OBUBALI 17
17
Indabusi ya Haruni
1OMWAMI yabool'la Musa mbu, 2“Bool'la abandu ba Isiraeli bakhuhe tsindabusi likhumi nachibili ndala okhurula khubuli omwemeli wabuli olwibulo. Ohandike eliira liabuli mundu khundabusiye. 3Ohandike eliira lia Haruni khundabusi ya Lawi. Indabusi ndala elabaho khulwa buli omwemeli wolwibulo. 4Ma otsibiikhe Mwiheema liokhubaho khwanje otsire imbeli we Lisanduku lie Indakano aha mbukan'nanga n'nawe. 5Ne indabusi eyomundu owa nzia okhulobola elakanikhakhwo obwamu. Munjila iyi ndalekal'la obwekani bwabandu ba Isiraeli, obwa bamumuchil'langa khuibe.”
6Kho Musa nal'loma nabandu ba Isiraeli, ma abemeli babwe bosi nibamuhelesia tsindabusi likhumi nachibili, ndala khubuli mulala khubo singa obwetsinzibulo tsiabwe tsiali, ne indabusi ya Haruni yabikhwa halala netsindabusi tsiabwe. 7Musa nabiikha tsindabusi yitsio Mwiheema liokhubaho khwo MWAMI, imbeli we Lisanduku lie Indakano.
8Ma mukamba olwa Musa yenjila Mwiheema, yalola indabusi ya Haruni eyali yolwibulo lwa Lawi yali niyekanikhilekhwo obwamu. Yali nemulikhile ebimuli, niyaama amalusi amengu.#Heb. 9:4 9Ma Musa nahiinia tsindabusi yitsio tsiosi okhurula aha tsiali natsileera khubandu ba Isiraeli aha bali nabamanyia. Nabo balola akali nikekhol'le ma nibabukula buli mundu indabusiye. 10OMWAMI nabool'la Musa mbu, “Kalusia indabusi ya Haruni imbeli we Lisanduku lie Indakano. Ebiikhweho ebe singa lichetsiyio khu Baisiraeli abe indiri mbu balafwa nibaba nibaralekha okhumumuchila khwabwe.” 11Musa nakhola singa obwa OMWAMI yamulaka.
12Ne abandu ba Isiraeli nibabool'la Musa mbu, “Kho yisio nisio esihesi siefwe fwesi! 13Buli mundu wosi owesunda ahembi khwiheema okhwola afwe, kho ifwe khuli butswa singa abafu!”
Currently Selected:
OBUBALI 17: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
