1 Vakorintho 15
15
1Kalunu, avamitu, mmannya mwinye ivangeli ya nda mwilwadzira, ya mwa vugula, niyo ya mu singiye muyo, 2kandi niyo ya mu honnyeywi mu, ni mu gumira ligali likuva lya nda mwilwadzira, ni mu ta mwa suuvira vutswa. 3Kigira mmali kumuha kutanga yaga aga nda vugula: kuli Kristo ya kudza kigira ubwoni bwetu kuli mang'oda; 4kandi ya tebwa; kandi u mali kusimu gukidzwa ku lidiku lya kavaka kuli mang'oda; 5kandi kuli ya loleka ku Kefa; kandi Ja loleka ku ava li likumi na vaviri; 6kandi ya loleka ku avamitu ava vita tsimia tsitano halala avobunyingi bwavo bu kikiri ho kali kalunu, navutswa avalala kuvo va mali kugona; 7kandi ya loleka ku Yakobo; kandi ya loleka ku vatumwa vosi; 8inyima wa vosi kuli wivulwa mu inyinga i ta dukani, ya loleka ku inze. 9Kigira inze mbeye mke ku vatumwa, u ta dukani kulangwa mutumwa, kigira nda dambidza livugana lya Nyasaye. 10Navutswa kigira tsimbabasi tsya Nyasaye mbeye kuli mbeye: kandi tsimbabasi tsitsye tsya nda hebwa si tsi veye tsya vutswa; navutswa inze nda kola miyinzi kuvita vosi: navutswa si ya li inze, navutswa tsimba basi tsya Nyasaye tsya li halala na inze. 11Kunangwa na a va na a veye inze, kinga ni va va ni va veye yavo, na ndiyo kwilwadzanga, kandi ni ndiyo mwa suuvira.
12Kunangwa Kristo na a va ni yilwadzangwa ya simuguka kutwula mu vakudzu, ga veye ndi avalala hagati henyu va vola si ha veye nelisimugukidzwa lyavakudzu? 13Navutswa ni ha va ni ha ta veye nelisimuguka lyavakudzu, kandi Kristo si ya simugukidzwa: 14kandi Kristo na a va ni ya vula ku simugukidzwa, lilwadza lyetu li veye vutswa, kandi lisuuvira lyenyu li veye vutswa. 15Kandi kwinye ku loleywi kuva avaloli vobubehi va Nyasaye; kigira kwa lolekidza ku Nyasaye ya simugukidza Kristo wa ya vula kusimugukidza, avakudzu ni va va ni va vula kusimugukidzwa. 16Kigira avakudzu ni va va ni va vula kusimugukidzwa, kandi Kristo si ya simugukidzwa: 17kandi Kristo na a va ni ya vula kusimugukidzwa, lisuuvira lyenyu li veye vutswa; kuduka kalunu mu veye mu bwoni bwenyu. 18Kandi yava ava mali kugona mu Kristo va divi. 19Kwinye ni ku va ni ku suuviye mu Kristo mu inyinga yiyi yeng'ine, ku veye avayingu kuvita avandu vosi.
20Navutswa kalunu Kristo u mali kusimuguka kutwula mu vakudzu, ubuhya bwa yavo ava gonanga. 21Kunangwa kigira likudza lya dukira ku mundu, kandi lisimuguka lyavakudzu lya dukira ku mundu. 22Kigira kuli vosi va kudzira mu Adamu, kandi ndiyo mu Kristo vosi va la kolwa kuva mwoyo. 23Na vutswa sa mulala a veye ku bwibwe mwene: Kristo a veye ubuhya; ulwenyima ava veye va Kristo mu lidza lilye. 24Hene yaho kiheri ki la duka, ma Kristo a la ha Nyasaye Dada ubwami, lwa a li mala kuheridza ubwamefu bwosi, nobugali bwo si, netsingulu tsyosi. 25Kigira ga mu dukira yamehe a luhe a duke kuvika avasigu veve vosi isi wetsinduvatiru tsitsye. 26Musigu muheriridzi wokuheridzwa a veye likudza. 27Kigira ya vika vindu vyosi isi wetsinduvatiru tsitsye. Navutswa lwa a vola, Vindu vyosi vi vikeywi isi, vi loleka uyu wa vi vika isi si a veye isi. 28Kandi lwevindu vyosi vi li vikwa isi wewe, hene yaho Mwana mwene a la vikwa isi wa uyu wa vika vindu vyosi isi wewe, Nyasaye a ve vyosi mu vyosi.
