang, bakea keten ngen jelas, sebab kute de dapet kenliak ngen jelas, adeba te'ang. 14Do'oba sebabne de nadeak,
“Kelongonba, hoi udi de tidua
ngen jagaiba kunei tun-tun matei
ngen Kristus bakea bercahayo das udi.”
15Kerno o, kemliakba bebaik, awei ipe udi idup, jibeak awei tun bodong, tapi awei tun bijak. 16#Kol. 4:5 Neaba sebaik-baikne tiep kesepatan de ade ngen udi, kerno maso-maso yo adeba maso de kidek. 17Sebab o jibeakba udi bodong, tapi berusahoba supayo udi ngertai kelok Tuhan.
18Jibeakba udi mabuk ngen anggur, sebab do'o bakea musak udi, tapi lokba udi penuak ngen Roh, 19#Kol. 3:16-17 Pakeiba kecek-kecek kunei mazmur, legau puji-pujian ngen legau rohani. Lokba udi ngen riang atei mbin legau puji-pujian bagiak Tuhan. 20Bogoa mucep syukurba das kute sesuaktau lem gen Tuhante Yesus Kristus ngen Allah Bapa ite.
Kasiak Kristus adeba dasar idup duai keramin
21Utuk hormat ngen Kristus, lokba udi tunduk do ngen de luyen.
22 #
Kol. 3:18; 1Ptr. 3:1 Hoi ngenyan, hormatba ngen matennu awei ngen Tuhan, 23kerno sematen adeba pemipin ngenyan serai awei Kristus adeba pemipin jemaat. Siba de semlamat awok. 24Kerno'o, serai awei jemaat hormat ngen Kristus, awei o kulo lem kute hal ngenyan harus hormat ngen matenne.
25Hoi sematen, citoba ngenyannu awei Kristus bi cito ngen jemaat ngen bi semreak dirai-Ne bagiakne. #Kol. 3:19; 1Ptr. 3:7 26Kristus menea o supayo Si dapet semucai jemaat o ngen ajaran-Ne ngen liwet bioa baptisan, supayo sesudo'o Si dapet semreak-Ne ngen Allah. 27Ngen awei o Kristus mpek jemaat neak adep dirai-Ne ngen cemerlang, coa cacet atau cela, tapi supayo jemaat sucai ngen coa cacet. 28Awei o kulo sematen harus cito ngenyanne awei Si cito awokne suang. Api de cito ngenyanne, taine cito diraine suang. (29Sebab coa perneak tun jengik ngen awokne suang. Tapi jemago ngen murusne, serai awei Kristus te'adep jemaat-Ne. 30Kerno ite adeba anggota awok-Ne.) 31#Kej. 2:24 Lem Kiteb Sucai tetulis, “Sebab o suang semanei bakea teminggea tun tuaine utuk jijai do ngen ngenyanne, sehinggo keduaine jijai do.” 32Resio o lai, tapi de uku maksud adeba hubungan Kristus ngen jemaat. 33Tapi ayat o ade hubunganne kulo ngen udi: Lokba tiep sematen cito ngenyanne awei si cito diraine suang ngen lokba tiep ngenyan berusaho utuk hormat ngen matenne.
Currently Selected:
EFESUS 5: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
