Kem Lingón 31
31
Lingón Dabid
1Ó Dwata, són béléem gónów hofin.
Hol tnóbóngem ou anì laen dù gónów myak.
Lemwót bè yóm tey ktedengem, hol lenwaem ou.
2Henklinguhem ou, hol hnungolem ou.
Géhéli hetlasik lenwaem
ou.
Lómón ke uu yóm botu bong gónów heklung,
yóm gónô hofin alì mbegel gónó le là gmafit dou yó kem hohonu.
3Uu se yóm botu gónów heklung ne gónów hofin.
Hol nalakem ou anì gewae bè ni mò gónón megdóyón yóm kóm boluy,
4anì là gholote bè yó kem hohonu.
Yakà tek són uu du yóm gónów hofin.
5Hogotu kóm yóm klowilu, Dwata.
Hol lenwaem ou, yakà uu du yóm Dwata teneb béléu.
6Tey keklitu kul yó kem tau tmaba ebè yó kem dwata lennged laen dù muhen.
Okóm béléu dou, són uu, Dwata, yóm dou snalig.
7Lemwót bè yóm là konolen yóm kbong nawam dou gónóhu alì hligal,
abay se deng tonem yóm alì keglayamu,
ne deng gnómem yóm gónón lebà nawaw.
8Là kô blayem dou elem hólól yó kem hohonu,
deng suem ou bè yóm gónón laen dù hemenu.
9Ó Dwata, hol knoduhem ou, yakà tey sidek kegnómu du.
Là buden gmefet ketngelu lanu alì mkik.
Là kóe bud mgel.
10Móyóne matay bè klangagu, hukolen towoku.
Lemwót bè alì ksidek kegnómu du gónów là bud mgel.
Lengok gu lem tiolu.
11Tey kkuli le dou yó kem hohonu,
botong kenhisik le ou yó kem dumuhu sebét.
Balù yó kem weu, là kô le hloni ebéléu.
Mom senyat le ou ke ton le ou bè lan.
12Là bud hendem le dou, lómón ke denge matay,
ne lómón ke ou yóm kuleng lemusok deng bot le.
13Tey dê gungolu udél le etahu,
ne deng slibut dou yóm alì knikou.
Deng natul le ou yó kem hohonu,
natul hnatay le ou.
14Okóm, Dwata, són uu yóm dou snalig.
Yó udélu, monu, “Uu se dou Dwata.”
15Denge nô lem hólólem efet kól elem hulin kdaw.
Hol lenwaem ou bè yó kem hohonu tendo kemtes huli dou.
16Hol hendemem yóm tau tóbóng lówóhem.
Lenwaem ou mlan bè yóm kbong nawam dou là monolen.
17Uu, Dwata gónów htóbóng.
Hol hegmoem ou anì laen dù gónóhu myak.
Okóm yó kem tau gel mò sidek, hol nmoem gónó le myak.
Lusem lu ebè benwu yó kem tau deng matay,
18anì là bud le mò udél yó kem tau mò kéng yó,
kem tau alì hegmón, alì heklabak,
tnifù le kéng yó kem tau tedeng kmò le.
19Tey bong, Dwata, yóm alì kehyuhem.
Tey kbasahem kul yó kem tau wen klikò le kóm.
Deng tey bong gendengem bè yó kem tau hofin béléem
igò le temngel yó kem tau bè klamangen benwu.
20Gel bnosem lu klohokem bè yóm gónón laen dù hemen le bè yó kem tau matul kul.
Uu se kemlung kul klohokem anì mayuk le bè yó kem tau tmifù kul kéng.
21Dóyónu Dwata, yakà deng hegfanen du béléu yóm là konolen yóm kbong nawan dou.
Deng nofinen ou bè yóm tehe kundug le benwuhu yó kem hohonu.
22Lemwót bè yóm alì ksidek klikou, botong monu,
“Là bud ton Dwata dou ne.”
Okóm gungolen yóm kehkoduhu béléen,
ne bnalaen yóm kehtóbóngu béléen.
23Yu kem tau gel mò du yóm kun kóyô Dwata,
hol kenbong nawa ye Dwata.
Sal gel nofinen yó kem tau teneb lemolò du.
Okóm yó kem tau heklabak, tey sidek ktafaken kul.
24Yu kem tau nefet nawa le Dwata,
hol ye hbegel, hfól ye nawa ye.
Currently Selected:
Kem Lingón 31: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
