OBUBALI 16
16
Induli ya Kora, Datsani nende Abiramu
1Kora omwana wa Isihari, omwitsukhulu wa Kohatsi owolwibulo lwa Lawi, halala nende Datsani nende Abiramu abasiani ba Eliabu, na Oni omusiani wa Peletsi, abolwibulo lwa Rubeni,#Yuda 11 2halala nende Abaisiraeli tsimia tsibili namakhumi karano, abemeli beifuma indahi abelwa nomukanda kwa Baisiraeli bakhol'la obwemeli bwa Musa indiri. 3Nibebunjikha halala okhufukula Musa nende Haruni, ma nibababool'la mbu, “Mubiriliye okhusila! Abandu bosi bomukanda kwa Abaisiraeli nabandu bo MWAMI, ne OMWAMI ali halala n'nefwe fwesi. Kho busina ibe Musa wekholanga omukhongo okhuyomba abandu bo MWAMI bosi?”
4Ne olwa Musa yahul'la akene yaka, yakwa hasi ma nasaaya. 5Ma nabool'la Kora nende abomukanda kukwe mbu, “Mukamba tsuli OMWAMI alamanyia omundu oli owuwe, khandi oli omutsienukhu, ne nahuchil'la omundu oli ouwe yesunda ahembi khuye halusambwa. Omundu owa yetsa okhwahula niye owitsa okhwesunda ahembi khuye. 6Kho ibe Kora nomukandakwo kwosi, mubukule tsindaabo tsiomul'lo 7ma mutsirekhwo amanda komul'lo akang'alaye nende obwali ma mutsihile khulusambwa mukamba tsuli. Kho nakhulole niwina owo OMWAMI nayahule ne niye owanobe omutsienukhu. Inywe Abalawi ninywe ababiriliye okhusila!”
8Ma Musa nabool'la Kora mbu, “Hulile, Inywe Abalawi! 9Mupaalanga neling'ana litititi mbu Nyasaye wa Isiraeli wamwahula okhurula mumukanda kwa Baisiraeli bandi kho mube abanyala okhwesunda ahembi aha ye mwene ali, ma mukholenje omulimo kwenywe Mwiheema lio MWAMI, nimukhola omulimo kwenywe kwoburumikhi khumukanda noho? 10OMWAMI wamuhelesia inywe nende Abalawi bandi oluyali yilu; ne luno murunanga omulimo kwobwesaalisi khandi! 11Olwa mwekaananga Haruni kho OMWAMI niye owa mwekaananga. Ibe halala nende abomukanda kukwo mufukulanga OMWAMI.”
12Musa naruma abandu okhulanga Datsani nende Abiramu, abaana ba Eliabu; nabo nibakalusia mbu; “Sikhunyala okhwitsa tawe! 13Opaalanga mbu neling'ana litititi, ibe okhukhuhinia musibala sie Misiri esietsulamwo ebiamo ebinji khandi esinolu, mbu okhwir're musitsiimi sino? Ne luno wekholanga omukhongo khu ifwe? 14Kata siokhwinjisisie musibala esietsulamwo ebiamo ebinji nende obunolu, nohomba okhukhuhelesia obulaame bwemikunda, nende emikunda chiemisabibu tawe; ne luno oteemanga okhukhukaata. Sikhunyala okhwitsa tawe.”
15Ne Musa nahambwa noburima okhusila, ma nabool'la OMWAMI mbu, “Orahuchil'la esihanwa siabwe tawe. Ise sili okhubukulakhwo kata esikhili ndala okhurula khubo, nohomba okhukhol'la omundu wosi khubo liibi liosi tawe.”
16Ma Musa nabool'la Kora mbu, “Mukamba Ibe nende abomukandakwo kwosi abandu tsimia tsibili namakhumi karano okhwola mwitse mwiheema liokhubaho khwo MWAMI; Haruni naye nabeho. 17Simulala khwinywe nabukule olutaabolwe, narakho obwali, naluhaana khulusambwa.” 18Nibabukula buli mundu olutaabolwe, nibarakhwo amanda komul'lo akang'alaye nende obwali, ma nibasinjila hamuliangokwe Liheema liokhubaho khwo MWAMI halala nende Musa na Haruni. 19Kora naye nabunjelesia omukanda kwosi ma nibasinjila nibahengan'ne nende Musa na Haruni hamuliangokwe Liheema. Nonoho obulafu obukhongo obumanyianga okhubaho khwo MWAMI nibulolekha khubomukanda kwosi. 20Ma OMWAMI nabool'la Musa nende Haruni mbu, 21“Musinjile ehale okhurula mumukanda yiku, nase nzia okhubeera bosi matetekhana.”
22Nebutswa Musa nende Haruni nibasikama nibeenamia obweni bwabwe, nibaboola mbu, “E Nyasaye, nibe obulamu. Olwomundu mulala yoonanga, wakhatil'la omukanda kwosi oburima noho?”
23OMWAMI nabool'la Musa mbu, 24“Bool'la abandu besunde ehale okhurula khumaheema ka Kora, Datsani, nende Abiramu.”
25Kho Musa nabuukha natsia aha Datsani nende Abiramu bali; ne abakhulundu ba Isiraeli nibamulonda munyuma. 26Ma nabool'la abomukanda mbu, “Sinjile ehale okhurula khumaheema kabandu ababi yaba, kata muratilakhwo khusindu siabwe siosi tawe, khase mulakhuywa halala n'nabo khulwe tsimbi tsiabwe.” 27Kho barula khumaheema ka Kora, Datsani nende Abiramu.
