Kem Udél Hlalak Tehe Selumun 18
18
1Yóm tau là hulungen swè olohen
hemdem yóm kun knô
ne gel hnebelen lanen sembólów kdê yó kem nmò tedeng.
2Yóm tau book laen dù kligalen du kun yóm khulung temnef,
okóm són hnigal tulónen yóm kun kehedem.
3Sok wen yóm nmò sidek bud bè yó se gónón wen sedekà
sok laen bud sadat mung du se yóm kesefyak.
4Yó kem udél yóm tau hulung hedem gónó le lemwót hulung hedem yó kem dumu tau,
yóm kngelem yóm kun udél lómón ke mohin ne yóm kehyuhen lómón ke él mlel.
5Yóm tau gel mò sidek là kóen hyu mfi du
duhen ke bnekel yóm ktedengen ebè yóm tau laen dù salaen.
6Yóm kun kudél yóm tau book gónón lemwót yóm kesbólów
ne bud bè kudélen gónón boug.
7Yó gónón meglà yóm tau book lemwót bè kudélen
ne bud bè kudélen gónón gholot.
8Yóm udél yóm tau lemnek ksumóngen lómón ke ken alì mnóm,
tey le beyen mungol du yó kem tau.
9Yóm tau là teneben mò du yóm kun nmò
hol lómón ksideken yóm kul kmò yó kem tau gemlà.
10Yóm Dwata mò gónó le heklung ne gónó le e mlo
yó kem tau tedeng kmoen ne gónón hyu knóen.
11Yóm tau mdengen bè kun kehedem du, yóm kendengenen yó yóm mò henged klungen,
hol lómón ke henged beng geta hmilol du.
12Laen kô dù tau madat du yóm tau ke là nan na heglaan du knóen
ne yóm tau heklabak meglà.
13Yóm tau là nan na hmungol ne kendel gel semlok
yó se kmò yóm tau book ne henyaken kun knô.
14Yóm tau gbeken hembala yóm desen, yó se yóm tau tolo móyô mowil,
okóm ke là buden móyô laen kô dù kmoem du.
15Yóm tau hulung milô gutahen ketngónen
ne yóm tau hulung hedem són moen hemklingu yóm ketngón.
16Yóm basa hennasen lan yóm tau bemlay
ne niten bè solu yó kem tau bong boluy le.
17Yóm tau gna kmamo lómón ke tahu yóm kun tulón
ke là wen tau dumun sembekas yóm ktahuhen.
18Yóm keskuya, yó hemdeng du yóm kmò le atù
ne bud senged se yó kem tau sbantak.
19Ke wen gónó le sgulé yó kem tau swè tey mgel semfyu kul senta yóm mled sotu benwu bong
ne senged se yó kem tau sbólów tey mgel semfyu kul.
20Gel gsengel nawahen du yóm tau lemwót bè ulék kun udél
ne bud gsengel se nawahen du bungu yóm kun kudél.
21Wen se udél tau gónó mowil ne wen se udél gónó matay
ne bud gutahen se bungu yóm udélen.
22Yóm tau mton yehen tonen yóm hyu béléen
ne gutahen yóm kehyu nawa Dwata ebéléen.
23Yóm tau élél sal gel mudél hkodu,
okóm yóm tau wen kendengenen mom heskong ke malà.
24Wen se tau olon beyen mon du, Wè,
okóm wen he yóm swè mget senta kesetwoli.
Currently Selected:
Kem Udél Hlalak Tehe Selumun 18: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
