Kem Udél Hlalak Tehe Selumun 16
16
Yó kem udél hlalak gemduf kem tau hemtahu bè Dwata
1Lem hendem tau gónón lemwót yó
kem atul,
okóm Dwata yóm bemlay du kegbek hembaling du.
2Ofo tau hemdem du ke hono tedeng yóm kun kmò,
okóm Dwata hemdeng du yóm nô lem but blututen.
3Hogotem ke Dwata yó kem nmoem
ne wen gónón e kól yó kem atulem.
4Bè kdê deng nmò Dwata sal gel wen oluhen kul
balù yó kem tau gel mò sidek deng oluhen kul yóm kdaw ktafak.
5Tey keklit Dwata du yóm keheklabak tau.
Ngem, là kô lugun Dwata du là tnafak yóm tau heklabak.
6Mlan bè kogot nawa ne kteneb tau bè Dwata gónón hmifót salaen
ne mlan bè klikò tau ke Dwata gónón gemkogol yó kem nmò sidek.
7Yóm tau ke sok hefligalen Dwata bè kmoen
balù yó kem hohonen bud senfyu Dwata lu.
8Mom hyu he yóm tau udì gutahen ne tedeng bè Dwata
senta yóm tau alì bong gutahen mlan bè là ktedengen.
9Yóm tau, du fen matul hemdem mò du yóm kun kmò klan,
okóm Dwata fen malak du bè yóm kmoen du.
10Lemwót bè Dwata yóm kun kudél yóm tau hol geta
ne laen kô salà du yóm kun kkukum.
11Tey móyô du Dwata yóm tau tmimbang ne bemtes là lemingkohen
ne balù bè yóm kehbalù ke hono tedeng.
12Tey keklit yóm tau hol geta du yóm nmò sidek,
yakà bè ktedengen du hembegel yóm kun kogot.
13Tey kehligalen yóm tau hol geta bè yó kem tau là tmulónen kéng
ne hyu nawan bè yóm tau gel tmulón yóm tahu.
14Sok alì lembut yóm tau hol geta ayawen wen matay
ne yóm tau hulung hedem eles nebelen lanen hebó yóm kebut yóm tau hol geta yó.
15Sok lingas lem uyóhen yóm tau hol geta uka wóyón hlowilen u
ne yóm kehyu nawahen ebéléem lómón se yó nem kehyu yóm kulón bè yó kem hulu.
16Mom hyu he yóm kwahem yóm khulung hedem senta tahu blówón
ne yóm kélékem yóm khulung temnef senta tembaga futì.
17Knogolen yóm sidek yóm kun kmò klan yóm tau tedeng kmoen
ne yóm tau ten-gamahen kmoen, henyuhen klowilen.
18Yó nefet yóm tau hegmón duhen yóm keglà
ne senged se yóm tau heklabak.
19Mom hyu he yóm tau glaan ne élél
senta yóm tau hegmón gbót mólól yó kem guta le mlan bè là ktedengen.
20Yóm tau kenmónen yóm udél Dwata, tey hyu klowilen
ne yóm tau smalig béléen wen kligalen.
21Gel mon le tau hulung milô yóm tau hulung hedem
ne lemwót bè khulungen hemtilob kudélen gónón gbóy tau.
22Yóm tau hulung hedem, lemwót bè yóm khulungen hedem gónón mowil,
okóm yóm tau book, bè yóm kbooken gónón megtafak.
23Yóm tau hulung hedem tey ten-gamahen yóm kmò kudélen
ne lemwót bè yóm khulungen mudél gónón gbóy tau.
24Yó kem udél hyu tey hyu klówóhem du,
hol lómón kegnómem du lómón ke mkeni tneb.
25Wen se atul lómón tô tedeng bè kehedem tau du,
okóm yó sónen hatay.
26Yóm alì nóyô tau yó se bemlay du óyô mò nmò
ne yóm kbitilen gemduf du mò nmò.
27Yó kem tau laen dù gónó le e kól són mò le matul mò sidek
ne yóm kudél le lómón ksideken yóm mluf bè ofi.
28Yóm tau seblékê kestulónen són moen mit sbólów
ne yóm tau lemnek ksumóngen senklahen yó kem tau swè.
29Yó kem tau gel hmugus, n-goy le kem dumu le
ne nwit le lu e lem yóm nmò là hyuhen.
30Tódô gfan bè uyó kem tau yóm katul le mò sidek
ne tódô dilô bè kekdol sumóng le yóm deng kmò le sidek.
31Tey megdóyón yóm tau ke gutahen kubónen
lemwót bè ktedeng kmoen.
32Mom hyu he yóm tau là mahilen lembut senta yóm tau hulung mit sfatay
ne hyu he yóm tau hulung mafas nawa senta yóm tau mled benwu bong.
33Yóm tau sal gel mò atù anì tngónen yóm kóyô Dwata,
okóm ke Dwata kun, eles tngónen yóm balaen kul.
Currently Selected:
Kem Udél Hlalak Tehe Selumun 16: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
