OBUBALI 15

Amalako khukemisango

1OMWAMI yahelesia Musa 2amalako kano khulwa Baisiraeli okhulonda olwa nababe nibenjiye musibala esia naabe nabahelesisie. 3Munyala okhuhaana khu MWAMI echulukhi limiiku nohomba likondi liosi kata imbusi singa omusango kwokhusambwa nohomba omusango kundi kwosi khulwo okhuhesia esiesuho, nohomba esihanwa siokhwehaana nohomba mumatukhu kamasabo; okhuhunya khwebihanwa biebiokhulia yibi khuyanzisianga OMWAMI. 4Kho uyo ohananga likondi nohomba imbusi singa omusango kwokhusambwa khu MWAMI, okhwola aleere halala nomuruko yikwo, mbu ekilo ndala eyobusie obunyukhe obutsokanibwemwo eliita ndala yamafura, 5nende omusango kwobuswache halala nende eliita ndala eyewaini. 6Ne nikali mbu limiiku nilio elihanwa singa omusango, lihanwe halala nende etsikilo chibili echiobusie nibutsokanibwemwo eliita ndala nende enusu yamafura singa omusango kwobuswache, 7halala nende eliita ndala nende enusu eyewaini khulwo omusango kwokhutsukhil'lwa. Okhuhunya khwemisango yitsi khuyanzisianga OMWAMI. 8Ne olwe echulukhi ehanwa khu MWAMI singa omusango kwokhusambwa, nohomba singa omusango kundi okwokhuhesia esiesuho, nohomba singa omusango kwobuhambani, 9kho halala nechulukhi tsana, uyo ohaana aleere omusango kwobuswache okuhela etsikilo tsitaru tsiobusie obunyukhe obutsokanibwemwo etsiliita tsibili etsia amafura, 10halala netsilita tsibili etsiewaini. Okhuhunya khwomusango yiku khuyanzisianga OMWAMI.

11Yibio nibio ebilahaanwa halala nende buli echulukhi nohomba buli limiiku, nohomba buli likondi, kata nende buli imbusi. 12Olwa ohaana okhuyomba omuruko mulala, khandi ebihanwa biokhuhanwa halala n'nabio bimeetwe mubuhelani. 13Bosi abali abeebule bakhole yaka olwa bahaana esihanwa siebiokhulia siomwayo omulahi khu MWAMI. 14Ne omucheni owamenyibwa mwinywe, nohomba omundu wosi obetsanga mwinywe mutsinzibulo tsienywe, naba niyenya okhuhaana esihanwa siebiokhulia esiomwayo kwasio kuyanzisianga OMWAMI, kho alonde amalako ake inywe mulondanga. 15Mumatukhu kosi aketsanga, amalako amatelwa kano kalindwenge mwinywe nende mubacheni abamenyibwa mwinywe. Inywe halala n'nabo muli abafwanani imbeli wo MWAMI. 16Amalako amatelwa kano nende amachetsiyio kano, karumikhilwe n'nenywe khandi nende abacheni abamenyibwa mwinywe.#Abal. 24:22

17OMWAMI yahelesia Musa 18amalako kano khulwabandu ba Isiraeli okhulonda olwa nabenjile musibala esia nabahelesie. 19Olwa muba nimuliakhwo khubilibwa biesibala yisio, murekhwo ebindi sibeka singa esihanwa esichomekhe khu OMWAMI. 20Olwa muteekha emikaati; omuhayila kwokhuranga okhutekhelwa khubuswache obuhia kuhanwe singa esihanwa esichomekhe khu MWAMI. Yiku kuhanwa singa esihanwa esichomekhe esia muhaananga khubuswache obwokhuranga okhuhulwa. 21Mumatukhu kosi aketsanga, esihanwa esichomekhe yisi sihanwe khu MWAMI okhurula khumikaati echiamutekhanga.

