OBUBALI 14

Abandu bamumuchil'la Musa nende Haruni

1Abandu ba Isiraeli bosi nibakhupa tsikhwisi; nibalakaya obutukhu bwene yibwo. 2Abaisiraeli bosi nibamumuchil'la Musa nende Haruni; ne abandu bosi nibababool'la mbu, “Bwakhabeeye bulahi khulafwila musibala sie Misiri nohomba musitsiimi sino. 3Nisina esiachila OMWAMI nakhuleera musibala ma alekhe khwir'rwe mwihe? Abakhasi befwe nabaana befwe abati balatiilwa. Bwakhabeye bulahi okhukalukha Emisiri.”

4Nibabool'lana abene khubene mbu, “Chende khwele omwemeli, ma khukalukhe Emisiri.”

5Ma Musa nende Haruni nibasikama nibenamia obweni bwabwe imbeli womukanda kwa Baisiraeli abali nibebunjikhileho. 6Ne Yoshwa omusiani wa Nuni nende Kalebu omusiani wa Yefune, abali balala khubalambuuli besibala yisio nibarandula tsingubo tsiabwe musibeela, 7ma nibabool'la omukanda kwosi okwa Baisiraeli mbu, “Esibala esia khwalambuuye nikhubir'ramwo, nesibala esilahi okhusila. 8OMWAMI naba nakhuyanzila, alakhuhilamwo ma akhuhelesie esibala siobuhinda khandi esieliloba linolu. 9Muramukhol'la OMWAMI induli, nohomba muraria abandu abamenya musibala yisio tawe; okhuba nakhubaleche butswa mubutoro. OMWAMI ali n'nefwe, khandi ulechele abanyasaye babwe ababalindanga, kho muraria tawe.”#Heb. 3:16 10Nebutswa abomukanda bosi baboola mbu balaswe namachina, ma beerwe, nebutswa bungoyingoyi obulafu bwo MWAMI bwalolekhela abandu ba Isiraeli bosi Mwiheema liokhubaho khwo MWAMI.

Musa asaayila Abandu

11OMWAMI nabool'la Musa mbu, “Abandu bano balanjaaya okhwola lina? Balasuula okhuusubila okhwola lina, kata nikali ndakhola akamangalimwa amenji mubo? 12Naarume olumbe okhubamuma, nebutswa naakhukhole iwe okhuba samwana lihanga likhongo khandi elietsingufu okhubayomba.”

13Musa nabool'la OMWAMI mbu “Ibe wahiinia abandu yaba Emisiri khulwobunyali bubwo. Olwa Abaamisiri beetsa okhuhul'la akokholeye abandubo#Okhur. 32:11-14 14nababool'le abandu abamenyanga musibala sino. Abandu yaba bali okhuhul'la mbu ibe, OMWAMI, oli halala n'nefwe. Okhuba ibe khandi, ololekhanga moni namoni; lilumbesilio nalio lisinjilanga ikulu wefwe, khandi okhwemel'langa mwilumbesi elili singa esiilo mumubasu, khandi mumul'lo okuli singa esiilo mubutukhu. 15Kho noba niwira abandu baabo bosi, abetsimbia abahulila akeifumayo balaboola mbu, 16‘Sichila OMWAMI yaramilwe okhwosia abandu bano musibala esiayabasubisia okhubahelesia, nisio esichil'le nabeer'ra musitsiimi.’ 17Kho luno khusaayanga okhumanyie obunyali bwo, OMWAMI, ma ohesie akawasubisia olwa waboola mbu, 18‘Ise OMWAMI sindi omwangu okhuhambwa oburima tawe; manyianga obuyanzi obwinji nende obusubilwa, ne ndekhelanga tsimbi nende indiri. Kata mbwo sinyala okhubula okhuhaana esinyasio khumundu wesikha tawe. Mbaananga esinyasio khubaana nende khubetsukhulu kata okhwola khulwibulo lwakhataru nende olwakhane khulwe tsimbi tsiabebuli babwe.’#Okhur. 20:5-6; 34:6-7; Okhuka. 5:9-10; 7:9-10 19Khusaayanga mbu olekhele abandu bano tsimbi tsiabwe okhuhelana nobukhongo bwobuyanzibwo oburakalukhananga, singa obwa wabalekhela okhurula olwa barula Emisiri kata okhwola luno.”

