Kem Lingón 32
32
Lingón Dabid bè yóm kehegselen ne bè yóm kehlifót Dwata du
1Hligal le kul yó kem tau deng hnifót
Dwata bélê le yó kem salà le,
ne ke là bud hendem Dwata du yó kem deng tehe gónó le mulé du.
2Hligal yóm tau là bud snolò Dwata du béléen yó kem sidek deng tehe gel nmoen,
ne laen dù bud blóngen ebè Dwata.
3Bè yóm là deng kehegselu, là kóen hyu klówóhu
lemwót bè yóm alì seflós ktafa nawahu.
4Yóm ktafakem dou, Dwata, senflósen kdaw ne kifu
efet lana béléu kgisu.
Lómón kegnómu du, lómón ke él kti bè yóm alì ékét kdaw.
5Yó gónóm mon, deng gotu benkasu ebéléem, Dwata,
yó kem salau,
laen kô dù bunihu béléem.
Bè yóm kebkasu du béléem yóm kdéen,
deng gotu hnifótem béléu ne yó kem sidek tehe gel nmou.
6Duhen yó, Dwata, yake hol le mni béléem yó kem kóm tau
ke wen blat sut bè klowil le.
Ke yó nmò le, baluen ke tódô dmunuk eta le yóm tey mgel, là kô gwiten kul.
7Són uu yóm gónóhu e hles.
Són uu se yóm lemwà dou ke wen mgel sut bè klowilu.
Gungolu hmilol dou yó kem mensag lemwót bè yóm deng kegmoem,
abay se uu yóm gel mofin dou.
8Deng mon Dwata mò dou,
“Toloku kóm he yóm lan mò loloem.
Ne wen mò hlolou kóm, ne tendo wen hlauhu kóm.
9Béi hungel mkél bè kudà,
song mimón benklil ke wen kakangen.”
10Yó kem tau là mimón ke Dwata,
tey dê gónó le glayam.
Okóm yó kem tau genléd nawa le Dwata,
tendo nofinen lu mlan bè yóm kbong nawahen kul.
11Yu kem tau gulit, hol ye hligal
lemwót bè yóm deng nmò Dwata bélê ye.
Ne yu kem tau mimón ke Dwata,
hol ye hligal mensag.
Currently Selected:
Kem Lingón 32: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