22Nebutswa haundi omundu anyala okhwitsukhan'na narahesisie amalako kosi ako MWAMI yabool'la Musa tawe. 23Khandi haundi mumatukhu aketsanga abandu nababule okhuhesia ako MWAMI alakanga okhubir'ra mu Musa. 24Nikakhaba mbu kabula okhuhesibwa nabandu khulwa okhukorwa khwabwe, kho baleere echulukhi ndala eyomusango kwokhusambwa, khulwo omwayo okuhunyanga obulahi khu MWAMI, halala nomusango kwobuswache kwayo okwahuchil'lwa nende omusango kwewaini kwayo. Okhumeetakhwo baleere ekhole ndala singa omusango kwetsimbi. 25Omwesaalisi naye akhole omulukha kwokhutsienula abandu ba Isiraeli, nabo balalekhelwa sichila betsukhaniye nibakhol'le amasiamu, ma baleer're omusango kwabwe kwetsimbi singa esihanwa siebiokhulia khu MWAMI. 26Kho omukanda kwosi kwabandu ba Isiraeli balekhelwe, halala nabacheni abamenyibwa mubo, sichila abandu bosi bakhola amasiamu yako.

27Ne omundu mulala niyetsukhan'na nakhol'le tsimbi, kho oleere imbusi isibini eyomuhika mulala singa omusango kwetsimbi.#Abal. 4:27-31 28Omwesaalisi naye akhole omulukha kwokhusiiya omundu uyo okhurula mutsimbi tsitsie; naye alalekhelwa. 29Amalako amatelwa yako karumikhilwe khulwe uyo okhola ling'ana liosi metsukhan'na kata abe omwibule mubandu ba Isiraeli, nohomba omucheni owamenyibwa mubo. 30Nebutswa ochoomanga okhukhola tsimbi neinjinia, kata nali omwibule nohomba omucheni owamenyibwa, omwene uyo ali nesikha siokhuchaaya OMWAMI, ne okhwola yerwe, 31sichila yachaaya ling'ana lia Nyasaye yaboola, nafunaka lilakolie. Okhufwakhwe nokhwa yeleer'ra omwene.

Omundu owafunaka lilako lie Sabato

32Litukhu elala olwa abandu ba Isiraeli bali nibali musitsiimi, banyoola omundu narenyanga tsikhwi khwitukhu lie Sabato. 33Ne yabo abamunyoola narenyanga bamuleera khu Musa nende Haruni, nende khumukanda kwosi; 34ma nibamura mubulindi, sichila sikali nikaribuuywe aka yali nakhoyele okhukhol'lwa tawe. 35Ma OMWAMI nabool'la Musa mbu; “Omundu uyo yerwe bwirwa; abomukanda kwosi bamulase namachina esioba wekambi.” 36Abomukanda kwosi nibamuhila esioba wekambi, nibamulasa namachina ma nafwa, singa OMWAMI yali nalachile Musa.

Amalako khukamayebeyo khutsingubo

37OMWAMI yalaka Musa 38abool'le abandu ba Isiraeli mbu: “Mulombe amayebeyo khumikhanda chietsingubo tsienywe ma murekhwo olutsaha lwabuluu khubuli liyebeyo. Mukholenje mbwo amatukhu kosi aketsanga.#Okhuka. 22:12 39Nako kalaba khwinywe amayebeyo akokhuhenga nimwitsul'la amalako kosi nimukakhola; ma mulekhenje okhukhupa ise omukongo nimukhola akobwekombi benywe abene nende okhwenya khwemioyo chienywe. 40Kho amayebeyo nakamwitsusienje amalako kanje kosi, nimukakhola, nimuba abatsienukhu khu ise Nyasaye wenywe. 41Nise OMWAMI Nyasaye wenywe, owamuhinia musibala sie Misiri, mbu mbe Nyasaye wenywe. Nise OMWAMI Nyasaye wenywe.”

Currently Selected:

OBUBALI 15: EBAIBO

Highlight

Copy

Compare