Datsani nende Abiramu bali nibarul'le esioba ma nibasinjiye hamiliango chiamaheema kabwe, halala nabakhasi babwe nende abaana babwe. 28Musa naboola mbu, “Luno mulamanyila khwing'ana lino mbu OMWAMI yaaruma okhukhola emilimo chino chiosi; ne sinjikhol'le khubwanje omwene tawe. 29Abandu bano nibaba nibafwa singa abandu bosi bafwitsanga, nohomba nibaba nibahambwa nolumbe singa abandu bosi, kho kalamanyia OMWAMI siyayiruma tawe. 30Nebutswa OMWAMI naba nakhola ling'ana liiyia, liloba liene niliasamie omunwa nilibamila bukala, nende ebindu biabwe biosi pe, nibeekha nibatsia Emakombe nibali mwoyo; kho mumanye mbu abandu bano bali okhufukula OMWAMI.”
31Nikaba mbu olwa yali niyakhamala okhuboola amang'ana yako kosi, liloba elia basinjilakhwo liatikha, 32ne liloba liene niliasamia omunwa nilibamila bukala, nende abomutsinyumba tsiabwe, nabandu bosi abali abolwibulo lwa Kora, nende emiandu chiabwe chiosi. 33Kho abene nibeekha nibatsia Emakombe nibali mwoyo, halala nemiandu chiabwe. Liloba nilibafuunikha, nibakora okhurula khubandu. 34Abaisiraeli bosi abali nibasinjiyeho beelukha olwa bahul'la etsikhwisi tsiabwe. Bahanzukha nibaboola mbu, “Yilukhe! Liloba liakhakhumila nefwe khandi.”
35Ma OMWAMI naruma omul'lo okhusamba abandu etsimia tsibili namakhumi karano abali nibahan'ne obwali khulusambwa, ma nibakhakha.
Tsisalilo tsiomul'lo
36OMWAMI nabool'la Musa mbu, 37“Bool'la Eliasa omusiani womwesaalisi Haruni mbu atoole etsisalilo tsiomukasa yitsio etsiali nitsisikaye okhurula khubandu abali nibasambilwe ma asalaanie omul'lo kula ehale. Etsisalilo yitsio netsinzienukhu. 38Etsisalilo yitsio tsiamala nitsiba tsinzienukhu olwa tsiahanwa khulusambwa lwo MWAMI. Kho obukule etsisalilo tsiabandu abali okhusambwa khulwe tsimbi tsiabwe otsituye tsikwe etsisahani ma otsilombekhwo esifuunikho siolusambwa. Nalibe lichetsiyio khubandu ba Isiraeli.” 39Kho Eliasa omwesaalisi yabukula tsisalilo etsiomukasa, etsiabandu basambwa bala bali nibahaan'ne; nibatsilomba okhuba esifuunikho siolusambwa lwemisango. 40Yili liali lichetsiyio khubandu ba Isiraeli mbu omundu wosi arali owokhulwibulo lwa Haruni arakhetsakhwo khulusambwa khulwo okhusamba obwali imbeli wo MWAMI tawe, khase yakherwa singa Kora nabomukandakwe. Yaka kosi kakholwa singa obwa OMWAMI yabool'la Eliasa okhubir'ra mu Musa.
Haruni ahonokosia abandu
41Nebutswa olwa bwasia mukamba, abomukanda kwosi kwabandu ba Isiraeli bamumuchil'la Musa nende Haruni nibaboola mbu, “Kho mwir're abandu bo MWAMI.” 42Olwa bali nibabukaan'ne khulwo okhufukula Musa nende Haruni, basukhana okhuhenga ahe Liheema liokhubaho khwo MWAMI liali; ne nibalola lilumbesi liali nilifuunikhile Liheema tsana khandi obulafu obukhongo obumanyianga okhubaho khwo MWAMI bwali nibulolekhele. 43Ma Musa nende Haruni nibeetsa ma nibasinjila imbeli we Liheema. 44Ma OMWAMI nabool'la Musa mbu, 45“Esunde ehale okhurula khumukanda yiku, nase nzia okhuber'ra habali yaho.”
Ne Musa nende Haruni basikama nibenamia obweni bwabwe hasi. 46Musa nabool'la Haruni mbu, “Bukula olusalilolwo, orekhwo omul'lo okhurula khulusambwa, khandi orekhwo obwali ma oluhile bwangu ahabandu bali, obalombele omusango kwokhubasiya. Huchila! Lirima lio MWAMI limal'le okhusundukha nelikhupako liokhwira abandu lichiachile.” 47Haruni naye yakhola mbwo singa obwa Musa yamubool'la, yabukula olusalilolwe lwomul'lo niyelukha natsia hakari womukanda kwabandu. Olwa yalola mbu olufu lwali niluchiachile mubandu, yara obwali khumanda komul'lo ma nakhola omulukha khulwokhusiiya abandu. 48Nasinjila hakari wabafu nende abali mwoyo; ma olufu nilulekha okhwira abandu. 49Ne abafwa khulwo olumbe yilwo bali etsielefu likhumi natsine netsimia tsine natsitaru, norabbaliyemwo yabo abafwa khulwe induli ya Kora tawe. 50Naye Haruni nakalukha khu Musa, owali nali habwinjil'lo bwe Liheema olwo olufu lwali nilulekhele okhwira abandu.
Currently Selected:
OBUBALI 16: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
