1 Tutul Israél 16
16
1Duhen yó, nwit le yóm Slungan Dwata ebè yóm tolda deng eles hetfing Dabid mò gónón nô. Wen dsù hkekeb le ebè Dwata, ne bud wen se dsù le mò mit sefyu ebè Dwata. 2Tikóng deng kedsù Dabid, ominen yó mni bè Dwata anì tnóbóngen yó kem tau. 3Tódô ket tau bè Israél, logi duhen libun, benlay Dabid basa mò ken le, benlayen lu ket na sotu mambang ne wen utónen ne sfunges kem bungu grép deng hendaw.
4Wen kem sfu Libay nélék Dabid mò malak yó kem tau tmaba ebè Dwata bè solu yóm Slungan Dwata. Lu se fen mni tóbóng bè Dwata bè yó kem tau, ne bemlay slamat béléen, ne dmóyón du yóm Dwata yó kem tau Israél. 5Néléken Asaf mò malak kul. Du se fen huni du yóm simbal yóm gel sendofì le. Smugung béléen yóm sotu Sikaraya, ne le Jiyél, Simiramut, Jihél, Matitiya, Ilyab, Binaya, Ubid-idom, bud yóm sotu Jiyél. Lu fen gel huni kul yó kem gel kenbit le. 6Yó gel mféw, le Binaya lewu le Jahasayél kem tau gel blóng ebè Dwata. Ket kdaw le mféw bè solu yóm Slungan Dwata, bede lolò le bè yóm uras le gel mò du.
Lingón Dabid dmóyón ke Dwata
7Duhen yó, bè yóm kdaw yó wen sngal dmóyón ke Dwata hesngal Dabid ke Asaf ne yó kem dumuhen semfu gu bè Libay.
8Hol tekuy slamat bè Dwata.
Hol gel heglalag tekuy yóm kegetahen.
Tulón tekuy bè kem tau bè klamangen benwu yóm deng gendengen.
9Hol gel sngal tekuy yóm sngal dmóyón ke Dwata.
Gel tulón tekuy yó kem tey hentaw ton gel nmoen.
10Hligal tekuy abay se tey mólós yóm kun boluy.
Yóm kdê tekuy gel tmaba ebéléen, hol tekuy hligal.
11Hol hnebel ye Dwata, snalig ye yóm kun kgis,
Senflós ye mebel du.
12,13Yu kem tau semfu gu bè Israél, yóm tau tehe kun tóbóng lówó Dwata,
ne yu kem tau semfu gu bè Jakub yóm tau tehe kun nélék Dwata,
hentulón ye nawa yó kem hentaw ton tehe gel nmò Dwata bélê le.
Hentulón ye nawa snéen yóm tehe gel ktafaken yó kem hohon le.
14Dwata se yóm hol gónó tekuy mogot.
Gfan bè klamangen benwu yóm kmò kogoten tau.
15Ne yóm deng tehe fasaden yó kem kun tau,
laen kô dù tul sónen.
Baluen ke hilu libu bud lugod le,
senged kdohoen yóm tehe fasaden yó.
16Ni se yóm deng tehe senfasad le Abraham,
ne bud yó se fasaden ke Isak snéen yóm ngà Abraham.
17Bud yó se fasaden ke Jakub yóm témê Abraham.
Ne yó bud fasaden yó kem tau Israél,
ne laen kô dù tul sónen yóm fasaden yó.
18Yó tehe fasaden kul, monen,
“Blayu kuy yóm benwu Kanan mò hol kuy nfun.”
19Bè yóm tehe kmò Dwata fasad bélê le yó kem kun tau yó,
là kô le deng hol wen he,
hanà le tolo tau milo bè Kanan
yóm benwu deng fasaden kul.
20Tey dê benwu gónó le e semdakit nô,
sal stólóng yó kem tau mogot du.
21Okóm là kô bayà Dwata kul anì laen dù tau hemgnok kul.
Yó kmò kofinen kul, eles wen gel hetgamahen yó kem tau hol geta mogot benwu, yó monen mò kul,
22“Hol bê ye abay hensidek lu yó kem dou tau nélék.
Ne yó kem tugodu elem blóng le,
bê ye abay hensidek lu.”
23Kdéen tau bè klamang benwu,
gotu tekuy semngal ebè Dwata.
Ket kdaw tekuy heglalag du yóm tulón hyu lemwót béléen,
duhen yóm deng kehewaen tekuy.
24Hol heglalag tekuy bè yó kem tau bè dumu benwu yóm tey keklóón yóm nmoen.
Ne hol tulón tekuy bè kdéen tau yóm tey hentaw ton gel nmoen.
