OBUBALI 13
13
Abandu likhumi nababili barumwa okhulambuula Kanaani
(Okhuka. 1:19-33)
1OMWAMI yabool'la Musa mbu, 2“Ruma abandu batsie okhulambuula esibala sia Kanaani, esia nambelesie Abaisiraeli. Orume omundu okhurula mubuli olwibulo mutsinzibulo likhumi natsibili.” 3Kho Musa nabaruma okhurula musitsiimi sia Parani, singa OMWAMI yali namulachile. Bosi mbwo bali abemeli ba Baisiraeli. 4Ne amera kabwe ngakano; khulwibulo lwa Rubeni, yaruma Shamua omwana wa Sakuri. 5Khulwibulo lwa Simioni, yaruma Shafati omwana wa Hori. 6Khulwibulo lwa Yuda, yaruma Kalebu omwana wa Yefune. 7Khulwibulo lwa Isakari, yaruma Igali omwana wa Yosefu. 8Khulwibulo lwa Efuraimu, yaruma Hoshea omwana wa Nuni. 9Khulwibulo lwa Benjameni, yaruma Paliti omwana wa Rafu. 10Khulwibulo lwa Sabuloni, yaruma Gadieli omwana wa Sodi. 11Khulwibulo lwa Yosefu, okhurula musilibwa sia Manase, yaruma Gadi omwana wa Susi. 12Khulwibulo lwa Dani, yaruma Amieli omwana wa Gemali. 13Khulwibulo lwa Asheri, yaruma Setsuri omwana wa Mikaeli. 14Khulwibulo lwa Nafutali, yaruma Nabi omwana wa Wofusi. 15Khulwibulo lwa Gadi, yaruma Geweli omwana wa Maki. 16Yako niko amera kabasaatsa yabo aba Musa yaruma okhulambuula esibala. Musa yasukhania eliira lia Hoshea omwana wa Nuni, namukulikha mbu Yoshwa.
17Olwa Musa yabaruma okhulambuula esibala sia Kanaani yababool'la mbu, “Mutsie esinyolu okhurula hano mwinjile enandete wesibala sia Kanaani ma mwinjile musibala siomubikulu. 18Mulole esibala singa obwa sili; khandi mulole abandu abamenyangamwo nibaba nibali abenji khandi abetsingufu. 19Kata nende esibala esia bamenyangamwo nisiba nisili esilahi nohomba esibi; nende amataala aka bamenyangamwo, nibaba nibamenyanga mumataala kasirwa nohomba mumataala akaraasirwa. 20Kata nende liloba liene niliba nilili linolu nohomba elibulamwo ebiamo; emisaala nichiba nichilimwo. Ne muteeme akamunyala muleerekhwo khubiamo biesibala yisio.” (Ne amatukhu yako kali amatukhu kemisabibu okhuchiaka okhwenga.)
21Kho abasaatsa yabo nibatsia esinyolu nibalambuula esibala okhurula enandete khusitsiimi sia Sini okhwola Rehobu, nende okhwola esinyolu mulung'anyi lwa Hamatsi. 22Mbelio benjila musibala sienandete ma niboola Heburoni omwa Ahimani, Sheshai nende Talimai, abetsukhulu bolwibulo lwemindu emikali olulangwanga Abanaki bali nibamenyanga. (Nalio litaala lia Heburoni liali niliombokhwa Emihika chine nachitaru, Soani elili Emisiri nisili okhwombokhwa.) 23Niboola khwibanda lia Eshikoli, nibaremayo olusaka olwali nesisakanya silala siemisabibu, nibasichinga khumutichilo#13:23 Khumutichilo Emisaala chiokhukinga esindi. hakari wabandu babili sichila siali es'siro okhusila. Khandi nibaleera khumakomoli nende amakhuyu kosi. 24Habundu yaho halangwa mbu Libanda lia Eshikoli#13:24 Eshikoli Eliira yili Muluheburania mbu esisakanya siemisabibu. khulwe esisakanya yisio esia Baisiraeli baremayo.
25Inyuma wokhulambuula esibala khulwa amatukhu amakhumi kane, abalambuuli yabo bakalukha 26khu Musa, nende Haruni nokhumukanda kwosi kwa Isiraeli musitsiimi sia Parani, nibali Kadeshi. Bababool'la kosi aka bali nibaluutsiyo khandi nibabamanyia ebiamo biesibala tsana. 27Nibabool'la Musa, “Khwalambuuye esibala esia wakhurumamwo, ne silimwo nobuhinda obwinji nende ebiamo ebinji; ebiamo biasio mbiebino. 28Nebutswa abandu abamenyanga musibala tsana nabetsingufu, ne amatookho kabwe kaasirwa namasisi khandi namakali okhusila. Khandi khwalola abaana ba Anaki emindu emikali nichiliho. 29Abaamaleki bamenyanga musibala sienandete, ne Abahiti nende Abayebusi nende Abaamori bamenyanga musibala siomubikulu, Abakanaani bamenyanga hanyanza, khundulo khwa Yorodani.”
30Naye Kalebu yahotselesia abandu abali nibamumuchil'langa naboola mbu, “Khutsie khuseere esibala luno ma khusibukule; sichila khuli netsingufu etsihela okhusileka.”
31Nebutswa abasaatsa abali nibatsiyeyo nende Kalebu baboola mbu, “Sikhwakhanyala okhuseera abandu yabo tawe; abandu yabo nabakufu okhukhuyomba.” 32Nibaleer'ra abandu ba Isiraeli amang'ana amabi khusibala esia bali nibalambuuye, nibaboola mbu, “Esibala esiakhwalambuula sisihaananga ebiakhulia ebihela abandu abamenyangamwo tawe. Abandu bosi aba khwaluutsiyo nabarambi okhusila. 33Khandi khwaluutsiyo emindu emikali echiolwibulo lwa Anaki. Khwelola abene nikhuli singa amatete butswa khubo.”#Okhuch. 6:4
Currently Selected:
OBUBALI 13: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