20OMWAMI nakalusia mbu, “Mbalekheye singa obwa usaayile. 21Nebutswa ndesuhanga, siahene oluhono olwasili mwoyo, khandi oluhono lwesibala siosi sisitsuyemwo oluyali lwanje,#Heb. 3:18 22abulaho khubandu yabo bosi owakhahindile okhwinjila musibala yisi. Bali okhulola obulafu obukhongo obumanyianga okhubaho khwanje nende akamangalimwa aka ndakhola mu Misiri nende musitsiimi, nebutswa bali okhuteema obwesimilisi bwanje hali akhenji khandi nibasuula okhumbulila. 23Sibalinjilakhwo musibala esiandasubisia okhuhelesia abakuka babwe tawe. Yabo bosi abali okhuusuula sibalenjilamwo tawe. 24Ne sichila omurumikhili wanje Kalebu yali nende omwoyo kundi okwabukhan'ne, khandi yanondanga nomwoyokwe kwosi ndakhamwinjisie musibala esia yali okhulambuula, ne abetsukhulube bakhamenye musibala yisio#Yosh. 14:9-12 25esia Abaamaleki nende Abakanaani bamenyanga mumabanda kasio. Kho mukamba musuukhane mutsie musitsiimi nimulonda khunjila etsitsanga khumukhonokwe Inyanza Inzakhanyu okulangwanga Akaba.”

OMWAMI ahelesia abandu esinyasio khulwo okhwekaana khwabwe

26OMWAMI nabool'la Musa nende Haruni mbu, 27“Abandu ababi yaba nabatsilil'le okhundekaana okhwola lina? Mal'le okhuchonya khulwo khuhul'la okhwekaana khwabwe! 28Luno bahelesie likalusio lino: ‘Ndesuhanga mbu oluhono lwandi mwoyo, naamukhol'le kosi akamureebanga. Ise OMWAMI mal'le okhuboola. 29Namufwe ne emibili chienywe nachisalanibwe musitsiimi sino. Sichila mwali okhundekaana, yabo bosi ababalwa khwinywe, okhurula khubemihika amakhumi kabili okhutsia ikulu sibakhenjila musibala yisio tawe.#Heb. 3:17 30Ndamusubisia mbu mwakhamenye musibala yisio, nebutswa abulaho kata mulala khwinywe owakhamenyemwo, narali Kalebu omwana wa Yefune nende Yoshwa omwana wa Nuni. 31Nebutswa abaana benywe abati abamwaboola mbu bakhayaakwe singa emiandu, nibo abandinjisiamwo bonyene, ne balimenya musibala tsana esia mwali okhusuula, ne siakhabe ingo wabwe. 32Habula inywe, mwakhafwile musitsiimi sino. 33Abaana benywe nabo balabetsanga abatimatiimi musitsiimi khulwemihika amakhumi kane, nibasaalilanga khulwe inywe okhubula okhuba abasubilwa khu ise, okhwola olwa muliba nimufwiliye musitsiimi mwesi.#Ebikh. 7:36 34Mulanyoola esinyasio sietsimbi tsienywe khulwemihika amakhumi kane, buli omuhika mulala khulwe litukhu elala khumatukhu amakhumi kane aka mwalambuul'lamwo esibala. Ne mulamanya esifune sie ise okhumusuula inywe! 35Ndesuhanga mbu naamukhol'le kano, abandu babi inywe abebunjikhanga halala okhuufukula. Inywe mwesi mulafwila musitsiimi muno. Ise OMWAMI mal'le okhuboola.’ ”

36Abandu aba Musa yaruma okhulambuula esibala, bakalusia amang'ana kobubehi ma nibachila abomukanda kwosi nimumumuchil'la OMWAMI. 37Khulwako, OMWAMI yaruma olumbe khubandu abaleera amang'ana kobubehi yako, ma bamala nibafwa. 38Yoshwa omwana wa Nuni nende Kalebu omwana wa Yefune bonyene nibo abasikala mwoyo khubandu yabo abatsia okhulambuula esibala.

Okhuteema khwokhuranga okhuseera esibala

(Okhuka. 1:41-46)

39Olwa Musa yabool'la abandu ba Isiraeli amang'ana ako MWAMI yali nabooye, bekhuula okhusila. 40Babuukha mukamba tsuli ma nibachaaka okhuseera esibala siebikulu, nibaboola mbu, “Luno khwerechekhele okhutsia habundu aho MWAMI yakhusubisia. Khweyamanga mbu khwakhola tsimbi.”

41Musa naye naboola mbu, “Kho busina mukhol'langa OMWAMI esikala marwi luno? Simulaba nobulechi tawe. 42Muratikulukha tawe; OMWAMI siali n'nenywe tawe, ne abasuku benywe balamuleka. 43Olwa namwakaane nende Abaamaleki nende Abakanaani namufwile mwihe; OMWAMI salaba n'nenywe tawe sichila simumulondanga tawe.”

44Nabo bekhulumamia nibatsia musibala siebikulu nebutswa Lisanduku lie Indakano yo MWAMI nende Musa sibarula mukambi tawe. 45Ma Abaamaleki nende Abakanaani abamenyanga mubikulu yibio nibabaseera ma nibabaleka, ne babalondel'la okhwola Horima.

Currently Selected:

OBUBALI 14: EBAIBO

Highlight

Copy

Compare