EFESUS 4
4
Kesatuan jemaat ngen karunio de beda
1Sebab o, uku, tun de nasuk sel kerno Tuhan, melei nasihat ngen udi, supayo idupnu sesuoi ngen kedudukannu sebagoi tun de sudo nok Allah. 2#Kol. 3:12-13 Lokba udi rendeak atei, lemah lembut, ngen sabar. Kentenba kasiaknu ngen saling temulung. 3Berusahoba sungguak-sungguak utuk idup ngen damoi supayo kesatuan Roh Allah tep terpeliharo. 4Cuma ade do awok, ngen do Roh. Awei o kulo udi nok utuk do harapan de serai. 5Cuma ade do Tuhan, do imen, do baptisan, 6ngen do Allah de jijai Bapa kute tun. Siba Tuhan semesta alam, de bekerjo liwet kutene, ngen bekuaso neak lem kutene.
7Ite memasing temimo anugerah temurut jano de nelei Kristus. 8#Mzm. 68:19 Lem Kiteb Sucai tetulis,
“Ketiko Si kenek moi penan de lekat,
Si mbin tawanan-tawanan;
Si melei pelei-pelei ngen manusio.”
9Iso, “Si bi kenek” taine bahwo Si kulo bi tu'un moi bagian bumai de paling beak? 10Si de sudo tu'un, Si kulo de sudo kenek uak lebiak lekat kunei pado kute lenget, utuk melei kute sesuaktau. 11Siba de melei pelei-pelei ngen manusio, pa'o naket-Ne jijai rasul, de luyen jijai nebai, de luyen igai jijai tukang melei Bito Baik o, ngen de luyenne naket-Ne kulo jijai gu'au-gu'au ngen gembala-gembala. 12Dio nea-Ne supayo umat Allah lekep sepenuakne kunyau dapet melayani Tuhan ngen mbangun awok Kristus. 13Ngen awei o ite kute jijai do ngen imen de serai ngen pengertian de serai tetang Anok Allah. Ngen ite jijai tun-tun lai de tambeak an tambeak sempurno awei Kristus. 14Mako ite coa jijai anok-anok de terombang-ambing ngen coa tau arahne ngen memecem ajaran kunei tun-tun licik. Tobo'o menea tun seset ngen tipu muslihat tobo'o. 15Sebelekne, ite harus bepegong ngen kebenaran neak lem kasiak, sehinggo lem kute hal ite tambeak an tambeak jijai sempurno awei Kristus, de jijai Pemipin ite. 16#Kol. 2:19 Neak beak pipinan-Ne, kute anggota awok o tesusun rapi, ngen neket jijai do ngen pelayanan kute bagianne. Amen tiep-tiep anggota o bekerjo awei de seharusne, mako kute awok o bakea idup jijai lai ngen kuet lem kasiak.
Manusio blau
17Sebab o, uku madeak ngen uku temges dio ngen udi neak lem Tuhan: Jibeak idup igai awei tun-tun de coa kemnal Allah ngen pekeranne de sio-sio. 18Pekeran tobo'o bi kelem, uak kunei idup de asalne kunei Allah, kerno tobo'o coa temuan pengetahuan jejano tetang Allah kerno tobo'o telo atei. 19Tobo'o bi coa temuan selek igai, sehinggo tobo'o temotoa kute hawo nafsu, serakah menea kute plep kidek.
20Tapi Yesus Kristus de udi kemnal iso awei o. 21Udi bi temi'uk tetang Si. Ngen sebagoi penotoa-penotoa-Ne, udi bi najea kulo tetang sifet-sifet Allah de ade ngen-Si. 22#Kol. 3:9 Sebab o tenanggeaba manusio an ngen pola idup an de gidong nusak ngen kelok-kelokne de seset. 23Lokba atei ngen pekerannu jijai blau kutene. 24#Kej. 1:26; Kol. 3:10 Lokba udi idup sebagoi manusio blau de nea temurut kelok Allah neak lem kebenaran ngen kesucian de sesungguakne. 25#Za. 8:16 Kerno o, saudaro-saudaro kutene, jibeak igai mike. Jujurba ngen tun luyen, sebab ite kute adeba samo-samo anggota awok Kristus. 26#Mzm. 4:5 Amen udi ramah, jibeakba udi menea duso, jibeakba bogoa mengiak tiep bilai, 27supayo Iblis coa dapet kesempatan. 28Tun de galok maling, jibeakba si maling igai. Sebelekne si harus kerjo supayo dapet nafkahne ngen jujur, dapet mulung tun de peset. 29Jibeakba ade kecek de coa baik keluea kunei bibianu, tapi pakeiba kecek de baik utuk mbimbing ngen mulung tun luyen. Kecek-kecek awei o bakea jijai kebaikan ngen tun-tun de temi'ukne. 30Jibeakba udi menea atei Roh Allah jijai ibo, de sudo memateraikan udi ayok bilai penyelamatan. 31Nuangba kute perasaan gis atei, garang mengiak, gu'ok ngen fitneak, awei o kulo kute kejahatan. 32#Kol. 3:13 Tapi lokba udi ramah te'adep tun luyen, baik atei ngen samo melei apun, awei Allah bi mapun udi neak lem Kristus.
Currently Selected:
EFESUS 4: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
