EFESUS 6
6
Anok-anok ngen Indok Bapok
1 #
Kol. 3:20
Hoi anok-anok, taatba ngen tun tuaine neak lem Tuhan, kerno awei'oba de benea. 2#Kel. 20:12; Ul. 5:16 Hormatba ngen tun tuainu – dio adeba periteak de peting, awei de nyato kunei janjai yo: 3“Supayo udi bahagia ngen panjang omor neak bumai.”
4 #
Kol. 3:21
Ngen udi, Bapok-Bapok, jibeakba menea anok-anoknu jijai mengiak lem ateine, tapi najeaba tobo'o neak lem ajaran ngen nasihat Tuhan.
Hamba ngen Tuan
5 #
Kol. 3:22-25
Saudaro-saudaro de jijai budok, Taatba ngen periteak tuannu de neak dunio yo. Neaba do'o ngen perasaan hormat, taat serto ngen sungguak-sungguak, serai awei udi taat ngen Kristus. 6Jibeak cuma neak adep tobo'o bae utuk semnang atei manusio. Tapi lokba udi meneane sebagoi hamba Kristus de gidong temotoa kelok Allah ngen sepenuak atei. 7Kerjo de udi nea sebagoi hamba o, lokba udi kerjo ngen atei riang awei tun-tun de melayan Tuhan, iso manusio. 8Udi namen bahwo tiep tun, baik hamba atau tun bebas, amen si bi menea baik, si bakea temimo balasanne kunei Tuhan.
9 #
Ul. 10:17; Kol. 3:25, 4:1 Saudaro-saudaro de jijai tuan, neaba awei o kulo te'adep tobo'o ngen jibeakba pakei ngancam. Inget bahwo udi ngen hamba-hambanu o, sesamo temuan do majikan, adeba Tuhan de neak surgo, Si coa kemliak papea.
Senjato Allah de lekep
10Akherne, lokba udi kuet neak lem Tuhan, neak lem kekuatan kuaso-Ne. 11Nakeiba kute perlengkapan perang de nelei Allah ngen udi, supayo udi dapet betaen melawen tipu muslihat Iblis. 12Sebab ite berjuang isone melawen manusio, tapi melawen kekuatan kute iblis-iblis de kemuaso zaman de kidek yo. Ite melawen kekuatan roh-roh kidek de kemuaso udara. 13Sebab o mokba kute perlengkapan senjato Allah, supayo udi dapet menea perlawanan pado bilai de kidek o ngen tep je, sesudo udi semlesei kute sesuaktau.
14 #
Yes. 11:5, 59:17 Jijai, lokba udi siap siaga, nakeiba kesetiaan ngen Allah sebagai teng, ketulusan sebagai bajau besainu.
15 #
Yes. 52:7
Lokba kerelaan utuk melei namen Bito Baik de mbin sejahtera jijai sepatunu. 16Tiep waktau nakeiba percayonu ngen Tuhan sebagoi senjato penangkis, ngen imen o udi dapet madem kute anok panah beropoi kunei tun jahat. 17#Yes. 59:17 Mokba keselamatan sebagai tudung baja, ngen kecek Allah sebagai pedang kunei Roh Allah. 18Neaba kutene o samo bedu'o utuk minoi tulung ngen Allah, bedu'oba tiep waktau neak lem Roh Allah. Lokba udi bogoa siap ngen jibeak nyereak. Bedu'oba utuk kute umat Allah. 19Ngen bedu'oba kulo utuk uku, supayo pado waktau uku miling, Allah melei ngen uku kecek-kecek de benea, supayo uku ngen binai melei namen resio Bito Baik o. 20Kerno Bito Baik o ba, uku jijai suang utusan de nasuk sel. Bedu'oba supayo uku binai miling tetang Bito Baik o, de awei ipe seharusne uku miling.
Salam terakhir
21 #
Kis. 20:4; 2Tim. 4:12 #Kol. 4:7-8 Supayo udi namen keadaanku ngen kerjoku, mako Tikhikus, saudarote ngen pelayan de setia lem kerjo Tuhan, bakea melei namen ngen udi kute sesuaktau tetang uku. 22Do'oba sebabne uku mutus si ngen udi utuk melei namen keadaan keme ngen udi kutene, supayo si mibur ateinu. 23Damoi sejahtera ngen kasih ngen imen kunei Allah Bapa ngen kunei Tuhan Yesus Kristus semerto udi kutene. 24Angerah Allah semerto kute tun, de mengasihi Tuhante Yesus Kristus ngen kasih de coa benaso.
Hormat keme, Paulus
Currently Selected:
EFESUS 6: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