25Tey geta yóm Dwata,
tey knóón semdóyón du.
Yake wen klikò tekuy du senta yó kem dwata kéng.
26Yó kem dwata kul gónó e gel tmaba yó kem tau bè dumu benwu,
hono dwata lennged.
Okóm yóm Dwata tekuy, du se dmimun du yóm longit seglafin.
27Yó lemibut du yóm tey klinggelen ne yóm tey kegetahen.
Yó hol heklóón du yóm kun Gónô,
duhen yóm tey kekgisen ne yóm tey ktiloben.
28Yake hol dilô ye Dwata,
yu kem tau bè yó kem dumu benwu talak tonok.
Yake hol dilô ye yóm tey keklóónen ne yóm tey kegbeken.
29Hol dóyón tekuy, abay se tey minggel boluyen.
Mógów tekuy ebè Gónóen,
eles tekuy mit yóm mò blay tekuy du.
Tmaba tekuy ebéléen bè yóm tey keslinangen,
abay se yóm Dwata laen kô dù belenen.
30Hyu ke wen hol klikò tekuy du,
kdê tekuy kem tau bè klamangen benwu.
Tey mbegel kehdaen du yóm benwu,
là kóen mingol.
31Ó longit ne tonok, hol ye hligal se kuy.
Hol tulón tekuy bè yó kem tau bè dumu benwu,
“Dwata se yóm hol geta kmamal yóm klamangen.”
32Ne yóm mohin ne yóm kdê nô lemen,
hlan ye bè lungkul ye yóm kdóyón ye du.
Dalang se yó kem tniba ne dnadu ne kdê yó kem tmowok tahen,
hol ye hligal se kuy.
33Ne yó kem koyu dlag, gotu le hligal semngal bè solu Dwata,
yakà angaten kól Dwata mò kmukum yóm klamangen.
34Hol dóyón tekuy Dwata lemwót bè yóm tey kehyuhen.
Là kóen monol yóm kbong nawahen tekuy ne laen kô dù tul sónen.
35Yó monem, “Lenwaem mi, Dwata yóm Dwata tehe gel lemwà kum ekni.
Deng senkla le mi lem blóng yó kem dumu benwu,
hol lenwaem mi lem hólól le ne bud sentifunen mi
anì slamat me béléem,
ne tey dóyón me yóm kóm boluy alì mólós ne tey me hligal dmóyón kóm.”
36Hol dóyón tekuy Dwata yóm Dwata yó kem tau Israél.
Laen kô dù tul sónen yóm kdóyón tekuy du.
Omin le gotu mensag yóm kdéen tau, mon le, “Tahu se.” Ne gotu dóyón le Dwata yóm kdê le.
Ktaba le ebè Dwata bè Jirusalim ne bè Gibyun
37Deng eles wen hlolò Dabid kul le Asaf ne yó kem dumuhen sfu Libay yóm mò gel nmò le ket kdaw bè yó bè solu yóm Slungan Dwata. 38Ni kem tau ni, gomong bélê le Ubid-idom ngà Jidutun, ominen nem folò wolu bud kem dumu sfu Libay mò tmóbóng kul. Yó fen mogot yó kem tau gel mentey bè bak tikeb yóm tolda gónón nô yóm Slungan Dwata, duhen Husa lewu le Ubid-idom.
39Lemwót kul le Sadok ne yó kem dumuhen, fen sù Dabid lu bè yóm Gónô Dwata gel nit le mógów ta bulul Gibyun. 40Yó hmoen kul mò demsù ebè Dwata yóm dsù hkekeb ket hlafus ne ket kimel ta yóm kun gónó demsù deng eles hetfing le. Nim nmò le ni, tódô ulit le bè yóm hlau deng snulat le bè Hlau Dwata, yóm blay Dwata yó kem tau Israél. 41Bud nélék Dabid Himan ne Jidutun ne yó kem dumu néléken boluy le mò bemlay slamat ebè Dwata, “abay se là monolen yóm kbong nawahen tau, ne laen kô tul sónen.” 42Himan ne Jidutun fen huni yó kem féw ne semdofì yó kem simbal ne yó kem dumu nuni le mung bè yó kem sngal dmóyón ke Dwata. Yó kem ngà Jidutun logi fen nélék Dabid mò mentey yó kem bak tikeb gónón nô yóm Slungan Dwata.
43Omin le gotu mulék ebè kul benwu yóm kdéen tau. Omin Dabid mulék ebè gónóen se kun nan e mni bè Dwata bè yó kem fes lówóhen.
Currently Selected:
1 Tutul Israél 16: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
