1 Vakorintho 14
14
1Mu lorlde ubuyanzi; halala na yaga mwenye ligali vihaanwa vya roho, navutswa kindu kinene mu duke kuprofeta. 2Kigira uyu u volanga lundi lulimi si a volera vandu, navutswa a volera Nyasaye; kigira si ha veye nomundu u huliranga; navutswa mu roho gwigwe a volanga vindu vi viseywi. 3Navutswa uyu u profetanga a volera avandu vindu vyelyombaka, nevyokukonya, nevyokuleminya mwoyo. 4Uyu u vola nga nolulimi yeyombakiranga mwene; navutswa uyu u profetanga yombakanga livugana. 5Kunangwa nyenya mwinye mwosi kuvola netsinimi, navutswa kinene nokuprofeta: kandi uyu u profetanga a veye munene kuvita uyu u vola netsinimi, bugira na a ta girunkannya, livugana li duke kwombakwa. 6Navutswa kalunu, avamitu, inze ni mba ni ntsitsa ku mwinye nokuvola netsinimi, nda mu konya ki, bugira ni nta vola mu livuula, kinga mu limanya, kinga mu liprofeta, kinga mu lyegidza? 7Kali vindu vi ta li nelivamwoyo, ni vi kupa ulwanga, ni ki va kisiliva, kinga ubukana, ni vi ta kupa ulwanga olu veye nelyavukana ga la manyekana ndi ulwanga lwekisiliva kinga lwobukana? 8Kigira ling'alala ni li kupa lwanga lu ta manyekana bulahi, ibwaha u nyala kwetegeka ku lihe zana? 9Kandi mwinye mu veye ndiyo, ni mu ta vola amakuva nolulimi lu ta manyekana bwangu aga volangwa zana ga la manyekana ndi? Kigira mu la va ava volera mwika. 10Mbula tsi veye ho tsinimi tsinyingi mu lirova, si ha veye nolulala olu ta veye nemiima gyalyo. 11Kunangwa ni nta mmanya miima gyomwoyo, nda va mugeni ku uyu u volanga, ka ndi u volanga a la va mugeni ku inze. 12Kandi mwinye mu veye ndiyo, kigira mu kayirangwa kunyola vihaanwa vya Roho, mwinye mu duke kukiridzirwa kigira lyombaka livugana. 13Kigira yaga uyu u volanga netsinimi a saale a duke kugirunkannya. 14Kigira ni mba ni nsaala netsinimi, roho gwange gu saala, navutswa ubugeeri bwange si bu nyola makuyu. 15Kunangwa ni kindu ki? Nda saala na roho, nda saala nobugeeri kandi: ndimba na ro ho, kandi ndimba nobugeeri. 16Kinga nu u va nu u gasidza na roho, u veye haluvega lwa u ta manya a la vola ndi, Amini, ku lisantidza lilyo, na a ta manyi aga u volanga? 17Kigira ive ligali u santidza bulahi, navutswa wundi si yombakwa. 18Nsantidza Nyasaye kigira mbola netsinimi kuvita mwinye vosi; 19navutswa mu livugana nyenya kuvola amakuva gatano nobugeeri bwange, nduke kwegidza avandi, kuvita livola netsinimi amakuva tsielfu likumi.
20Avamitu, mu ta va avana mu bugeeri bwenyu: navutswa mu imbodoka mu ve kuli avana, navutswa mu ve avakulundu mu bugeeri. 21Ga ng'odwa mu lilaga, Nda volera avandu yava netsinimi tsindi, kandi neminwa gyavageni; navo si va li mbulira, kali ku yago, Mwami a vola. 22Kigira yaga tsinimi tsi veye kilolekidzu, kandi si tsi veye tsya yavo ava suuvira, navutswa tsya yavo ava vula kusuuvira: navutswa liprofeta li veye kilolekidzu, si ki veye kya yavo ava vula kusuuvira navutswa kya yavo ava suuviranga. 23Kunangwa livugana lyosi ni li va ni li vugana halala, na vosi va vola netsinimi, kandi ni vingira avandu ava vula kumanya kinga ava vula kusuuvira, si va la vola mu veye avalalu? 24Navutswa vosi ni va va ni va profeta, kandi ni yingira mulala wa vula kusuuvira kinga wa vula kumanya, vosi va mu vuuliye, vosi va mu kalagiye; 25vindu vyomu mwoyo gwigwe vi viseywi vi lang'aminyeywi; ma a la gwa mammama nokusigamira Nyasaye, na hene yaho a la vola Nyasaye a veye hagati henyu ligali.
26Ni kindu ki, avamitu? Lwa mu vugani halala mundu sa mulala a veye na zaburi, a veye nelyegidza, a veye nelivuula, a veye netsinimi, a veye neligirunkannya. Vindu vyosi vi kolwe kigira liyombaka. 27Ku vosi mundu na a vola mu tsinimi, ga ve ku vaviri kinga ga ta vita vavaka, kandi va londane, kandi mulala a girunkannye: 28navutswa ni ha ta veye nomugirunkannyi a kiring'ane mu livugana; yevolere mwene, kandi a volere Nyasaye. 29Avaprofeti va vole vaviri kinga vavaka, na vandi videre. 30Navutswa wu ndi wikaye himbi na a va na a vuu leywi kindu, wembiri a kiring'ane. 31Kigira mwosi mu nyala kuprofeta sa mulala, vosi veyegidze, kandi vosi va leminywe mwoyo; 32kandi roho gyavaprofeti gyegehidzira avaprofeti; 33kigira Nyasaye si a li Nyasaye wekivihiri, navutswa wemirembe; kuli ga veye mu mavugano gosi ga vatakatifu.
34Avakali va kiring'ane mu livugana: kigira si va veye nomunwa kuvola; navutswa vegehidze kuli welilaga li vola. 35Navo ni venya kuhulira kindu, va tevere avasatsa vavo avene yengo: kigira ni tsisoni mukali kuvola mu livugana. 36Ni kindu ki? Iikuva lya Nyasaye lya twula ku mwinye? Naho lya duka ku mwinye mweng'ine?
37Ku vosi mundu ni yeganagana kuva muprofeti, kinga wa roho, a manye yaga ga mmu ng'odera, ga veye malago go Mwami. 38Navutswa ku vosi mundu u veye musiru, a ve musiru. 39Kigira yaga, avamitu, mwenye ligali kuprofeta, kandi mu ta gaya kuvola netsinimi. 40Navutswa vindu vyosi vi kolwe kuli wa ga dukanga, kandi kuli miima milahi.
Currently Selected:
1 Vakorintho 14: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
