Kem Udél Hlalak Tehe Selumun 17
17
1Mom hyu he mken yóm ken deng kefel
ke mung du yóm kenek nawa
senta yóm mung bè yóm mò ken bong wen sbólów du.
2Lemwót bè yóm khulungen hedem yóm hesek, gónón mom baling kmulu béléen yó kem ngaen logi là gulit yóm amohen.
Ne lemwót bè yóm khulungen hedem yó gónón gomong gumun bè kdê kendengen yóm amohen.
3Bè ofi gónó tau tmilów du yóm tembaga futì ne yóm tahu blówón
ne Dwata se fen tmilów du yóm nô lem but blutut tau.
4Yóm tau gel mò sidek gel hnungolen yóm tau mudél sidek
ne yóm tau gel tmulón kéng gel henklinguhen yóm udél hensideken kem dumu tau.
5Yóm tau sendekaen yóm tau élél, tnondohen yóm Dwata deng tehe mò kul
ne yóm tau hnigalen yóm glumfak sut bè dumun tau, là kô lugun Dwata du là tnafak.
6Yó kem tuha salù le yó kem témê le
ne yó kem ngà salù le yó kem tuha le.
7Yóm kestulón alì hyu, là knóónen bè yóm tau là sikof kehedemen.
Milud he là kehyuhen bè yóm tau hol geta yóm kestulón kéng.
8Yóm tau bemlay yóm kimu mò wa nawa, hol lómón ke bulung wen ktueden bè ktonen du yóm tau bemlay du,
abay se balù kihu tau gónón e bemlay du sal gel gutahen yóm nóyóen du.
9Yóm tau tódô hnifóten yóm gemsalà béléen hnebelen yóm kesbong nawa,
okóm yóm tau són moen bud mtóng du yóm gemsalà béléen senkóhen yóm keswè.
10Yóm tau hulung temnef anien ke tek sulék mólów du sana kwen dnalangen
senta yóm tau book baluen ke lematu dulék moug du.
11Yó kem tau gel mò sidek són matù ne hemsidek gel nmò le,
okóm tey ktafak le kul yó kem tau yó.
12Mom hyu he gemslong yóm sotu kay ógóf alì sidek klóbóen boluyen bér,
olo yóm gemslong tau book tolo lelen mò kbooken.
13Ke bnalaem sidek yóm hyu
là kóen mili bè gónóem yóm sidek.
14Yóm kbut yóm kesbólów hol lómón ke gónón msut yóm busung él,
yó gónóm mon eles nseng anì là lembéten.
15Yóm tau bnoluyen tedeng yóm sidek ne yóm tau hensalaen yóm tau tedeng kmoen
tódô senged yóm tey keklit Dwata kul.
16Yóm tau book laen dù ofolen mamà filak bè yóm knagien
yakem wen se óyóen dmalang.
17Yóm tau swè, són mò le sbong nawa ne hol lómón kestóbóng le
ke wen hlayam sut bélê le lómón ke sesotu sut le.
18Yóm tau fmasad mayad utóng dumu tau là kóen hulung hedem
ne wen senblay le mò gónón tahu.
19Yóm tau móyô mò salà nóyóen yóm kesbólów
ne yóm tau heklabak nebelen keglà.
20Yóm tau sigol kehedemen là kóen hyu klowilen
ne yóm tau seblékê kestulónen sal wen glumfaken.
21Yóm logi book tey sidek keblat nawa maen du
ne yóm tau là sikof kehedemen là hefligalen ke maen.
22Yóm kligal nawa tau henyuhen klówóhen,
okóm yóm keblat nawa tau mit du lunog.
23Yóm tau gel mò sidek gel henmóyóen yóm kimu lifut blay le du
anì nfihen yóm là tedengen.
24Yóm tau hulung temnef tendo snoluhen yóm khulung hedem,
okóm yóm tau book lusà du gónón e solu.
25Yóm logi book tey sidek klangag nawa maen du
ne tey sidek se kegsel yéen du.
26Yóm tau tedeng kmoen là kóen hyu hemsalà du
ne salà se ke bnoug lu yó kem tau geta bè ktedeng kmò le.
27Yóm tau temngón hulung mafas kudélen
ne yóm tau là mahilen lembut wen khulungen temnef.
28Ke tódô yem yóm tau book sana kmon le du tau hulung hedem
ne ke là mudélen tódô mon le hulung temnef.
Currently Selected:
Kem Udél Hlalak Tehe Selumun 17: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
