Kem Lingón 30
30
Lingón Dabid yóm kehfun le du ke Dwata yóm Gónô hdà le béléen
1Tey kdóyónu kóm, Dwata, lemwót bè
yóm deng kehewaem dou.
Là kói móyô ke gemmò le béléu yó kem hohonu.
2Ó Dwata yóm sana dou Dwata hol gónó mogot,
denge mni tóbóng béléem,
ne gotu hkóhem béléu yóm desu
3anì là hlóse elem lebeng.
Deng bud hlowilem ou, Dwata, anì là hlóse elem hatay.
4Yu kem tau gel mimón ke Dwata,
hol sngal ye yóm sngal dmóyón ke Dwata.
Hol dóyón ye yóm kun boluy alì mólós.
5Yóm kebuten, tek likóten,
okóm bè yóm klawi te mowil, tendo gnóm te yóm kehyuhen.
Baluen ke suloyem buteng mkik,
okóm budi mulék hligal ke hlafus.
6Bè yóm tehe kehyu klowilu, yó monu,
“Laen dù bud hemseng dou ne.”
7Yóm kehyuhem ebéléu, Dwata, gónón mbegel kdau lómón kbegelen bulul.
Okóm tikóng tebelem ou, deng mom tey sidek klikou.
8Uu se, Dwata, gónów deng htóbóng.
Hkoduhe béléem, yó monu mò kóm,
9“Ke mataye, ke denge nô lem lebeng, tedu se gutahem béléu du?
Gbek yóm lówóhu deng baling kfung kô dmóyón kóm?
Gbeken kô tmulón du bè klamangen benwu yóm tey ktenebem?
10Hol hnungolem ou, Dwata, hol knoduhem ou.
Hol tnóbóngem ou, Dwata.”
11Yóm klangagu, deng henbalingem kligalu madal.
Deng gotu kóhem yóm nes langag leseku, ne tenlesem kligal.
12Yó se gónóhu semgal yóm sngal dmóyón kóm, ne là kóe tódô yem.
Ó Dwata, yóm Dwata hol gónó mogot,
ne laen kô dù tul sónen yóm kdóyónu kóm yó.
Currently Selected:
Kem Lingón 30: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