29Ni ga ta li ndiyo, va la kola ki yavo ava batidzwa kigira avakudzu? Avakudzu ni va va ni va ta simuguka ligali, va batidzangwa kigira avakudzu kigira ki? 30Kandi kwinye ku veye mu buhimwa tsinyinga tsyosi kigira ki? 31Avamitu, mbolanga ku lidzominya lyange lya mbe nalyo kigira mwinye, mu Kristo Yesu Mwami wetu, nkudzanga lidiku nelidiku. 32Ni mba ni nonda miima gyavandu ni nkupana netsinyama tsyomulitu Efeso, ga la nkonya ki? Avakudzu ni va va ni va vula kusimugukidzwa, gendi ku lie, noku nwe kigira mugamba ku la kudza. 33M u ta gadwa mba: Ubu hambani ubudamano bwononnyanga miima milahi. 34Vuki bulahi, mu ta va mu lihambika, mu ta kola ubwoni; kigira avandi si va veye nelimanya Nyasaye: mbola yaga kumulegannya.
35Navutswa mulala a la vola, Avakudzu va la simugukizwa ndi? Kandi va twulanga nomubiri ku lugano ki? 36Ive musiru, kya u taga si ki hebwangwa livamwoyo ni ki va ni ki vula kukudza. 37Kandi kya u taga, si u taga mubiri gu li va ho, navutswa i veye inzoli vutswa, mbula i veye yengano, kinga yolugano lundi; 38navutswa Nyasaye a gi hedzanga mubiri kuli a yanza kandi ku tsinzoli tsyosi a tsi hedzanga imibiri gyatsyo tsyene. 39Tsinyama tsyosi si tsi veye lugano lulala: navutswa i veye ho inyama yomundu, kandi i veye ho inyama yindi yevirenge vine, kandi i veye ho inyama yindi yamanyonyi, kandi i veye ho yetsisudzi. 40Kandi gyi veye ho imibiri gyomigulu, nemibiri gya hasi: navutswa ubukumi bwegyomigulu bu veye lugano lulala, nobukumi bwegyahasi bu veye lugano lundi. 41Ha veye nobukumi bweliuva, nobundi bwomweli, nobundi bwetsing'ereng'ani; kigira tsing'ereng'ani tsyavukananga mu bukumi bwatsyo. 42Kandi ga veye ndiyo mu lisimuguka lyavaku dzu. Gu tagangwa mu bwoneku; gu simugukidzangwa mu livula kwoneka: 43gu tagangwa mu livula kwidzominywa; gu simugukidzangwa mu lidzominywa: gu tagangwa mu budedekere; gu simugukidzangwa mu tsingulu: 44gu tagangwa mubiri gwomwika; gu simugukidzangwa mubiri gwa roho. Ni ha va ni ha veye nomubiri gwomwika, kandi ha veye nomubiri gwa roho. 45Kandi ndiyo ga ng'odwa, Mundu wembiri Adamu ya gwa mwika gwelivamwoyo. Adamu wenyima ya gwa roho gu haana livamwoyo. 46Navutswa uyu wa roho si a li wembiri, navutswa uyu womwika, lwenyima uyu wa roho. 47Mundu wembiri ya twula mu lirova, a veye wamarova: mundu wa kaviri ya twula migulu. 48Kuli uyu wamarova a veye, va veye ndiyo kandi avamarova: kandi kuli uyu womigulu a veye, va veye ndiyo kandi avomigulu. 49Kandi kuli kwa vugula ligondo lya uyu wamarova, na ndiyo kwinye ku la vugula ligondo lya uyu womigulu.
50Kalunu mbola yaga, avamitu, inyama namasahi si ga nyala kunyola ubwami bwa Nyasaye; kinga ubwoneku si bu nyala kunyola ubu ta li ubwoneku. 51Henzi, mbolera mwinye inkuva i viseywi: Kwinye si ku la gona vosi, navutswa ku la giru nkanywa vosi, 52nonoho, kuli li vunavuna lyemoni, lwa ki li kupwa kisiliva kyekiheri: kigira kisiliva ki langirira, navakudzu va la simugukidzwa va ta li nobwoneku, na kwinye ku la girunkanywa. 53Kigira ga dukira ubwoneku yibu bu vikwe ubu ta li tlbwoneku, kandi lihambana nelikudza li vikwe livula kukudza 54Navutswa ubwoneku yibu lwa bu li mala kuvikwa livula kwoneka, ka ndi lihambana nelikudza lwa li la mala kuvikwa li vula kukudza, hene yaho li la duka livola lya ng'odwa yili, Likudza li mireywi mu liguutwa 55Ive likudza, liguuta lilyo li veye haliha? Ive kihadisi, ulusere lulwo lu veye haliha? 56Ulusere lwelikudza lu veye ubwoni; netsingulu tsyobwoni tsi veye lilaga: 57navutswa Nyasaye a santidzwe u ku hedzanga liguuta kigira Yesu Kristo Mwami wetu. 58Kunangwa avamitu ava yanze vange, mu dinye, mu ta nyalika kusundwa, mu kole miyinzi gye Mwami nobugulu tsinyinga tsyosi, kigira mu manya liyinzira lyenyu si li veye lya vutswa mu Mwami. Kalunu ku isadaka i vungidzi.
Currently Selected:
1 Vakorintho 15: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
